កាលពីព្រឹកថ្ងៃទី៤ ខែវិច្ឆិកា លោកកឹមសុខា ប្រធានស្តីទីគណបក្សសង្គ្រោះជាតិ បានបង្ហាញទស្សនៈ “ជុំវិញការបោះឆ្នោតប្រធានាធិបតីនៅសហរដ្ឋអាមេរិក” ដោយលោកមិនបានបង្ហាញជំហរគាំទ្របេក្ខភាពប្រធានាធិបតីអាមេរិកមួយណាទេ។
នៅលើហ្វេសប៊ុកផ្លូវការ លោកកឹមសុខា បានសរសេរថា "ខ្ញុំយល់ឃើញថា សម្រាប់បុគ្គលម្នាក់ៗ ផ្ទាល់ខ្លួន យើងអាចបង្ហាញពីការគាំទ្រ ឬ មិនគាំទ្របេក្ខជនប្រធានាធិបតីណាម្នាក់នៃការបោះឆ្នោតនៅសហរដ្ឋអាមេរិក។ សម្រាប់ខ្លួនខ្ញុំផ្ទាល់ ខ្ញុំគាំទ្រនូវលទ្ធផលនៃការបោះឆ្នោតនាពេលខាងមុខ ដែលឆ្លុះបញ្ចាំងពីឆន្ទៈរបស់ប្រជាពលរដ្ឋអាមេរិក"។
លោកកឹមសុខា បន្ថែមថា "ក៏ប៉ុន្ដែ ខ្ញុំយល់ឃើញថា ទោះបីជាបេក្ខជនណាក៏ដោយ ជាប់ឆ្នោតជាប្រធានាធិបតីនៃប្រទេសមហាអំណាចមួយនេះ ក្នុងនាមស្ថាប័នរដ្ឋ ក៏ដូចជាក្នុងនាមគណបក្សនយោបាយ យើងគួរបន្ដកិច្ចសហប្រតិបត្ដិការជាមួយគ្នាឲ្យកាន់តែល្អប្រសើរឡើងដើម្បីផលប្រយោជន៍ប្រទេស ប្រជាពលរដ្ឋខ្មែរ និងផលប្រយោជន៍ពិភពលោក"។
ទស្សនៈរបស់លោកកឹមសុខាខាងលើនេះ បានធ្វើឡើងតែមួយថ្ងៃប៉ុណ្ណោះ ក្រោយពីលោកនាយករដ្ឋមន្ត្រី ហ៊ុន សែន បានប្រកាសជំហររបស់លោកជាសាធារណៈចំពោះមុខនគរបាលជាតិ កាលពីព្រឹកថ្ងៃទី៣ ខែវិច្ឆិកា ពីការគាំទ្របេក្ខភាពរបស់លោក ដូណាល់ ត្រាំ ជាប្រធានាធិបតីអាមេរិក។
លោកនាយករដ្ឋមន្ត្រី ហ៊ុនសែន បានប្រកាសថា លោកចង់ឲ្យលោក ដូណាល់ត្រាំ ឈ្នះឆ្នោតនៅសហរដ្ឋអាមេរិក ពេលនោះពិភពលោកអាចនឹងមានការប្រែប្រួល មិនមានសង្គ្រាម ហើយមានសភាពការណ៍នឹងល្អប្រសើរឡើងវិញ ដោយសារតែលោកដូណាល់ត្រាំជាអ្នកជំនួញ។
( សំឡេងលោកនាយករដ្ឋមន្ត្រី ហ៊ុនសែន )
រីឯលោក សមរង្ស៊ី ប្រធានគណបក្សសង្គ្រោះជាតិ ដែលកំពុងរស់នៅក្រៅប្រទេស បានថ្លែងប្រាប់កាសែតនៅកម្ពុជាថា លោកគាំទ្រលើបេក្ខភាពលោកស្រី ហ៊ីលឡារី គ្លីតុន ជាប្រធានាធិបតីអាមេរិក។
សូមបញ្ជាក់ថា ការបោះឆ្នោតជ្រើសរើសប្រធានាធិបតីអាមេរិក នឹងធ្វើឡើង នៅថ្ងៃទី៨ ខែវិច្ឆិកា ឆ្នាំ២០១៦។ មានបេក្ខជនពីររូបកំពុងប្រជែងគ្នា គឺលោកស្រី ហ៊ីឡារី គ្លីនតុន មកពីគណបក្សប្រជាធិបតេយ្យ និងលោក ដូណាល់ ត្រាំ មកពីគណបក្សសាធារណរដ្ឋ៕
