ក្រឡេកទៅមើលការរៀបចំពិធីបុណ្យដ៏ធំប្រចាំឆ្នាំនារដ្ឋវិចតូរៀមួយនេះ ចាប់តាំងពីរសៀលថ្ងៃទី២ ខែកុម្ភៈមកម្ល៉េះបណ្តាផ្លូវទាំងឡាយក្នុងតំបន់លក់ទំនិញស្រ្ពីងវ៉េលត្រូវបានបិទមិនឲ្យធ្វើចរាចរណ៍ ដើម្បីទុកឱកាសដល់អ្នករៀបចំកម្មវិធីចាត់ចែងក្នុងការដំឡើងស្តង់លក់ម្ហូបអាហារ ការតាំងពិពណ៌ពីសេវាកម្មផ្សេងៗពីសំណាក់ក្រុមហ៊ុនឧបត្ថម្ភកម្មវិធី ស្តង់របស់អង្គការសប្បុរសធម៌ និងស្តង់របស់អង្គការផ្តល់ការអប់រំដល់សហគមន៍ និងជាពិសេសគឺការដំឡើងនូវឧបករណ៍ជិះកំសាន្តសម្រាប់អ្នកមកចូលរួមពិធីបុណ្យនៅថ្ងៃអាទិត្យនេះតែម្តង។
ថ្លែងនៅក្នុងពិធីបើកកម្មវិធី នៅចំពោះមុខភ្ញៀវកិតិ្តយសដែលបានចូលរួមជាច្រើនដូចជាតំណាងប្រមុខរដ្ឋវិចតូរីយ៉ា ជំនួយការស្នងការនគរបាលទីក្រុងម៉ែលប៊ិន សមាជិកព្រឹទ្ធសភា សមាជិកសភានៅក្បែរតំបន់ស្រ្ពីងវ៉េល ព្រមទាំងចៅហ្វាយក្រុង និងសមាជិកក្រុមប្រឹក្សាក្រុងតំបន់ស្រ្ពីងវ៉េល។ លោក Daniel Chang ប្រធានសមាគម SABA មានប្រសាសន៍ថាតំបន់ស្រ្ពីងវ៉េលជាតំបន់ពហុវប្បធម៌ដ៏ពិសេសមួយដែលមានលក់ទំនិញជាច្រើនប្រភេទដែលលោកអ្នកត្រូវការ។ ជាក់ស្តែងដូចជាថ្ងៃនេះស្រាប់មានស្តង់លក់ម្ហូបរហូតដល់ទៅជាង៩០ស្តង់សម្រាប់បម្រើដល់អ្នកមកចូលរួមកំសាន្តក្នុងពិធីបុណ្យនេះ។
(សំឡេង Daniel Chang)
ក្នុងនាម SABA ខ្ញុំសូមជូនពរលោកអ្នកក្នុងឆ្នាំជ្រូកនេះនូវពរឆ្នាំថ្មី ឆ្នាំជ្រូកដែលតំណាងឲ្យភាពឆ្លាតវៃ ហើយអ្នកដែលកើតឆ្នាំនេះជាមនុស្សដែលមានជីវិតដ៏ប្រពៃ។
ជាមួយគ្នានេះផងដែរលោកស្រី Roz Blades ចៅហ្វាយក្រុង Greater dandenong មានប្រសាសន៍នៅក្នុងពិធីបើកកម្មវិធីបុណ្យយ៉ាងដូច្នេះថា៖
(សំឡេងលោកស្រី Roz Blades)
(ក្នុងនាមជាចៅហ្វាយក្រុងដែលមានលក្ខណៈពហុវប្បធម៌ជាងគេបំផុតក្នុងប្រទេសអូស្ត្រាលី ខ្ញុំមានកិត្តិយសណាស់ដែលបានមកចូលរួមកម្មវិធីថ្ងៃនេះដើម្បីអបអរទីក្រុងដែលមានប្រជាជនមកពី១៥៧ ប្រទេសនៅទូទាំងពិភពលោក។ ទីក្រុង Greater dandenong នឹងក្លាយជាទីក្រុងដ៏ពិសេសនាពេលអនាគតខាងមុខនេះដោយសារតែមានប្រជាជនមកពីគ្រប់ទីកន្លែងទាំងអស់នៅទូទាំងពិភពលោក ព្រមទាំងនាំមកនូវលក្ខណៈពិសេសផ្សេងៗគ្នាដើម្បីកសាងនូវទីក្រុងមួយដ៏ពិសេសនេះ។ ខ្ញុំក៏សូមជូនពរដល់អ្នករៀបចំ កម្មវិធី និងអ្នកដែលកើតឆ្នាំជ្រូកទាំងអស់ឲ្យជួបប្រទះតែសំណាងល្អគ្រប់គ្នា។)
លោកស្រី Clare O’ Neil តំណាងរាស្ត្រសហព័ន្ធតំបន់ Hotham មានប្រសាសន៍ថា៖
(អ្វីដែលខ្ញុំចូលចិត្តចំពោះពិធីបុណ្យនេះគឺវាបានផ្តល់ឱកាសដល់យើងក្នុងការបង្ហាញពីអ្វីដែលកំពុងកើតមានឡើងនៅតំបន់ស្រ្ពីងវ៉េល ហើយវាគ្មានអ្វីដែលគួរឲ្យឆ្ងល់នោះទេ ដែលថាតំបន់នេះគឺជាតំបន់ពិសេសមួយ។ ខ្ញុំជាសមាជិកសភាសហព័ន្ធ ហើយខ្ញុំបានឡើងថ្លែងនៅចំពោះមុខសមាជិកសហព័ន្ធដទៃទៀតទាក់ទងទៅនឹងពហុវប្បធម៌ដែលមានន័យថាជាអ្វីដែលកំពុងកើតមានឡើងនៅទីនេះ ហើយវាជាការចែករំលែកដ៏សាមញ្ញពីវប្បធម៌ និងគុណតម្លៃ ព្រមទាំងម្ហូបអាហារពីផ្ទះមួយទៅផ្ទះមួយទៀត។)
ក្រៅពីការថ្លែងសុន្ទកថារបស់ភ្ញៀវកិត្តយសជាច្រើន កម្មវិធីបុណ្យក៏បានបន្តរហូតដល់ម៉ោង ១០ យប់ ដោយមានការសម្តែងសិល្បះក្នុងទម្រង់ផ្សេងៗនៅលើឆាកតន្រ្តីធំ ដូចជាការសម្តែងនូវរបាំជូនពរខ្មែរ ការច្រៀងបទចម្រៀង ព្រមទាំងការសម្តែងរបស់ជនជាតិផ្សេងៗទៀតផង។
អ្នកទស្សនាមកចូលរួមក្នុងកម្មវិធីបុណ្យនេះមានកាន់តែច្រើនឡើងនាពេលរសៀល ដោយសារតែអាកាសធាតុអំណោយផល ដោយនៅតាមបណ្តាផ្លូវរៀបចំកម្មវិធីមានមនុស្សដើរច្រើនណែនណាន់តាន់តាប់ ដើម្បីទិញម្ហូបអាហារ និងទស្សនាស្តង់ពិពណ៌ទំនិញផ្សេងៗ។ កម្មវិធីបុណ្យនេះក៏បានបញ្ចប់ដោយមានការអុជកាំជ្រួចជាច្រើនផងដែរនៅប្រហែលម៉ោង ៩ និង ២០នាទីយប់៕
