កម្ពុជាបោះឆ្នោតគាំទ្រសេចក្តីសម្រេចរបស់មហាសន្និបាតអ.ស.ប ថ្កោលទោសរុស្ស៊ីយកទឹកដីអ៊ុយក្រែន

ជំហររបស់កម្ពុជានេះ បានធ្វើឡើង ខណៈដែលប្រទេសវៀតណាម ថៃ និងឡាវ ដែលជាប្រទេសជាប់ព្រំដែនកម្ពុជា បានបោះឆ្នោតអនុប្បវាទ។

សូមរម្លឹកថា កាលពីថ្ងៃទី១២ ខែតុលា ឆ្នាំ២០២២ មហាសន្និបាតអង្គការសហប្រជាជាតិ បានបោះឆ្នោតដោយសំឡេងគាំទ្រយ៉ាងច្រើនលើសលប់ ដើម្បីថ្កោលទោសរុស្ស៊ី ចំពោះ “ការប៉ុនប៉ងកាត់យកដោយខុសច្បាប់” នូវតំបន់ចំនួន ៤ របស់ប្រទេសអ៊ុយក្រែន។ មហាសន្និបាតអង្គការសហប្រជាជាតិ ក៏បានទាមទារឱ្យរុស្ស៊ី ដែលបានលើកទ័ពចូលឈ្លានពានអ៊ុយក្រែន ៧ខែមកហើយ ត្រូវលុបចោលនូវផែនការកាត់យកទឹកដីអ៊ុយក្រែននេះ ជាបន្ទាន់។

លទ្ធផលបោះឆ្នោតនៅក្នុងមហាសន្និបាតអង្គការសហប្រជាជាតិ ដែលមានសមាជិកចំនួន១៩៣ប្រទេស រួមមាន៖ ១៤៣ប្រទេស គាំទ្រការថ្កោលទោសរុស្ស៊ី ៥ប្រទេស ជំទាស់មិនឱ្យថ្កោលទោសរុស្ស៊ី ហើយ ៣៥ប្រទេស អនុប្បវាទ៕