លោក សុន ឆ័យ ប្រធានក្រុមអ្នកតំណាងរាស្ត្រគណបក្សសង្គ្រោះជាតិបានប្រកាសថា ថ្នាក់ដឹកនាំគណបក្សប្រឆាំងនេះកំពុងពិចារណាក្នុងការចូលរួមប្រជុំសភាពេញអង្គឡើងវិញ នៅខែក្រោយ ក្រោមហេតុផលថាដើម្បីដោះស្រាយបញ្ហាមួយចំនួនដែលកំពុងកើតមាន។
លោក សុន ឆ័យ បានប្រកាសដូច្នេះ បន្ទាប់ពីលោករួមទាំងថ្នាក់ដឹកនាំគណបក្សសង្គ្រោះជាតិជាច្រើននាក់ទៀត បានចូលជួបសួរសុខទុក្ខសកម្មជនគណបក្សសង្គ្រោះជាតិ ដែលកំពុងជាប់ឃុំឃាំងនៅពន្ធនាគារព្រៃស ក្នុងរាជធានីភ្នំពេញ។
សូមរម្លឹកថា តំណាងរាស្ត្រគណបក្សសង្គ្រោះជាតិ បានធ្វើពហិការ ចាប់តាំងពីថ្ងៃទី២៧ ខែឧសភា ឆ្នាំ២០១៦ នៅពេលដែលលោកកឹមសុខា ត្រូវបានសមត្ថកិច្ចតាមរកចាប់ខ្លួន។
យ៉ាងណាក៏ដោយ កាលពីថ្ងៃចន្ទ ទី១៩ ខែកញ្ញា ឆ្នាំ២០១៦ លោកនាយករដ្ឋមន្ត្រី ហ៊ុន សែន បានថ្លែងការណ៍បញ្ជូនទៅកាន់គណបក្សសង្គ្រោះជាតិឲ្យចូលសភាឡើងវិញ ដើម្បីពិភាក្សាដោះស្រាយបញ្ហា ដែលកំពុងកើតមាន ជាជាងការប្រកាសគម្រាមធ្វើបាតុកម្ម៕
Share
