តំបន់ព្រំដែន ចំណុចអូរអាឡៃ និងអូរតាង៉ាវ ស្រុកសៀមប៉ាង ខេត្តស្ទឹងត្រែង ដែលជាទឹកដីកម្ពុជា ត្រូវបានទាហានឡាវ មកឈរជើង ចាប់តាំងពីខែមេសា ឆ្នាំ២០១៧ ក្នុងហេតុផលថា ពួកគេមកហាមឃាត់មិនឲ្យកម្ពុជា ធ្វើផ្លូវតាមព្រំដែននោះឡើយ។
កងទ័ពកម្ពុជា បានធ្វើដំណើរទាំងយប់ទៅកាន់តំបន់ព្រំដែនឡាវ ក្នុងខេត្តស្ទឹងត្រែងនេះ តាមបទបញ្ជារបស់លោកនាយករដ្ឋមន្ត្រីហ៊ុនសែន ដែលបានប្រកាសកាលពីព្រឹកថ្ងៃទី១១សីហា ដោយដាក់ឱសានវាទចុងក្រោយ ឲ្យកងទ័ពឡាវ ត្រូវដកចេញពីទឹកដីកម្ពុជា ក្នុងខេត្តស្ទឹងត្រែង ត្រឹមថ្ងៃទី១៧សីហា។
ក្រសួងការបរទេសកម្ពុជា ក៏បានប្រកាសឲ្យដឹងកាលពីរសៀលថ្ងៃទី១១សីហានេះផងដែរថា លោកនាយករដ្ឋមន្ត្រី ហ៊ុនសែន នឹងដឹកនាំគណៈប្រតិភូជាន់ខ្ពស់ ទៅកាន់ទីក្រុងវៀងច័ន្ទ ដើម្បីជួបចរចាក្នុងលក្ខណៈជាអ្នកជិតខាង ជាមួយលោក ថោងលន់ ស៊ីស៊ូលីត នាយករដ្ឋមន្ត្រីឡាវ អំពីបញ្ហាព្រំដែនរវាងប្រទេសទាំងពីរ និងស្នើឲ្យរដ្ឋាភិបាលឡាវ ដកកងកម្លាំងប្រដាប់អាវុធទាំងអស់របស់ខ្លួន ចេញពីតំបន់ក្បែរអូរអាឡៃ និងតំបន់អូរតាង៉ាវ ស្រុកសៀមប៉ាង ខេត្តស្ទឹងត្រែង ជាប់ព្រំដែននឹងខេត្តអាតាពើ ប្រទេសឡាវ៕
