លោកនាយករដ្ឋមន្ត្រី ហ៊ុនសែន បញ្ជាក់ថា យុវជន តាមរយៈទិវានៃសេចក្តីស្រឡាញ់ គួរនាំគ្នាធ្វើសកម្មភាពទំាងឡាយ ដែលបញ្ជាក់ពីការស្រឡាញ់ចំពោះឪពុកម្តាយ ចំពោះជាតិ និងវប្បធម៌ ជាដើម ទើបជាទង្វើល្អប្រសើរ។
ចំណែកមន្ត្រី ដែលធ្វើការ ដើម្បីពង្រឹងសីលធម៌គ្រួសារ និងសីលធម៌សង្គម ក៏បានអំពាវនាវ កុំឲ្យយុវជន ជ្រួលជ្រើម នៅថ្ងៃបុណ្យក្តីស្រឡាញ់ ថ្ងៃ១៤ កុម្ភៈ ព្រោះវាគឺជាវប្បធម៌បរទេស។
លោក ឈួរ សុបញ្ញា ប្រធាននាយកដ្ឋានសុខុមាលភាពសង្គម បានលើកឡើងថា ឪពុកម្តាយគប្បីចំណាយពេលជាមួយកូនៗ ដើម្បីបង្កើនភាពស្និទ្ធស្នាល។ រីឯអាជ្ញាធរ គួរគប្បីបង្កើនការទប់ស្កាត់នូវរាល់សកម្មភាពអវិជ្ជមាននានា ដើម្បីបន្សាបភាពជ្រួលជ្រើមក្នុងស្រទាប់យុវវ័យ នៅថ្ងៃ១៤កុម្ភៈ ថ្ងៃនៃទិវាក្តីស្រឡាញ់។
ដោយឡែក ក្រសួងអប់រំ យុវជន និងកីឡា បានសង្កេតឃើញថា ទិវានៃក្ដីស្រឡាញ់ ធ្វើឲ្យសិស្សានុសិស្ស និងយុវជនមួយចំនួន ភ្លើតភ្លើន ភ្លេចការសិក្សា ប៉ះពាល់កិត្ដិយស សេចក្ដីថ្លៃថ្នូររបស់ខ្លួន និងគ្រួសារ ប្រាសចាកពីប្រពៃណីវប្បធម៌ដ៏ផូរផង់របស់ជាតិ ទើបក្រសួងបានណែនាំដល់គ្រឹះស្ថានសិក្សានានា ដោយផ្តោតលើ ៤ចំណុចគឺ៖
១. ត្រូវផ្សព្វផ្សាយ ដល់សិស្សានុសិស្សតាមគ្រប់មធ្យោបាយ កុំឲ្យមានការយល់ខុស អំពីអត្ថន័យនៃទិវាបុណ្យនៃក្ដីស្រឡាញ់។
២. ពង្រឹងការអនុវត្ដបទបញ្ជាផ្ទៃក្នុងរបស់គ្រឹះស្ថានសិក្សាឲ្យបានម៉ឹងម៉ាត់ ជាពិសេសលើការគ្រប់គ្រងសីលធម៌ និងវិន័យ ដោយតាមដានអវត្ដមាន របស់សិស្សានុសិស្សជាប្រចាំ។
៣. ជំរុញដំណើរការរបស់ក្រុមប្រឹក្សាយុវជន ក្រុមប្រឹក្សាកុមារប្រចាំសាលា ដោយអនុវត្ដសកម្មភាព មិត្ដអប់រំមិត្ដ និង
៤. ទំនាក់ទំនងជិតស្និទ្ធ ជាមួយមាតាបិតា អ្នកអាណាព្យាបាលសិស្ស សហគមន៍ ដើម្បីផ្ដល់ និងទទួលព័ត៌មាននានា ពាក់ព័ន្ធនឹងសកម្មភាពមិនប្រក្រតីរបស់សិស្សានុសិស្ស ដើម្បីសហការគ្នា អប់រំ ណែនាំ កែលម្អសិស្សានុសិស្ស បានទាន់ពេលវេលា៕
