ស្ថានទូតអូស្រ្តាលីប្រចាំនៅកម្ពុជា កំពុងបន្តស្វែងរកការធ្វើបច្ចុប្បន្នភាពពីរដ្ឋាភិបាលកម្ពុជា ទាក់ទងនឹងការចាក់វ៉ាក់សាំងសម្រាប់ជនបរទេស

ស្ថានទូតអូស្ត្រាលី លើកឡើងថា «យើងមិនទាន់បានទទួលព័ត៌មានបន្ថែមទៀតទេ ចាប់តាំងពីការធ្វើបច្ចុប្បន្នភាពចុងក្រោយរបស់យើង រួមទាំងថាតើលិខិតរបស់ស្ថានទូត នឹងត្រូវការដែរ ឬទេ?។ មានប្រទេសជាច្រើន ដែលមិនមានស្ថានទូត នៅកម្ពុជាទេ។ ឥឡូវនេះ ការផ្តោតអារម្មណ៍របស់រដ្ឋាភិបាលកម្ពុជា គឺផ្តោតលើការចាក់វ៉ាក់សាំង សម្រាប់ប្រជាជនកម្ពុជា ដែលមានអាយុលើសពី ៦០ឆ្នាំនៅតាមតំបន់សំខាន់ៗ»។

សេច​ក្តី​ប្រកាស​​របស់​ស្ថាន​ទូត​អូ​ស្ត្រា​លី​​​ខាងលើនេះ បានធ្វើឡើង ខណៈដែល​កម្ពុជា នឹងទទួលវ៉ាក់សាំងបង្ការជំងឺកូវីដ១៩ ចំនួន ១,៥លានដូសទៀត ពីប្រទេសចិន ជាប្រភេទវ៉ាក់សាំង Sinovac។ រាជរដ្ឋាភិបាល​កម្ពុជា ប្រកាសថា វ៉ាក់សាំង​ទាំងនេះ គឺរាជរដ្ឋាភិបាល ទិញ​ពីចិន​ ខណៈដែលចិន បានសន្យាផ្តល់​ឲ្យ​កម្ពុជា ចំនួន ១លានដូស ហើយបាន​ប្រគល់​ឲ្យរួចហើយនូវវ៉ាក់សាំង Sinopharm ៦០ម៉ឺនដូស​។

​កម្ពុជា​ កាល​​​ពី​​​ថ្ងៃ​​​ទី​​​២​​ ខែ​មីនា​​ ​​ក៏​​ទទួល​បាន​វ៉ាក់​សាំង​កូវីដ​ AstraZeneca ​ចំនួន​ ៣២៤ ០០០​ ដូស ​ដែល​ជា​ជំនួយ​របស់​អង្គការសុខភាពពិភពលោក​។

វ៉ាក់សាំងទាំង ជិត ១លានដូស ដែល​កម្ពុជា ទទួលបានជាជំនួយនោះ ត្រូវបានចាក់ជូនក្រុមអាទិភាព​ ដូចជា មន្ត្រីរាជការជាន់ខ្ពស់​ ពេទ្យ ប៉ូលិស ទាហាន គ្រូបង្រៀន កម្មករបោសសំរាម និងចុងក្រោយនេះ ចាក់ដល់មនុស្សចាស់អាយុចាប់ពី ៦០ឆ្នាំឡើង នៅភ្នំពេញ​។​

មកដល់ថ្ងៃទី២៥ ខែមីនា មានប្រជាជនកម្ពុជា ជាង ៣០ម៉ឺននាក់ បានចាក់វ៉ាក់សាំង​រួច ដោយ​ពេលចាប់ផ្តើមដំណើរការចាក់វ៉ាក់សាំងដំបូង កាលពីដើមខែកុម្ភៈ ហាក់ដូចជា ពុំសូវមានមនុស្សទៅចាក់ច្រើនឡើយ។ តែនៅពេលមានការឆ្លងរាលដាលច្រើន ក៏មានមនុស្ស សំរុកទៅចាក់​វ៉ាក់សាំង រហូតដល់អស់វ៉ាក់សាំង ដោយសារតែជំហានដំបូងនេះ វ៉ាក់សាំង​ ដែលកម្ពុជា ទទួលបានមានចំនួនតិចតួច​៕