លោក សម សេរី ប្រធានចលនារណសិរ្សរំដោះជាតិខ្មែរ ត្រូវបានសមត្ថកិច្ចថៃ ចាប់ខ្លួន កាលពីយប់ថ្ងៃទី២៥ ខែមេសា ឆ្នាំ២០១៨ ដោយសារតែរស់នៅប្រទេសថៃ លើសថ្ងៃកំណត់ ក្នុងទិដ្ឋាការ។
ឧក្រឹដ្ឋជន ឈ្មោះ សម សេរី ជាជនជាតិខ្មែរ មានសញ្ជាតិដាណាម៉ាក ត្រូវបានតុលាការកម្ពុជា កាលពីឆ្នាំ២០១៤ បានចេញសាលក្រមស្ថាពរកាត់ទោសកំបាំងមុខ រួមនឹងអ្នកពាក់ព័ន្ធ ៥ នាក់ទៀត ដាក់ពន្ធនាគារជាច្រើនឆ្នាំ ពីបទពាក់ព័ន្ធអំពើញុះញង់ ដើម្បីផ្ដួលរំលំរាជរដ្ឋាភិបាលស្របច្បាប់។
យ៉ាងណាក៏ដោយ លោកនាយឧត្តមសេនីយ៍ ខៀវ សុភ័គ មានសង្ឃឹមថា ថៃនឹងយល់ព្រមតាមសំណើរបស់កម្ពុជា ព្រោះប្រទេសទាំងពីរ មានកិច្ចព្រមព្រៀមបត្យាប័ន បញ្ជូនអ្នកទោសឲ្យគ្នាទៅវិញទៅមកយូរឆ្នាំមកហើយ។ ក្នុងពេលជាមួយគ្នានេះ ក៏មានដំណឹងថា រដ្ឋាភិបាលប្រទេសដាណាម៉ាក ក៏បានស្នើសុំឲ្យថៃ បញ្ជូនបុរសឈ្មោះ សម សេរី នេះ ទៅកាន់ប្រទេសដាណាម៉ាក ដោយសារតែបុរសនេះ មានសញ្ជាតិដាណាម៉ាក។
សូមរម្លឹកថា លោក សម សេរី ជាប់ពាក់ព័ន្ធនឹងការប៉ុនប៉ងឲ្យមានការផ្ដួលរំលំរាជរដ្ឋាភិបាល និងការរៀបចំគម្រោងប្រព្រឹត្តិអំពើភេវរកម្ម តាមរយៈការបង្កើតរដ្ឋាភិបាលស្រមោល ដោយមានបណ្ដាញ នៅប្រទេសថៃ និងនៅកម្ពុជា។
នៅមុនពិធីបុណ្យចូលឆ្នាំខ្មែរ លោកនាយករដ្ឋមន្រ្តី ហ៊ុនសែន បានប្រកាសជាសាធារណៈនូវផែនការរបស់ឈ្មោះ សម សេរី ដែលរៀបចំបំផ្ទុះនៅវត្តភ្នំ ក្នុងរាជធានីភ្នំពេញ និងនៅខេ្តតសៀមរាប ក្នុងឱកាសពិធីបុណ្យចូលឆ្នាំថ្មី។ ប៉ុន្តែផែនការនោះ ត្រូវបានរាជរដ្ឋាភិបាលកម្ពុជា ទប់ស្កាត់ទាន់ពេលវវេលា៕
