កិច្ចប្រជុំរយៈពេល ២ថ្ងៃនេះ ក៏ដើម្បីសែ្វងរកឱកាស និងមធ្យោបាយនានា ក្នុងទិសដៅកៀងគរធនធានថវិកា សម្រាប់វិស័យសកម្មភាពបោសសម្អាតមីន នៅប្រទេសកម្ពុជា។
ក្រៅពីការរៀបចំសន្និបាត អាជ្ញាធរមីន ក៏រៀបចំតាំងពិព័រណ៍ បង្ហាញពីស្នាដៃ និងសមត្ថភាពក្នុងការដោះស្រាយនូវការគំរាមកំហែងពីគ្រាប់មីន និងសំណល់ជាតិផ្ទុះពីសង្រ្គាម នៅប្រទេសកម្ពុជា ផងដែរ។ នេះបើតាមលោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីនកម្ពុជា។
( សំឡេងលោកទេសរដ្ឋមន្ត្រី លី ធុជ )
របាយការណ៍របស់អាជ្ញាធរមីនកម្ពុជា បង្ហាញថា គ្រាប់មីន និងសំណល់ជាតិផ្ទុះពីសង្រ្គាម នៅកម្ពុជា បានធ្វើអោយមានអ្នកស្លាប់ និងរបួសប្រមាណជាង ៦ម៉ឺននាក់ គិតចាប់ពីឆ្នាំ១៩៧៩ ដល់ឆ្នាំ២០១៧។
ជាមួយគ្នានោះ តាមរយៈការរួមចំណែកជាលក្ខណៈមនុស្សធម៌ពីសហគមន៍អន្តរជាតិ និងការខិតខំប្រឹងប្រែងរបស់រាជរដ្ឋាភិបាលកម្ពុជា នៅក្នុងរយៈពេល ២៥ឆ្នាំ គិតពីឆ្នាំ១៩៩២ កន្លងមកនេះ កម្ពុជាបានកាត់បន្ថយចំនួនអ្នកស្លាប់ និងរបួស ដោយសារគ្រាប់មីន និងបានរំដោះផ្ទៃដីបានប្រមាណ ១៧០០ គីឡូម៉ែត្រក្រឡា។ យ៉ាងណាក៏ដោយ អាជ្ញាធរមីន បានប៉ាន់ប្រមាណថា ផ្ទៃដីប្រហែល ២ ពាន់គីឡូម៉ែត្រក្រឡា នៅមានគ្រាប់មីន និងសំណល់ជាតិផ្ទុះពីសង្រ្គាមនៅឡើយ។
អាជ្ញាធរមីន បានគូសបញ្ជាក់ថា គិតពីឆ្នាំ១៩៩២ ដល់ឆ្នាំ២០១៧ គ្រាប់មីនចំនួនប្រមាណ ១,២៥ លានគ្រាប់ និងសំណល់ជាតិផ្ទុះពីសង្រ្គាម ប្រមាណ ២,៧លានគ្រាប់ នៅទូទាំងប្រទេសកម្ពុជា ត្រូវបានរកឃើញ និងបំផ្លាញចោល៕
