សេចក្តីថ្លែងការណ៍បន្តថា ការអនុវត្តទោសប្រហារជីវិតនៅមីយ៉ាន់ម៉ា ដែលបានធ្វើឡើង តែមួយសប្ដាហ៍ប៉ុណ្ណោះ មុនកិច្ចប្រជុំរដ្ឋមន្ត្រីការបរទេសអាស៊ាន លើកទី៥៥ គឺជាទង្វើមិនអាចអត់ឱនបាន និងធ្ងន់ធ្ងរណាស់ ពីព្រោះវាបានទាញថយក្រោយនូវវឌ្ឍនភាព និងថែមទាំងសបញ្ជាក់ច្បាស់ពីកង្វះឆន្ទៈគាំទ្រកិច្ចខិតខំប្រឹងប្រែងរបស់អាស៊ាន ជាពិសេសកិច្ចប្រឹងប្រែងរបស់ប្រធានអាស៊ានក្នុងការជួយពន្លឿនវឌ្ឍនភាពនៃការអនុវត្តកិច្ចព្រមព្រៀងជាឯកច្ឆន្ទ ៥ចំណុច ក្នុងការកសាងភាពជឿជាក់ និងទំនុកចិត្ត ដើម្បីឱ្យធ្វើមានកិច្ចសន្ទនាក្នុងចំណោមភាគីពាក់ព័ន្ធទាំងអស់ សំដៅបញ្ចប់អំពើហិង្សា។
ក្នុងនាមប្រធានអាស៊ាន កម្ពុជាបានប្រកាស លើកបន្ទរនូវសំឡេងដ៏លើសលុប ក្នុងមជ្ឈដ្ឋានអាស៊ាន ក៏ដូចជាសហគមន៍អន្តរជាតិ ដែលជំរុញឱ្យអាជ្ញាធរទីក្រុងណៃពិដោ ចាត់វិធានការជាក់ស្ដែង ដើម្បីអនុវត្តកិច្ចព្រមព្រៀងជាឯកច្ឆន្ទ ៥ចំណុច ឱ្យបានពេញលេញ និងប្រកបដោយប្រសិទ្ធភាព៕
