កងទ័ពកម្ពុជា និងកងទ័ពចិន នឹងធ្វើលំហាត់សមយុទ្ធរួមគ្នា ដែលមានឈ្មោះថា “នាគមាស” ចាប់ពីថ្ងៃទី១៧ ដល់ថ្ងៃទី៣០ ខែមីនា ឆ្នាំ២០១៨ ក្នុងតំបន់ភូមិសាស្រ្តភ្នំធំម្រះព្រៅ ក្នុងខេត្តកំពង់ស្ពឺ។
សមយុទ្ធយោធា នាគមាស ឆ្នាំ២០១៨នេះ នឹងត្រូវប្រើប្រាស់ ឧទ្ធម្ភាគចក្រ សរុបចំនួន ៩គ្រឿង ក្នុងនោះ ឧទ្ធម្ភាគចក្រ ខាងកងទ័ពកម្ពុជា មានចំនួន ៦គ្រឿង និងភាគីចិន មានឧទ្ធម្ភាគចក្រ ចំនួន ៣គ្រឿង ដោយបំពាក់កាំជ្រូចបាញ់ចំគោលដៅថែមទៀតផង។ ក្រៅពីនោះ ក៏មានការប្រើប្រាស់នូវយោធទ្ធោបករណ៍ផ្សេងទៀត រួមមាន កាំភ្លើងត្បាល់ រថពាសដែក ថ្មើរជើង និងសព្វាវុធទំនើបផ្សេង។
នៅក្នុងលំហាត់សមយុទ្ធនេះ មានការចូលរួមពីកងទ័ពរំដោះប្រជាជនចិនចំនួន ២១៦នាក់ និងកងយោធពលខេមរភូមិន្ទ ៣០៧នាក់ ផ្សេងពីនេះ មានកងទ័ព ២៦៧ នាក់ទៀត ជាអ្នកបម្រើអោយលំហាត់សមយុទ្ធ ដូចជា ក្រុមការងារវិស្វកម្ម ក្រុមដឹកជញ្ជូន ក្រុមបញ្ជូនសារ និងក្រុមអ្នកបកប្រែ ជាដើម។
កាលពីរសៀលថ្ងៃទី១៣ ខែមីនា ឧទ្ធម្ភាគចក្ររបស់កងទ័ពចិន ៣គ្រឿង ដែលនឹងត្រូវចូលរួមក្នុងសមយុទ្ធនេះ បានមកដល់មូលដ្ឋានទ័ពអាកាស ក្នុងរាជធានីភ្នំពេញហើយ។
ទន្ទឹមនឹងនេះ ក៏មានការចល័តយោធទ្ធោបករណ៍នានា បម្រើអោយលំហាត់សមយុទ្ធ ដែលលោក នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នៃកងយោធពលខេមរភូមិន្ទ និងជាប្រធានគណៈកម្មការដឹកនាំធ្វើលំហាត់សមយុទ្ធ បានប្រកាសជូនដំណឹងដល់ប្រជាពលរដ្ឋ សូមកុំមានការភ្ញាក់ផ្អើល ចំពោះសំឡេងស្នូរផ្ទុះ និងការចល័តយោធទ្ធោបករណ៍នានា ក្នុងតំបន់ភូមិសាស្រ្តភ្នំធំម្រះព្រៅ ក្នុងខេត្តកំពង់ស្ពឺ ចាប់ពីថ្ងៃទី១៧ ដល់ថ្ងៃទី៣១ ខែមីនាខាងមុខនេះ៕
