ក្នុងសេចក្តីប្រកាស ក្រសួងសុខាភិបាល បានបង្ហាញពីលទ្ធផលពិសោធន៍ ដែលទទួលបានពីមជ្ឈមណ្ឌលជាតិពិសោធន៍សុខាភិបាលជាតិ និងមន្ទីរពិសោធន៍នៃវិទ្យាស្ថានបច្ចេកវិទ្យាកម្ពុជា តិចណូ លើសំណាកស្រា និងទឹក ដែលយកចេញពីប្រភព ដែលសង្ស័យពុល ហើយលទ្ធផលបង្ហាញថា ស្រាសនោះ មានជាតិមេតាណុលខ្ពស់លើសកម្រិត។ រីឯការធ្វើតេស្តលើសំណាកទឹក ឃើញថា មានជាតិពុល ដែលបណ្តាលមកពីថ្នាំបាញ់សម្លាប់ស្មៅ និងថ្នាំសម្លាប់សត្វល្អិតហូរចូលក្នុងព្រែកតេ និងអូរគគី មានលើសពីកម្រិតស្តង់ដារ។
លោកស្រីវេជ្ជបណ្ឌិត ឱ វណ្ណឌីន ប្រធាននាយកដ្ឋានបច្ចេកទេស និងជាអ្នកនាំពាក្យក្រសួងសុខាភិបាល បានបញ្ជាក់បន្ថែមពីករណីពុលស្រា និងពុលទឹក ដែលបានកើតឡើងកាលពីថ្ងៃទី០៥ ខែឧសភា នៅស្រុកចិត្របុរី ខេត្តក្រចេះ យ៉ាងដូច្នេះថា៖
( សំឡេងលោកស្រីវេជ្ជបណ្ឌិត ឱ វណ្ណឌីន)
ជុំវិញករណីនេះ ក្រសួងសុខាភិបាល ក៏បានប្រកាសថា របាយការណ៍ខាងលើនេះ ទទួលបានពីការអង្កេតស្រាវជ្រាវដោយក្រុមការងារឆ្លើយតបបន្ទាន់របស់ក្រសួងសុខាភិបាល និងមន្ទីរសុខាភិបាល ខេត្តក្រចេះ ដោយមានទីប្រឹក្សាបច្ចេកទេសពីអង្គការសុខភាពពិភពលោក រួមការងារជាមួយផងដែរ។
យ៉ាងណាក៏ដោយ ក្រសួងសុខាភិបាល បានបញ្ជាក់ថា រហូតមកដល់ព្រលប់ថ្ងៃទី០៨ ខែឧសភា ឆ្នាំ២០១៨ អ្នកជំងឺសម្រាកពេទ្យ ដែលធូរស្រាល ត្រូវបានអនុញ្ញាតឲ្យចេញទៅផ្ទះវិញ ចំនួន ១៣៩ នាក់។ រីឯចំនួនអ្នកស្លាប់ មិនមានទៀតទេ គឺត្រឹមតែ ១៣នាក់ប៉ុណ្ណោះ។
ក្រសួងសុខាភិបាល ក៏បានចាត់វិធានការ និងការការពារសុខភាពដល់ប្រជាពលរដ្ឋ នៅក្នុងតំបន់ ដែលមានហេតុការណ៍ពុល នៅក្នុងខេត្តក្រចេះ នៅភូមិស្រែនន និងភូមិអាលច ក្នុងឃុំកន្ទួត ស្រុកចិត្របុរី ដោយអនុវត្តតាមការណែនាំ ដើម្បីចៀសវាងការពុល៖ ១-ហាមដាច់ខាត និងបញ្ឈប់ការពិសារស្រាស ដែលបិត និងលក់ស្រាស នៅក្នុងមូលដ្ឋាន ដែលមិនមានលក្ខណៈត្រឹមត្រូវនៅតាមមូលដ្ឋានរបស់ខ្លួន ២-ហាមដាច់ខាត កុំប្រើប្រាស់ទឹកព្រែកតេ និងទឹកអូរគគី ( ជាបណ្តោះអាសន្ន ) ក្នុងតំបន់ដែលកើតហេតុពុល និងត្រូវប្រើប្រាស់ទឹកស្អាតផ្គត់ផ្គង់ដោយអាជ្ញាធរ ដែលដឹកជូនដល់អ្នកភូមិ ព្រមទាំងបរិភោគទឹកស្អាត និងដាំពុះបានល្អត្រឹមត្រូវ ៣-ប្រជាពលរដ្ឋ ក្នុងភូមិដែលកើតហេតុ និងប្រជាពលរដ្ឋទូទៅទាំងអស់ ត្រូវអនុវត្តន៍អនាម័យល្អ ជាពិសេសចូលរួមអនុវត្តអនាម័យចំណីអាហារស្អាត រស់នៅ និងហូបស្អាត៕
