ជំរឿនឆ្នាំ ២០២៦ គឺនៅថ្ងៃអង្គារ ទី១១ ខែសីហា ហើយគេនឹងរាប់មនុស្សគ្រប់រូបនៅក្នុងប្រទេសអូស្ត្រាលីនៅយប់នេះ។ ទិន្នន័យជំរឿនត្រូវបានប្រើដើម្បីយល់ដឹងពីទីកន្លែងដែលប្រជាជនរស់នៅ ភាសាដែលប្រើនៅផ្ទះ ការគាំទ្រដែលសហគមន៍ត្រូវការ និងរបៀបដែលប្រទេសអូស្ត្រាលីកំពុងផ្លាស់ប្តូរក្នុងនាមជាប្រជាជាតិមួយ។ ការដែលត្រូវបានគេរាប់ ជួយធានាថាអ្នកបានតំណាងឱ្យសហគមន៍ និងវប្បធម៌របស់អ្នក។ នេះជាអ្វីដែលអ្នកត្រូវដឹងអំពីការបំពេញជំរឿនសម្រាប់ក្រុមគ្រួសាររបស់អ្នក។
Key Points
- ការធ្វើជំរឿនគឺជាកាតព្វកិច្ចសម្រាប់មនុស្សគ្រប់គ្នានៅក្នុងប្រទេសអូស្ត្រាលី នៅយប់ជំរឿន ថ្ងៃទី១១ ខែសីហា ឆ្នាំ២០២៦។
- ចម្លើយរបស់អ្នក ជួយដល់អ្នកផ្តល់សេវា ឱ្យយល់ពីតម្រូវការរបស់អ្នកនាពេលបច្ចុប្បន្ន និងរបៀបដែលតម្រូវការទាំងនោះអាចផ្លាស់ប្តូរនាពេលអនាគត។
- ព័ត៌មានផ្ទាល់ខ្លួនទាំងឡាយណាដែលអ្នកផ្តល់ឱ្យ នឹងត្រូវបានរក្សាទុកដោយសុវត្ថិភាព ហើយមិនអាចប្រើដើម្បីកំណត់អត្តសញ្ញាណអ្នកបានឡើយ។
- ទិន្នន័យជំរឿនផ្តល់ព័ត៌មានដល់ការសម្រេចចិត្តអំពីសេវាកម្ម និងការគាំទ្រដែលសហគមន៍របស់អ្នកទទួលបាន។
- តើការធ្វើជំរឿនគ្រាន់តែនិយាយអំពីការរាប់ចំនួនមនុស្សមែនដែរឬទេ?
- តើអ្នកណាដែលត្រូវតែបំពេញបែបបទជំរឿន?
- ចុះបើខ្ញុំមិននៅផ្ទះ នៅយប់ធ្វើជំរឿន?
- តើគេនឹងសួរសំណួរអ្វីខ្លះ?
- ចុះបើខ្ញុំមានការព្រួយបារម្ភអំពីរបៀបដែលព័ត៌មានផ្ទាល់ខ្លួនរបស់ខ្ញុំត្រូវបានគេប្រើប្រាស់?
- ហេតុអ្វីបានជាវាសំខាន់ក្នុងការផ្តល់ចម្លើយត្រឹមត្រូវនៅក្នុងជំរឿន?
- តើទិន្នន័យជំរឿនជួយដល់សហគមន៍ពហុវប្បធម៌យ៉ាងដូចម្តេច?
- តើមានជំនួយគាំទ្រដែរឬទេ?
តើការធ្វើជំរឿនគ្រាន់តែនិយាយអំពីការរាប់ចំនួនមនុស្សមែនដែរឬទេ?
