ក្នុងនោះ គេឃើញអ្នកលេងហ្វេសប៊ុក ពិសេសក្រុមយុវជនមួយចំនួន បានដាក់កម្រងរូបថត នៅ Profile Facebook ថា «យើងទៅបោះឆ្នោត ដើម្បីរក្សាសន្តិភាព និងស្ថិរភាពជាតិ» ឬក៏ពាក្យថា «ខ្ញុំទៅបោះឆ្នោត ព្រោះខ្ញុំស្រឡាញ់ប្រទេសខ្ញុំ» ជាដើម។
យ៉ាងណាក៏ដោយ នៅលើហ្វេសប៊ុកដដែល ក្រុមអតីតអ្នកនយោបាយ និងសកម្មជនអ្នកគាំទ្រអតីតគណបក្សសង្គ្រោះជាតិវិញ បានលើកឡើងថា ការទៅ ឬមិនទៅបោះឆ្នោត ជាសិទ្ធិរបស់ប្រជាពលរដ្ឋខ្មែរ ដូចមានចែងក្នុងច្បាប់រដ្ឋធម្មនុញ្ញ។ ដូច្នេះ ចង់ទៅ ឬមិនទៅបោះឆ្នោត នៅថ្ងៃទី២៩ ខែកក្កដាខាងមុខនេះ គឺជាសិទ្ធិសម្រេចរបស់ប្រជាពលរដ្ឋខ្មែរ ដោយមិនមានជនណាមួយ អាចបង្ខិតបង្ខំឡើយ ហើយបើទៅបោះឆ្នោត និងសម្រេចបោះឆ្នោតឲ្យគណបក្សណា ក៏ជាសិទ្ធិរបស់ប្រជាពលរដ្ឋ ព្រោះជាការបោះឆ្នោតសម្ងាត់ មិនមានជនណាមួយដឹងថា បុគ្គលណាមួយ បោះឆ្នោតឲ្យគណបក្សណានោះទេ។
ចរន្តហ្វេសប៊ុក ទៅបោះឆ្នោត ឬមិនទៅបោះឆ្នោតនេះ បានកើតឡើងភ្លាមៗ ក្រោយពីគ.ជ.ប បានបញ្ចប់ការទទួលចុះឈ្មោះគណបក្សនយោបាយ ដើម្បីចូលរួមប្រកួតប្រជែងការបោះឆ្នោត កាលពីថ្ងៃទី១៤ ខែឧសភា។ ក្នុងនោះ តាមគជប មានគណបក្សចំនួន ២០ បានចុះឈ្មោះ ដាក់បេក្ខជនឈរឈ្មោះ ចូលរួមប្រកួតប្រជែងការបោះឆ្នោតជ្រើសតាំងតំណាងរាស្ត្រ នីតិកាលទី៦ នាថ្ងៃទី២៩ ខែកក្កដា ឆ្នាំ២០១៨ នេះ។
លោក ឌឹម សុវណ្ណារុំ សមាជិក និងជាអ្នកនាំពាក្យគ.ជ.ប បានបញ្ជាក់បន្ថែមពីនីតិវិធី នៃការពិនិត្យលើសំណុំឯកសារ ដែលគណបក្សនយោបាយ បានចុះឈ្មោះចូលរួមប្រកួតប្រជែងការបោះឆ្នោត យ៉ាងដូច្នេះថា៖
( សំឡេងលោកឌឹមសុវណ្ណារុំ )
យ៉ាងណាក៏ដោយ ដោយសារតែការចុះឈ្មោះបោះឆ្នោត លើកនេះ មិនមានអតីតគណបក្សសង្គ្រោះជាតិ ចូលរួម ព្រោះអតីតគណបក្សប្រឆាំងនេះ ត្រូវបានតុលាការកំពូល របស់ប្រទេសកម្ពុជា សម្រេចរំលាយចោល កាលពីខែវិច្ឆិកា ឆ្នាំ២០១៧ ហើយដកហូតយកអាសនៈនៅរដ្ឋសភា នៅឃុំសង្កាត់ និងនៅក្រុមប្រឹក្សារាជធានីខេត្ត ស្រុកក្រុង និងខណ្ឌ ទូទាំងប្រទេស នោះ ទើបអ្នកនយោបាយរបស់អតីតគណបក្សសង្គ្រោះជាតិ បានចេញសេចក្ដីថ្លែងការណ៍ ថ្កោលទោស គ.ជ.ប ក្រោយពីគជប ឈប់ទទួលពាក្យចុះឈ្មោះគណបក្សនយោបាយ កាលពីថ្ងៃទី១៤ឧសភា។
ក៏ប៉ុន្តែអ្នកនាំពាក្យគជប ១រូបទៀត និងជាសមាជិកគជប លោក ហង្ស ពុទ្ធា ចាត់ទុកការលើកឡើងរបស់ថ្នាក់ដឹកនាំនៃអតីតគណបក្សសង្គ្រោះជាតិ ថាកំពុងដើរបញ្ច្រាស់ច្បាប់ និងលទ្ធិប្រជាធិបតេយ្យ ហើយថា គជប អនុវត្តតាមច្បាប់ ហើយច្បាប់ និងប្រជាធិបតេយ្យនៅកម្ពុជា មិនមែនជាកម្មសិទ្ធិផ្ដាច់មុខរបស់គណបក្ស ឬបុគ្គលណាមួយឡើយ។
ទោះបីជាអតីតអ្នកនយោបាយ គណបក្សសង្គ្រោះជាតិ បានធ្វើយុទ្ធនាការនៅក្រៅប្រទេស ទាមទារឲ្យសហគមន៍អន្តរជាតិ អន្តរាគមន៍លើរាជរដ្ឋាភិបាលកម្ពុជា ដឹកនាំដោយលោកនាយករដ្ឋមន្ត្រី ហ៊ុន សែន អនុញ្ញាតឲ្យគណបក្សប្រឆាំងនេះ បានចូលរួមការបោះឆ្នោត និងដោះលែងលោកកឹមសុខា ព្រមទាំងអ្នកនយោបាយដទៃទៀត របស់អតីតគណបក្សសង្គ្រោះជាតិ មានសិទ្ធិចូលរួមធ្វើនយោបាយឡើងវិញក៏ដោយ ក៏នៅពេលនេះ រដ្ឋាភិបាល ពិសេសគជប នៅតែបន្តដំណើរការរៀបចំការបោះឆ្នោតជ្រើសតាំងតំណាងរាស្ត្រ នីតិកាលទី៦ នាថ្ងៃទី២៩ ខែកក្កដា ដោយគ្មានកែប្រែ។ រីឯសហគមន៍អន្តរជាតិ ដូចជា ជប៉ុន ចិន និងរុស្ស៊ី ជាដើម បានគាំទ្រដំណើរការបោះឆ្នោតនៅកម្ពុជា ទោះបីជាសហរដ្ឋអាមេរិក និងសហភាពអឺរ៉ុប បានដកខ្លួន ចេញពីគជប ក្រោយពីការសម្រេចរំលាយគណបក្សសង្គ្រោះជាតិ កាលពីចុងឆ្នាំ២០១៧ ក៏ដោយ៕
