ក្រសួងការបរទេសកម្ពុជា តាមរយៈអ្នកនាំពាក្យ លោក ជុំ សុន្ទរី បានថ្លែងថា ក្រសួងការបរទេស បានស្នើរួចហើយទៅកាន់រដ្ឋាភិបាលអូស្ត្រាលី ត្រូវធានាកិត្តិយស និងសេចក្តីថ្លៃថ្នូរបស់លោកនាយករដ្ឋមន្ត្រីហ៊ុនសែន ដែលនឹងទៅ ចូលរួមកិច្ចប្រជុំកំពូលអាស៊ាន និងអូស្ត្រាលី នៅពាក់កណ្តាលខែមីនា ឆ្នាំ២០១៨ នៅទីក្រុងស៊ីដនី ប្រទេសអូស្ត្រាលី។
កាលពីពាក់កណ្តាលខែកុម្ភៈ ឆ្នាំ២០១៨ លោកនាយករដ្ឋមន្រ្តី ហ៊ុន សែន បានមានប្រសាសន៍ ថា អាស៊ាន បើគ្មានរូបលោកទេ ក៏មិនមែនមានន័យថា អាស៊ាននោះដែរ ព្រោះលោកអាចជំទាស់មិនឲ្យចេញសេចក្តីថ្លែងការណ៍ណាមួយរវាងអាស៊ាន-អូស្ត្រាលី ចេញបាន ហើយបើសិនជារូបលោក មិនទៅចូលរួមកិច្ចប្រជុំកំពូលពិសេស នៅប្រទេសអូស្ត្រាលី នាពាក់កណ្តាលខែមីនាខាងមុខនេះទេ គឺកិច្ចប្រជុំរវាងអាស៊ាន និងអូស្ត្រាលី ក៏មិនអាចកើតឡើងបានដែរ។
លោកនាយករដ្ឋមន្ត្រី ហ៊ុន សែន ក៏បានប្រកាសដែរថា អាស៊ាន និងអូស្ត្រាលី រួមទាំងអង្គការសហប្រជាជាតិ មិនអាចដាក់ការគាបសង្កត់ណាមួយមកលើរូបលោក និងរដ្ឋាភិបាលកម្ពុជា នៅក្នុងកិច្ចប្រជុំអាស៊ាន-អូស្ត្រាលី នាពេលខាងមុខនេះឡើយ។ ផ្ទុយទៅវិញ មានតែរូបលោកទេ ដែលអាចនឹងធ្វើឲ្យកិច្ចប្រជុំរវាងអាស៊ាន និងអូស្ត្រាលី មិនអាចដំណើរការទៅបាន បើសិនជាមានបាតុកម្មតវ៉ា ឬក៏ការដាក់ការគាបសង្កត់ណាមួយមកលើរូបលោក។
លោកនាយករដ្ឋមន្ត្រី ហ៊ុនសែន ក៏បានប្រកាសមិនឲ្យបាតុករ ដុតរូបទីងមោង តំណាងឲ្យរូបលោក។ លោកថា បើសិនជាមានអ្នកដុតរូបទីងមោង តំណាងឲ្យរូបលោក នោះលោកនឹងតាមចាប់ដល់ផ្ទះ។
ក៏ប៉ុន្តែយ៉ាងណាក៏ដោយ នាប៉ុន្មានថ្ងៃនេះ បាតុករជាពលរដ្ឋខ្មែររស់នៅប្រទេសអូស្ត្រាលី បានដុតរូបទីងមោងតំណាងរូបលោកនាយករដ្ឋមន្ត្រី ហ៊ុនសែន ដែលជាការផ្កើននឹងការប្រកាសព្រមានរបស់លោកនាយករដ្ឋមន្ត្រីហ៊ុនសែន។
យ៉ាងណាក៏ដោយ ជាប្រតិកម្មក្នុងជំហ៊ានដំបូងនេះ រដ្ឋាភិបាលកម្ពុជា តាមរយៈតុលាការសាលាដំបូងរាជធានីភ្នំពេញ បានចេញដីកា សម្រេចរឹបអូសទ្រព្យសម្បត្តិរបស់លោកសមរង្ស៊ី អតីតប្រធានគណបក្សសង្គ្រោះជាតិ ដែលរួមមាន ដី និងអគារ ដែលជាអតីតទីស្នាក់ការកណ្តាលគណបក្សសង្គ្រោះជាតិ និងផ្ទះរបស់លោកសមរង្ស៊ី ដែលស្ថិតនៅតាមផ្លូវជាតិលេខ២ ក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
ការរឹបអូសនេះ ត្រូវបានចៅក្រម លើកឡើងថា ដោយសារតែលោក សម រង្ស៊ី មិនបានបង់ប្រាក់សងជំងឺចិត្តនៅក្នុងសំណុំរឿង ដែលប្ដឹងដោយលោក ហេង សំរិន និងលោកនាយករដ្ឋមន្ត្រី ហ៊ុន សែន ដែលសរុបជាទឹកប្រាក់ ៤២៥០ លានរៀល ស្មើនឹងជាង ១លាន ៦សែនដុល្លារអាមេរិក។
យ៉ាងណាក៏ដោយ ជាមួយនឹងការលើកឡើងខាងលើនេះ អ្នកនាំពាក្យក្រសួងការបរទេសកម្ពុជា លោក ជុំ សុន្ទរី ក៏បានប្រកាស នៅព្រឹកថ្ងៃអង្គារ ទី២៧ ខែកុម្ភៈ ដោយរំឮកសហភាពអឺរ៉ុប អំពីនយោបាយការបរទេស ដែលកម្ពុជា កំពុងអនុវត្តជាមួយអឺរ៉ុប។ ការលើកឡើងនេះ បន្ទាប់ពីក្រុមប្រឹក្សាសហភាពអឺរ៉ុប បានចេញសេចក្ដីសម្រេច ព្រមានកម្ពុជា ក្នុងសំណុំរឿងនយោបាយរបស់កម្ពុជា ពាក់ព័ន្ធនឹងការចាប់ឃុំខ្លួនមេដឹកនាំគណបក្សប្រឆាំង លោកកឹមសុខា ព្រមទាំងរំលាយគណបក្សសង្គ្រោះជាតិ ជាដើម។
ក៏ប៉ុន្តែ លោកជុំសុន្ទរី បញ្ជាក់ថា កម្ពុជាសង្ឃឹមថា សហភាពអឺរ៉ុប នឹងផ្ដល់ការគោរពដល់ទំនាក់ទំនងប្រទេសទាំងពីរ ដើម្បីបន្តរក្សាកិច្ចសហការល្អជាមួយគ្នា។ ពោលគឺអឺរ៉ុប មិនត្រូវលូកដៃចូលកិច្ចការផ្ទៃក្នុងរបស់ប្រទេសកម្ពុជានោះឡើយ។
គួររម្លឹកដែរថា ក្រុមប្រឹក្សាសហភាពអឺរ៉ុប កាលពីយប់ថ្ងៃទី២៦ ខែកុម្ភៈ បានចេញសេចក្ដីសម្រេច ព្រមានចាត់វិធានការមួយចំនួន មកលើកម្ពុជា ប្រសិនបើកម្ពុជា មិនព្រមធ្វើឲ្យស្ថានការណ៍នយោបាយ និងការគោរពសិទ្ធិមនុស្ស វិលទៅរកភាពល្អប្រសើឡើងវិញទេ៕
