កាលពីដើមខែធ្នូនេះ ក្រុមអ្នកតំណាងរាស្រ្តគណបក្សសង្រ្គោះជាតិ បានធ្វើលិខិត១ច្បាប់ តាមរយៈប្រធានរដ្ឋសភា ជូនលោកនាយករដ្ឋមន្ត្រី ហ៊ុនសែន ដើម្បីស្នើឲ្យរដ្ឋមន្រ្តីក្រសួងសុខាភិបាល លោក ម៉ម ប៊ុនហេង ចូលឆ្លើយបំភ្លឺផ្ទាល់មាត់ ជូនរដ្ឋសភា អំពីបញ្ហាមួយចំនួនពាក់ព័ន្ធនឹងវិស័យសុខាភិបាល។
បញ្ហាទាំងនោះ រួមមាន៖ ភាពមិនប្រក្រតីក្រោមការទទួលខុសត្រូវរបស់ក្រសួងសុខាភិបាល ការផ្តល់សេវាមិនត្រឹមត្រូវនៅតាមមន្ទីរពេទ្យរដ្ឋ និងឯកជន វិធានការក្រសួងក្នុងការពង្រឹងគុណភាពជំនាញពេទ្យ និងការអនុវត្តក្រមសីលធម៌ ការចែកចាយ និងគ្រប់គ្រងសម្ភារពេទ្យ និងថ្នាំពេទ្យ ការគ្រប់គ្រងមន្ទីរពេទ្យឯកជន និងរថយន្តសង្រ្គោះបន្ទាន់ និងវិធានការក្នុងការផ្តល់សេវាសុខភាព ដល់ពលរដ្ឋក្រីក្រឲ្យមានប្រសិទ្ធភាព ការគ្រប់គ្រងការផលិត និងការនាំចូលថ្នាំពេទ្យ និងការb គ្រប់គ្រងឱសថថ្នាំពេទ្យក្លែងក្លាយ ជាដើម៕
