ម៉ាស៊ីនត្រួតពិនិត្យលក្ខណៈបច្ចេកទេសយានយន្ត ឬម៉ាស៊ីនឈៀកឡានចល័ត តម្លៃជាង៣០ម៉ឺនដុល្លារ ត្រូវបានក្រសួងសាធារណការនិងដឹកជញ្ជូន បានបើកសម្ពោធដាក់ឲ្យប្រើប្រាស់ជាលើកដំបូងកាលពីព្រឹកថ្ងៃទី១១តុលា។ ម៉ាស៊ីនចល័តនោះអាចត្រួតពិនិត្យម្តងបានរថយន្តចំនួន២គ្រឿង។
លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូន បានលើកឡើងពីគោលបំណងនៃការដាក់ឲ្យប្រើប្រាស់ម៉ាស៊ីនត្រួតពិនិត្យលក្ខណៈបច្ចេកទេសយានយន្តចល័តនេះថា គឺដើម្បីបង្ខិតសេវាសាធារណៈឲ្យកាន់តែជិតប្រជាពលរដ្ឋ បង្កភាពងាយស្រួល ចំណេញពេលវេលា កាត់បន្ថយគ្រោះថ្នាក់ចរាចរណ៍ និងការចំណាយផ្សេងៗ។
លោកទេសរដ្ឋមន្ត្រី ក៏បានបង្ហាញពីអត្ថប្រយោជន៍ នៃម៉ាស៊ីនត្រួតពិនិត្យលក្ខណៈបច្ចេកទេសយានយន្តនេះ ដែលជាដំណោះស្រាយមួយ ក្នុងការជួយសម្រួលដល់ប្រជាពលរដ្ឋ ដែលរស់នៅបណ្តាខេត្តឆ្ងាយៗ ដោយបានចូលរួមកាត់បន្ថយការធ្វើដំណើរ មកត្រួតពិនិត្យលក្ខណៈបច្ចេកទេសយានយន្តនៅរាជធានី-ខេត្ត ដែលមានមណ្ឌលត្រួតពិនិត្យលក្ខណៈបច្ចេកទេសយានយន្ត។ ម៉ាស៊ីននេះ នឹងចល័តទៅគ្រប់ ២៥ខេត្ត-ក្រុង ដើម្បីឲ្យប្រជាពលរដ្ឋ អាចយកយានយន្តមកត្រួតពិនិត្យលក្ខណៈបច្ចេកទេសបានគ្រប់ៗគ្នា នៅបណ្តាខេត្តរបស់គាត់ផ្ទាល់តែម្តង។
ចំណែកតម្លៃសេវាត្រួតពិនិត្យលក្ខណៈបច្ចេកទេសយានយន្ត ឬតម្លៃឈៀករថយន្តនេះ គឺក្រសួងសាធារណការ និងដឹកជញ្ជូន បានកំណត់ទៅតាមប្រភេទយានយន្ត តម្លៃចន្លោះពី ៣ម៉ឺនរៀល ដល់ ៦ម៉ឺន៦ពាន់រៀល៕
