ការប្រកាសនេះត្រូវបានផ្អាក បន្ទាប់ពីក្រុមសាធារណរដ្ឋមិនទទួលស្គាល់ការរាប់សន្លឹកឆ្នោតនៅរដ្ឋអារីហ្សូណា ដែលជារដ្ឋមួយលោក Biden ឈ្នះសំឡេងឆ្នោតតិចតួចប៉ុណ្ណោះ។
អនុប្រធានាធិបតីអាម៉េរិកលោក Mike Pence ដែលត្រូវបានលោក Trump ជំរុញឲ្យរារាំងលទ្ធផលឆ្នោតនេះបានចេញសេចក្តីប្រកាសព័ត៌មានមួយដោយបញ្ជាក់កថាលោកនឹងមិនរារាំងនីតិវិធីក្នុងការប្រកាសលទ្ធផលនេះទេ។
មេដឹកនាំព្រឹទ្ធសមាជិកសំឡេងភាគច្រើនលោក Mitch McConnell ព្រឹទ្ធសមាជិកកំពូលរបស់គណបក្សសាធារណរដ្ឋបានព្រមានថា គណបក្សសាធារណរដ្ឋនឹងខូចឈ្មោះជារៀងរហូតប្រសិនបើលទ្ធផលឆ្នោតនេះត្រូវបានផ្លាស់ប្តូរ។
ជាមួយគ្នានេះដែរភាពវឹកវរបានកើតមានឡើងបន្ទាប់ពីក្រុមអ្នកតវ៉ាបានសម្រុកចូលវិមានកាពីតូល ធ្វើឲ្យសមាជិកសភាទាំងអស់ត្រូវបាននាំគេចខ្លួន។ ចំណែកអាជ្ញាធរក៏បានប្រកាសពីការដាក់កម្លាំងសន្តិសុខជាតិដើម្បីជួបទប់ទល់នឹងការសម្រុកចូលរបស់ក្រុមអ្នកតវ៉ាផងដែរ។
លោកប្រធានាធិបតីអាម៉េរិកបានស្នើឲ្យក្រុមអ្នកតវ៉ាបំបែកជួរ ខណៈដែលភាពចលាចលកើតមានឡើងនៅវិមានកាពីតូល។ លោកត្រាំបានបង្ហាញពីសាមគ្គីភាពជាមួយក្រុមអ្នកគាំទ្រលោក ដោយបញ្ជាក់សារឡើងវិញពីការអះអាងដោយគ្មានភស្តុតាងថាការបោះឆ្នោតមានការលួចបន្លំ។
ចំណែកប្រធានាធិបតីជាប់ឆ្នោតបានហៅការសម្រុកចូលក្នុងវិមានកាពីតូលថាជាការរំលោភបំពានដែលមិនធ្លាប់មានទៅលើលទ្ធិប្រជាធិបតេយ្យ។ លោកបានអំពាវនាវដល់លោកដូណាល់ត្រាំឲ្យបញ្ចប់ការធ្វើកុប្បកម្មនេះ។ លោកបញ្ជាក់ថា
ពាក្យសំដីរបស់ប្រធានាធិបតីជារឿងសំខាន់ណាស់ ទោះបីប្រធានាធិបតីនោះល្អ ឬអាក្រក់យ៉ាងណាក៏ដោយ។ ប្រសិនបើនិយាយល្អ ប្រសាសន៍របស់ប្រធានាធិបតីជាការលើកទឹកចិត្តពលរដ្ឋ ប៉ុន្តែប្រសិនបើនិយាយមិនបានល្អ វាក្លាយទៅជាការញុះញង់។ ដូចនេះខ្ញុំសូមអំពាវនាវដល់ប្រធានាធិបតីត្រាំធ្វើការប្រកាសតាមទូរទស្សន៍ជាតិឥឡូវនេះនេះដើម្បីបំពេញនូវពាក្យសម្បថរបស់លោកក្នុងការការពារដ្ឋធម្មនុញ្ញ និងទាមទារឲ្យបញ្ចប់ការចូលមកវិមាននេះ។
