សេចក្តីប្រកាសរបស់ក្រសួងសុខាភិបាល បង្ហាញថា ករណីលាប់ជំងឺកូវីដ១៩ ឡើងវិញនេះ កើតលើបុរសខ្មែរ អាយុ ៤០ឆ្នាំ រស់នៅសង្កាត់ច្រាំងចំរេះ ខណឫស្សីកែវ រាជធានីភ្នំពេញ។ បុរសខ្មែរ កាន់សាសនាឥស្លាមនេះ ទទួលបានលទ្ធផលតេស្តវិជ្ជមានវីរុសកូវីឌ១៩ ដែលគាត់បានលាប់ជំងឺនេះម្តងទៀត បន្ទាប់បីធ្វើតេស្ត ក្រោយពេលគាត់ជាសះស្បើយបាន ១៥ថ្ងៃរួចមក។ នៅពេលនេះ គាត់ត្រូវបានដាក់ឲ្យសម្រាកព្យាបាលនៅមន្ទីរពេទ្យមិត្តភាពខ្មែរសូវៀត។
កាលពីថ្ងៃទី៩មេសា ក្រសួងសុខាភិបាល ក៏បានប្រកាសពីការរកឃើញស្ត្រីជនជាតិចិនម្នាក់ អាយុ ៣០ឆ្នាំ ជាភ្ញៀវទេសចរ និងចង់រកស៊ីបើកហាងនៅកម្ពុជា ដែលស្នាក់នៅបណ្តោះអាសន្ន នៅភ្នំពេញ បានឆ្លងជំងឺកូវីដ១៩ ដោយសារប៉ះពាល់ផ្ទាល់ជាមួយគូសង្សារ ជាបុរសជនជាតិចិន និងស្ត្រីជនជាតិវៀតណាម ដែលផ្ទុកវីរុសកូវីដ១៩។
យ៉ាងណាក៏ដោយ កាលពីថ្ងៃទី៩មេសា ក្រសួងសុខាភិបាលកម្ពុជា ក៏បានប្រកាសថា មានអ្នកជាសះស្បើយពីជំងឺកូវីដ១៩ ចំនួន ៦នាក់ថែមទៀត ដែលនាំឲ្យចំនួនអ្នកជាសះស្បើយពីជំងឺកូវីដ១៩ នៅកម្ពុជា កើនឡើងដល់ ៦៨នាក់ ត្រូវជាជាង ៥៧% ធៀបនឹងចំនួនអ្នកមានវីរុសកូវីដ១៩ ទាំងអស់នៅកម្ពុជា ចំនួន ១១៨នាក់។ នៅកម្ពុជា ពុំទាន់មានអ្នកជំងឺកូវីដ១៩ ណាម្នាក់ បាត់បង់ជីវិតនៅឡើយទេ៕
