ប៉ូលិសក្រុងប៉ារីសបានបាញ់បុរសម្នាក់ដែលស្រែកថា "This is for Syria" ឬ «នេះគឺសម្រាប់ស៊ីរី» ខណៈដែលគេបានធ្វើការវាយប្រហារមកលើមន្រ្តីប៉ូលិសម្នាក់ដោយប្រើញញួរនៅខាងក្រៅព្រះវិហារ Notre-Dame ថ្ងៃអង្គារទី៦មិថុនានេះ។
ប៉ូលិសបានបាញ់បុរសរូបនេះចំទ្រូង ហើយបញ្ជូនទៅព្យាបាលនៅក្នុងមន្ទីរពេទ្យ ចំណែកឯមន្រ្តីប៉ូលិសដែលរងការវាយប្រហារវិញមានរបួសបន្តិចបន្តួចប៉ុណ្ណោះ។
រដ្ឋមន្រ្តីក្រសួងមហាផ្ទៃបារាំងលោក Gerard Collomb និយាយថា ប៉ូលិសធ្វើសកម្មភាពតបតបានយ៉ាងរហ័ស។
លោក Gerard Collomb៖ «បុរសម្នាក់មានកាន់ញញួរក្នុងដៃបានធ្វើការវាយប្រហារប៉ូលិសពីខាងក្រោយខ្នង។ នៅពេលនោះប៉ូលិសម្នាក់ទៀតក៏បានតបតយ៉ាងរហ័ស ហើយក៏បានបាញ់បុរសម្នាក់នោះ។ ប៉ូលិសរងគ្រោះកំពុងតែជាសះស្បើយបណ្តើរៗហើយក្នុងមន្ទីរពេទ្យ ហើយបុរសដែលធ្វើការវាយប្រហារនោះកំពុងតែរងរបួស។ ព្រះរាជអាជ្ញាកំពុងតែពិនិត្យមើលលើឧបទ្ទវហេតុនេះ ខណៈដែលបុរសនោះបានស្រែកថា "នេះគឺសម្រាប់ស៊ីរី" នៅពេលដែលកំពុងតែធ្វើការវាយប្រហារមកលើប៉ូលិស»។
ភ្ញៀវទេសចរអាម៉េរិកម្នាក់ដែលនៅខាងក្នុងព្រះវិហារនិយាយថា ប៉ូលិសប្រដាប់អាវុធបានឡោមព័ទ្ធព្រះវិហារហើយសុំឲ្យអ្នកនៅខាងក្នុងអង្គុយចុះហើយលើកដៃឡើងដាក់នៅលើក្បាលរបស់ពួកគេ។
Nancy Soderber៖ «ប៉ូលិសប្រាប់យើងថាពួកគេត្រូវការស៊ើបអង្កេតថាតើមានអ្នកសមគំណិតដែរឬទេ។ ហើយបន្ទាប់មកពួកគេបានចូលមកខាងក្នុងហើយឲ្យពួកយើងលើកដៃឡើងដាក់នៅពីលើក្បាល ដូចរូបដែលខ្ញុំដាក់លើ twitters និយាយថាពួកគេបានដើរជុំវិញខ្លួនយើង។ ខ្ញុំពិតជាស្ញប់ស្ញែងដល់ប្រជាជនទាំងអស់នោះដែលបានរក្សាភាពស្ងៀមស្ងាត់ ហើយបន្ទាប់មកពួកគេប្រាប់ថាហេតុការណ៍បានចប់ហើយ យើងអាចចាកចេញបាន»៕