រៀងរាល់ប្រាំឆ្នាំម្តង ការិយាល័យស្ថិតិអូស្ត្រាលី (ABS) រាប់ចំនួនមនុស្ស និងគ្រួសារនីមួយៗនៅក្នុងប្រទេសអូស្ត្រាលី។ នេះគឺជាការធ្វើជំរឿនប្រជាជន និងលំនៅឋាន ដែលត្រូវបានគេស្គាល់យ៉ាងសាមញ្ញថាជាជំរឿន។
ព័ត៌មានដែលប្រមូលបានជួយកំណត់រចនាសម្ព័ន្ធសេវាកម្មដែលតំបន់ ឬសហគមន៍របស់អ្នកទទួលបាន។
អ្នកនាំពាក្យខាងផ្នែកជំរឿនថ្នាក់ជាតិរបស់ការិយាល័យស្ថិតិអូស្រ្តាលី លោកស្រី Emily Walter មានប្រសាសន៍ថា ការធ្វើជំរឿនគឺជាការប្រមូលទិន្នន័យដ៏ធំបំផុតនៅក្នុងប្រទេសអូស្ត្រាលី និងផ្តល់នូវស្ថិតិដ៏មានតម្លៃបំផុតមួយចំនួនរបស់ប្រទេសនេះ។
លោកស្រីនិយាយថា "វាជារូបភាពសង្ខេបអំពីយើងជានរណា... និងបង្ហាញពីរបៀបដែលយើងកំពុងផ្លាស់ប្តូរតាមពេលវេលា។"
"ជំរឿនសួរសំណួរអំពីសុខភាព ការអប់រំ សាវតារវប្បធម៌ ការងារ និងអ្វីៗផ្សេងទៀត ដែលទាំងអស់នេះផ្តល់នូវរូបភាពដ៏សម្បូរបែបនៃសមាសភាពសេដ្ឋកិច្ច សង្គម និងវប្បធម៌របស់ប្រទេសអូស្ត្រាលី” ។
ទិន្នន័យជំរឿនជួយធានាថាសេវាកម្ម និងហេដ្ឋារចនាសម្ព័ន្ធត្រឹមត្រូវ មានសម្រាប់បុគ្គល ក្រុមគ្រួសារ និងសហគមន៍ នៅកន្លែងណា និងពេលវេលាណាដែលពួកគេត្រូវការ។ នេះរួមបញ្ចូលទាំងសេវាកម្មភាសា សាលារៀន ការថែទាំសុខភាព កម្មវិធីសហគមន៍ ការដឹកជញ្ជូនសាធារណៈ និងការគាំទ្រការតាំងទីលំនៅ។
តើអ្នកណាត្រូវតែបំពេញបែបបទជំរឿន?
មនុស្សគ្រប់រូបនៅក្នុងប្រទេសអូស្ត្រាលីនៅយប់ធ្វើជំរឿន ថ្ងៃទី ១១ ខែសីហា ឆ្នាំ ២០២៦ ត្រូវបានគេរាប់បញ្ចូល។
ការបំពេញបែបបទជំរឿនគឺជាកាតព្វកិច្ច។ នេះមានន័យថា គ្រួសារនីមួយៗត្រូវតែចូលរួម ហើយមនុស្សគ្រប់រូបត្រូវតែរាប់បញ្ចូលក្នុងបែបបទជំរឿន។
លោកស្រី Walter មានប្រសាសន៍ថា "នោះរួមបញ្ចូលទាំងនិស្សិតអន្តរជាតិ អ្នកមកលេង អ្នកកាន់ទិដ្ឋាការនានា និងទារក។ មនុស្សមួយចំនួនខកខានមិនបានរាប់ទារកចូលនៅក្នុងបែបបទជំរឿនរបស់ពួកគេទេ!"។
នៅពេលបំពេញជំរឿនសម្រាប់គ្រួសាររបស់អ្នក អ្នកត្រូវរាប់បញ្ចូលមនុស្សគ្រប់គ្នាដែលកំពុងស្នាក់នៅក្នុងផ្ទះរបស់អ្នកនៅយប់ជំរឿន។
ចុះបើខ្ញុំមិននៅផ្ទះ នៅយប់ធ្វើជំរឿន?
