តាមអនុក្រឹត្យ រាជរដ្ឋាភិបាលកម្ពុជា បានសម្រេចកាត់បន្ថយថ្ងៃឈប់សម្រាក ក្នុងព្រះរាជពិធីបុណ្យចម្រើន ព្រះជន្មព្រះមហាក្សត្រ សម្ដេចព្រះបរមនាថ នរោត្ដម សីហមុនី ពី ៣ ថ្ងៃ មកនៅត្រឹមចំនួន ១ថ្ងៃ និងបានប្រកាសលែងឱ្យឈប់សម្រាក ក្នុងពិធីបុណ្យ និងទិវាចំនួន ៥ រួមមាន៖ ១. ពិធីបុណ្យមាឃបូជា ថ្ងៃ១៥ កើត ខែមាឃ ២. ទិវាជាតិនៃការចងចាំ ថ្ងៃទី២០ ខែឧសភា ៣. ទិវាកុមារអន្តរជាតិ ថ្ងៃទី០១ ខែមិថុនា ៤. ទិវារំឭកខួប នៃកិច្ចព្រមព្រៀងសន្តិភាពទីក្រុងប៉ារីស ថ្ងៃ២៣ តុលា និង៥. ទិវាសិទ្ធិមនុស្សអន្តរជាតិ ថ្ងៃ១០ធ្នូ។
លោក ប៉ាវ ស៊ីណា ប្រធានសហជីពកម្មករ បានកត់សម្គាល់ថា ការសម្រេចរបស់រាជរដ្ឋាភិបាល ក្នុងការកាត់បន្ថយថ្ងៃឈប់សម្រាកសាធារណៈប្រចាំឆ្នាំ២០២០ បានធ្វើឲ្យបុគ្គលិកនិយោជិត ពិសេសកម្មករកាត់ដេរ បាត់បង់ផលប្រយោជន៍។ ពោលគឺ ៦ថ្ងៃ ដែលរាជរដ្ឋាភិបាល កាត់បន្ថយនោះ បើនៅឆ្នាំ២០១៩នេះ គឺបុគ្គលិកយោជិត កម្មករកាត់ដេរ មិនធ្វើការ ក៏មានប្រាក់ឈ្នួលដែរ តែសម្រាប់ ឆ្នាំ២០២០ គឺលែងទទួលបានហើយ។
ម្យ៉ាងទៀត លោកប៉ាវស៊ីណា ក៏បានលើកឡើងថា ការសម្រេចរបស់រាជរដ្ឋាភិបាល ដែលបានសម្រេចលុបចោលថ្ងៃឈប់សម្រាកបុណ្យជាតិ នៅថ្ងៃ២៣តុលា ដែលជាខួបថ្ងៃចុះហត្ថលេខាលើកិច្ចព្រមព្រៀងសន្តិភាពទីក្រុងប៉ារីស ព្រមទាំងថ្ងៃទី១០ធ្នូ ទិវាសិទ្ធិមនុស្សអន្តរជាតិ ដោយលុបចេញពីថ្ងៃឈប់សម្រាកបុណ្យជាតិ ប្រចាំឆ្នាំ២០២០ គឺជាការមិនផ្តល់តម្លៃដល់ការប្រឹងប្រែងក្នុងការស្វែងរកសន្តិភាព សម្រាប់ប្រទេសកម្ពុជា និងជាការមិនឲ្យតម្លៃដល់សិទ្ធិមនុស្ស។
លោក ប៉ាវ ស៊ីណា៖ ( សំឡេង )
យ៉ាងណាក៏ដោយ ការសម្រេចរបស់រាជរដ្ឋាភិបាលកម្ពុជា កំណត់ថ្ងៃឈប់សម្រាកប្រចាំឆ្នាំ២០២០ ដោយកាត់បន្ថយថ្ងៃឈប់សម្រាក មកត្រឹមតែ ២២ថ្ងៃនេះ ត្រូវបានធ្វើឡើង តាមការស្នើសុំរបស់វិស័យឯកជន តាមរយៈសមាគមរោងចក្រកាត់ដេរនៅកម្ពុជា GMAC ក្នុងវេទិការាជរដ្ឋាភិបាល និងវិស័យឯកជន កាលពីខែមីនា ឆ្នាំ២០១៩។ ពោលគឺការកាត់បន្ថយថ្ងៃឈប់សម្រាកនេះ ដើម្បីជំរុញនូវកំណើននៃការវិនិយោគ និងធានាឱ្យបាននូវលទ្ធភាពប្រកួតប្រជែងរបស់កម្ពុជា នៅក្នុងទីផ្សារអន្តរជាតិ។
កម្ពុជាជាប្រទេស មានថ្ងៃឈប់សម្រាកច្រើនជាងគេ រហូតដល់ ២៨ថ្ងៃ នៅឆ្នាំ២០១៩ នេះ ខណៈប្រទេសស្រីលង្កា ឈប់សម្រាក ២៥ថ្ងៃ ឥណ្ឌា និងកាហ្សាក់ស្ថាន មានចំនួន ២១ថ្ងៃ៕
