សូមបញ្ជាក់ថា នាយទាហានខ្មែរ មានឋានន្តរសក្តិខ្ពស់ ចាប់ពីអនុសេនីយ៍ត្រីឡើងទៅ។ ចំណែកឯពលទាហានវិញ គឺជាទាហាន ចាប់ពីថ្នាក់ពលទោ ដល់នាយឯក។
លោកនាយករដ្ឋមន្ត្រី ហ៊ុន ម៉ាណែត បានថ្លែងដូច្នេះ នៅក្នុងពិធីអបអរសាទទិវាគ្រូបង្រៀន ថ្ងៃទី៥ តុលា នៅវិទ្យាស្ថានបច្ចេកវិទ្យាកម្ពុជា ឬសាលាតិចណូ នៅក្នុងរាជធានីភ្នំពេញ។
«ខ្ញុំបានប្រាប់ទៅឯកឧត្តមឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ ថាយើងមាននាយទាហានច្រើន ជាងពលទាហាន ដោយសារតែកន្លងមកនេះ យើងមានសង្គ្រាមធ្វើឲ្យមានការកើនឡើង ហើយក៏មានអ្នកចូលនិវត្តន៍។ ផែនការបណ្តុះបណ្តាលប្រចាំឆ្នាំ គឺបណ្តុះបណ្តាលនាយទាហានទាំងអស់ ដោយគ្មានផែនការបណ្តុះបណ្តាល ពលទាហាននោះទេអ៊ីចឹង ចង់៣០ឆ្នាំទៀត ក៏គ្មានការបណ្តុះបណ្តាលពលទាហាននោះទេ ដូច្នេះ ត្រូវគិតឡើងវិញ»។
លោកនាយករដ្ឋមន្ត្រី ហ៊ុន ម៉ាណែត បានលើកឡើងថា មានអ្នកខ្លះថា ការបណ្តុះបណ្តាលទាហាននេះ ដោយសារតែមានប្រទេសជាមិត្តផ្តល់អាហាររូបករណ៍មក ដោយកន្លែងខ្លះ មាន៩០នាក់ ទៅ ១០០នាក់ ដោយខ្លាចបាត់បង់។ តែចំណុចនេះ លោក ហ៊ុន ម៉ាណែត លើកឡើងថា គឺមិនមានទេ ហើយត្រូវគិតថា បើសិននាយទាហានច្រើនជាងពលទាហានហើយ គឺយើងត្រូវអារកាត់ថា ប៉ុន្មានឆ្នាំនេះ ត្រូវកាត់ចំនួននាយទាហានចំនួនប៉ុណ្ណេះចោល ព្រោះត្រូវយកថវិកាទៅជ្រើសរើសពលទាហានថ្មីវិញ ល្អជាង។
ជាមួយគ្នានោះដែរ លោកនាយករដ្ឋមន្ត្រី ហ៊ុន ម៉ាណែត ក៏បានណែនាំឲ្យរដ្ឋមន្ត្រីទាំងអស់ គិតគូរពីក្របខណ្ឌអាទិភាពរបស់ខ្លួន ហើយចាំយកជំនួយដាក់ឲ្យចំ ជាជាងគេជួយអ្វីយកតែរបស់ហ្នឹង ដែលធ្វើឲ្យគ្មានការសហការគ្នា។
លោក ហ៊ុន ម៉ាណែត ក៏បានប្រកាសថា រាជរដ្ឋាភិបាល សន្សំបានថវិកាប្រមាណជាង ២០០លានដុល្លារ ពីការព្យួរការចំណាយទៅលើកិច្ចការមិនសំខាន់មួយចំនួន នៅក្នុងឆ្នាំ២០២៣ នេះ។ ថវិកាទាំងនេះ ត្រូវបានរាជរដ្ឋាភិបាល យកមកបង្កើនថវិកា ជួយពលរដ្ឋជួបបញ្ហាគ្រោះទឹកជំនន់ លើផ្នែកគាំពារសង្គម និងគម្រោង ដែលចំគោលដៅចាំបាច់មួយចំនួន។
ទន្ទឹមនឹងនេះ លោក ហ៊ុន ម៉ាណែត ក៏បានណែនាំ ក្រសួងអប់រំ យុវជន និងកីឡា និងគ្រប់ក្រសួងទាំងអស់ ពិនិត្យមើលឡើងវិញ លើកម្មវិធីមួយចំនួន ដែលលែងត្រូវនឹងស្ថានភាពបច្ចុប្បន្ន ត្រូវកាត់ចោល ហើយយកថវិកាទាំងនោះ បង្វែរទៅប្រើប្រាស់លើកិច្ចការ ដែលជាអាទិភាពជំនួសវិញ៕
