លោក សៀង ឡាប្រេស្ស ទីប្រឹក្សារដ្ឋាភិបាល បានបញ្ជាក់ថា ការជំរុញរបស់កម្ពុជានេះ គ្រោងធ្វើឡើង នៅក្នុងកិច្ចប្រជុំស្តីពីឧក្រិដ្ឋកម្មឆ្លងដែន នៅប្រទេសម៉ាឡេស៊ី នាខែកញ្ញាខាងមុខ។
( សំឡេងលោក សៀង ឡាប្រេស )
លោក សៀង ឡាប្រេស្ស ទីប្រឹក្សារដ្ឋាភិបាល និងជាប្រធានកិច្ចប្រជុំមន្ត្រីជាន់ខ្ពស់ស្តីពីឧក្រិដ្ឋកម្មឆ្លងដែនរបស់រាជរដ្ឋាភិបាលកម្ពុជា បានថ្លែងដូច្នេះ នៅក្នុងសិក្ខាសាលា ស្ដីពី ទិសដៅសកម្មភាពទី២ នៃកម្មវិធីផ្សព្វផ្សាយរបស់សហភាពអឺរ៉ុប ស្ដីពី សន្ធិសញ្ញាពាណិជ្ជកម្មអាវុធ កាលពីថ្ងៃទី៥ ខែមិថុនា ឆ្នាំ២០១៨នេះ។
សិក្ខាសាលានេះ សហការរៀបចំដោយសហភាពអឺរ៉ុប ប្រចាំកម្ពុជា ដែលជាម្ចាស់ជំនួយ ដើម្បីពិភាក្សាបន្ថែម ក្នុងការបង្កើតច្បាប់អន្តរជាតិ ដាក់ទោសអ្នករត់ពន្ធអាវុធខុសច្បាប់ និងអំពីគន្លឹះផ្សេងៗនៃយុទ្ធសាស្ត្រទប់ស្កាត់ ចំពោះការរត់ពន្ធនូវអាវុធខុសច្បាប់នេះផងដែរ។
ជាការកត់សម្គាល់ សន្ធិសញ្ញាអន្តរជាតិ ស្តីពី ការជួញដូរអាវុធត្រូវបានមហាសន្និបាតអង្គការសហប្រជាជាតិ អនុម័តជាផ្លូវការ កាលពីថ្ងៃទី២ ខែមេសា ឆ្នំា២០១៣ និងបានចូលជាធរមាន នៅក្នុងខែធ្នូ ឆ្នំា២០១៤។ សន្ធិសញ្ញានេះ ត្រូវបានចុះហត្ថលេខាដោយរដ្ឋាភិបាលចំនួន ១៣០ ប្រទេស។ ក៏ប៉ុន្តែរហូតដល់ខែមិថុនា ឆ្នាំ២០១៨ នេះ ទើបតែមាន ៦០ ប្រទេសប៉ុណ្ណោះ ដែលបានផ្ដល់សច្ចាប័ន យកមកអនុវត្ត៕
