លោក Asang Wankhede គឺជាមេធាវីប្រឆាំងការរើសអើង ហើយមកពីសហគមន៍ Dalit — ក្រុមមនុស្សដែលនៅក្នុងប្រទេសឥណ្ឌា ត្រូវបានគេចាត់ទុកថាជា «មនុស្សដែលមិនត្រូវទៅប៉ះពាល់»។
លោកបាននិយាយថា «វាជាទម្រង់នៃការចាត់ថ្នាក់សង្គម ដែលផ្អែកលើជំនឿនៃភាពបរិសុទ្ធ សុទ្ធស្អាតស្អំ និងភាពប្រឡាក់ប្រឡូក»។
ដោយសារដើមកំណើតរបស់អ្នក អ្នកត្រូវបានគេកំណត់ឋានៈជាក់លាក់មួយនៅក្នុងសង្គម ហើយឋានៈនោះមិនអាចលុបបំបាត់បានឡើយ។
លោក Wankhede បានដឹកនាំការស្រាវជ្រាវលើការរើសអើងវណ្ណៈនៅក្នុងប្រទេសអូស្ត្រាលី និងបាននិយាយជាមួយប្រជាជន Dalit នៅទូទាំងទីក្រុងធំៗរបស់ប្រទេសអូស្ត្រាលី។
លោកបានរកឃើញរឿងរ៉ាវទូទៅនៃការប្រកាន់វណ្ណៈនៅគ្រប់វ័យ និងគ្រប់ទីកន្លែង រួមទាំងសាលារៀន សាកលវិទ្យាល័យ និងកន្លែងធ្វើការ។
ការរើសអើងវណ្ណៈអាចដំណើរការដោយស្ងាត់ស្ងៀមនៅក្នុងប្រទេសអូស្ត្រាលីរហូតមកដល់ពេលនេះ។
ប៉ុន្តែគណៈកម្មការសិទ្ធិមនុស្សអូស្ត្រាលី និងស្ថាប័នផ្សេងទៀតកំពុងចាប់ផ្តើមទទួលស្គាល់វណ្ណៈ និងផ្តល់ផ្លូវឆ្ពោះទៅរកការការពារផ្នែកច្បាប់ប្រឆាំងនឹងទម្រង់នៃការរើសអើងនេះ។
របាយការណ៍ស្វែងយល់ពីភាពស្អប់ខ្ពើម -“Understanding Hate” វគ្គនេះ ក្រលែកមើលពីរបៀបដែលការរើសអើងវណ្ណៈកើតឡើងនៅក្នុងប្រទេសអូស្ត្រាលី និងរបៀបដែលមនុស្សមួយចំនួននៅក្នុងសហគមន៍អាស៊ីខាងត្បូងកំពុងតវ៉ា។