ប្រសិនបើអ្នកនៅបរទេស នៅថ្ងៃទី ១១ ខែសីហា ឆ្នាំ២០២៦ អ្នកមិនចាំបាច់បំពេញបែបបទធ្វើជំរឿនទេ។
ប៉ុន្តែប្រសិនបើអ្នកធ្វើដំណើរនៅក្នុងប្រទេសអូស្រ្តាលី ឧទាហរណ៍ ទៅបោះតង់ ឬស្នាក់នៅផ្ទះមិត្តភក្តិ អ្នកត្រូវតែ បំពេញបែបបទធ្វើជំរឿន នៅកន្លែងណាក៏ដោយដែលអ្នកស្នាក់នៅ។ ជំរឿនក៏រួមបញ្ចូលផងដែរ នូវសំណួរអំពីកន្លែងដែលអ្នករស់នៅតាមធម្មតា។
អ្នកមិនចាំបាច់បំពេញវានៅយប់ធ្វើជំរឿនពិតប្រាកដនោះទេ ប៉ុន្តែចម្លើយរបស់អ្នក ត្រូវតែឆ្លុះបញ្ចាំងពីកន្លែងដែលអ្នកស្ថិតនៅ នៅថ្ងៃទី ១១ ខែសីហា ឆ្នាំ២០២៦។ អ្នកអាចបំពេញបានភ្លាមៗ នៅពេលដែលអ្នកទទួលបានការណែនាំរបស់អ្នក ប្រសិនបើអ្នកដឹងថា អ្នកនឹងនៅទីណានៅយប់ធ្វើជំរឿន។
តើគេនឹងសួរសំណួរអ្វីខ្លះ?
នៅប៉ុន្មានថ្ងៃ មុនឈានដល់យប់ធ្វើជំរឿន ក្រុមគ្រួសារភាគច្រើននឹងទទួលបានលិខិតមួយច្បាប់ពន្យល់ពីរបៀបបំពេញបែបបទជំរឿនតាមអនឡាញ។ គ្រួសារខ្លះនឹងទទួលបានបែបបទជាក្រដាស។
លោកស្រី Walter មានប្រសាសន៍ថា ជំរឿនរួមមានសំណួរអំពីសុខភាព ការអប់រំ ការងារ និងប្រធានបទផ្សេងៗទៀត ដែលរួមគ្នាគូររូបភាពទូលំទូលាយអំពីក្រុមគ្រួសារ និងសហគមន៍មួយ។
“សំណួរដូចជា តើមនុស្សម្នាក់មានដើមកំណើតជាជនជាតិដើម Aboriginal និងអ្នកកោះ Torres Strait ដែរឬទេ ភាសាផ្សេងក្រៅពីភាសាអង់គ្លេសដែលនិយាយនៅផ្ទះ ប្រទេសកំណើត និងប្រទេសកំណើតរបស់ឪពុកម្តាយ ពូជពង្ស សាសនា និងឆ្នាំដែលមកដល់ប្រទេសអូស្ត្រាលី ប្រធានបទប្រភេទនោះ”។
ចុះបើខ្ញុំមានការព្រួយបារម្ភអំពីរបៀបដែលព័ត៌មានផ្ទាល់ខ្លួនរបស់ខ្ញុំត្រូវបានគេប្រើប្រាស់?
