បើតាមឯកសារជីវប្រវត្តិ ដែលបានចុះផ្សាយនៅក្នុងគេហទំព័រទីស្ដីការគណៈរដ្ឋមន្រ្តីបង្ហាញថា លោក សុខ អាន កើតនៅថ្ងៃទី១៦ ខែមេសា ឆ្នាំ១៩៥០ នៅភូមិកំពង់ ឃុំព្រះបាទជាន់ជុំ ស្រុកគីរីវង់ ខេត្ដតាកែវ។
លោក សុខ អាន បានរៀបអាពាហ៍ពិពាហ៍ជាមួយលោកស្រី អាយ អាន្នី មានកូនស្រីម្នាក់ និងកូនប្រុសបួននាក់។
ចាប់ពីឆ្នាំ១៩៩៨ រហូតដល់សព្វថ្ងៃ លោក សុខ អាន ជារដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រី។ លោក សុខ អាន ក៏ជាសមាជិករដ្ឋសភា ប្រចាំមណ្ឌលខេត្តតាកែវ ចាប់តាំងពីឆ្នាំ១៩៩៣ រហូតដល់បច្ចុប្បន្ន។
ពីឆ្នាំ១៩៩២ ដល់ឆ្នាំ១៩៩៨ លោក សុខអាន ជាសហរដ្ឋមន្ដ្រី រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រី។
កាលពីឆ្នាំ១៩៩១ លោក សុខអាន ជាអគ្គលេខាធិការក្រុមប្រឹក្សាជាតិជាន់ខ្ពស់ តំណាងគណបក្សប្រជាជនកម្ពុជា និងជាប្រធានខុទ្ទកាល័យកណ្ដាលនៃគណៈកម្មាធិការមជ្ឈឹមបក្ស គណបក្សប្រជាជន ព្រមទាំងជាអនុរដ្ឋមន្ដ្រីក្រសួងមហាផ្ទៃ។
កាលពីឆ្នាំ១៩៨៨ លោកសុខអាន ជាអនុរដ្ឋមន្ដ្រីក្រសួងការបរទេស។ ចំណែកនៅឆ្នាំ១៩៨៥លោក សុខអាន ធ្វើជាឯកអគ្គរដ្ឋទូតវិសាមញ្ញ និងពេញសមត្ថភាព ប្រចាំនៅប្រទេសឥណ្ឌា។ នៅឆ្នាំ១៩៨៣ លោក សុខអាន ជាអគ្គលេខាធិការ នៃគណៈកម្មាធិការសន្ដិភាពជាតិកម្ពុជា។
កាលពីឆ្នាំ១៩៨១ លោក សុខអាន ជាអគ្គលេខាធិការ នៃក្រសួងការបរទេស និងជាប្រធានខុទ្ទកាល័យផ្ទាល់របស់លោក ហ៊ុន សែន ដែលកាលណោះ ជារដ្ឋមន្ត្រី នៅក្រសួងការបរទេស៕