មានវិធានការបង្ការដើម្បីការពារឯកជនភាពរបស់អ្នក។
ជំរឿនមិនមែននិយាយអំពីបុគ្គលម្នាក់ៗទេ ប៉ុន្តែនិយាយអំពីព័ត៌មានពីប្រជាជនទាំងអស់។
ជំរឿនសួរ ឈ្មោះ និងអាសយដ្ឋានរបស់អ្នក ដើម្បីគាំទ្រដល់គុណភាពទិន្នន័យ រួមទាំងទិន្នន័យត្រឹមត្រូវសម្រាប់តំបន់ផ្សេងៗគ្នា។ ឈ្មោះត្រូវបានញែកចេញពីព័ត៌មានលម្អិតផ្សេងទៀត នៅដើមដំបូងនៃដំណើរការនេះ។
យើងមិនត្រូវបានអនុញ្ញាតដោយស្របច្បាប់ ឱ្យចែករំលែកទិន្នន័យជំរឿនជាមួយនរណាម្នាក់ ឬក៏ភ្នាក់ងាររដ្ឋាភិបាលណាមួយ ឬក៏អ្វីផ្សេងទៀតឡើយ តាមរបៀបដែលវាទំនងជាអាចកំណត់អត្តសញ្ញាណរបស់ជនណាម្នាក់នោះទេ។Emily Walter
នេះមានន័យថា ព័ត៌មានដែលអ្នកផ្តល់គឺជាការសម្ងាត់ ត្រូវបានរក្សាទុកដោយសុវត្ថិភាព ហើយមិនអាចប្រើដើម្បីកំណត់អត្តសញ្ញាណអ្នកបានទេ។ អង្គការនានា រួមទាំងក្រសួងរដ្ឋាភិបាលក្រៅពី ABS មិនអាចចូលប្រើប្រាស់ព័ត៌មានផ្ទាល់ខ្លួនណាមួយដែលអ្នកបញ្ចូលក្នុងបែបបទជំរឿនរបស់អ្នកបានទេ។
ទិន្នន័យជំរឿនដែលមិនកំណត់អត្តសញ្ញាណបាន ត្រូវបានប្រើប្រាស់ដោយក្រុមសហគមន៍ អង្គការមិនស្វែងរកប្រាក់ចំណេញ អាជីវកម្ម និងរដ្ឋាភិបាល។
Welcoming Australia គឺជាអង្គការមួយក្នុងចំណោមអង្គការទាំងនោះ។ ពួកគេធ្វើការជាមួយរដ្ឋាភិបាលមូលដ្ឋាន ក្លឹបកីឡា សាកលវិទ្យាល័យ និងកន្លែងធ្វើការទូទាំងប្រទេស។
លោក Aleem Ali នាយកប្រតិបត្តិនៃ Welcoming Australia ពន្យល់ពីសារៈសំខាន់នៃចម្លើយដ៏ស្មោះត្រង់របស់អ្នក។
“ប្រសិនបើអ្នកមិនកត់ត្រាភាសា ជំនឿ វប្បធម៌របស់អ្នកទេ អ្នកនឹងក្លាយជាមនុស្សដែលគេមើលមិនឃើញ នៅពេលធ្វើការសម្រេចចិត្តផ្តល់មូលនិធិ។”
ហេតុអ្វីបានជាវាសំខាន់ក្នុងការផ្តល់ចម្លើយត្រឹមត្រូវនៅក្នុងជំរឿន?
ការឆ្លើយតបឱ្យបានត្រឹមត្រូវចំពោះសំណួរជំរឿនទាំងអស់ ធានាថាសំឡេងរបស់អ្នក និងសហគមន៍របស់អ្នកត្រូវបានរួមបញ្ចូលនៅពេលរៀបចំផែនការសម្រាប់សាលារៀន មជ្ឈមណ្ឌលសហគមន៍ ការគាំទ្រភាសា និងសេវាកម្មសំខាន់ៗផ្សេងទៀត។
លោក អាលី ជំរុញឱ្យមនុស្សគ្រប់គ្នាឆ្លើយសំណួរដោយស្មោះត្រង់ និងត្រឹមត្រូវ។
ការចូលរួមពិតជានិយាយអំពីសេចក្តីថ្លៃថ្នូរនៃការដែលត្រូវបានគេមើលឃើញ និងក្តីសប្បុរសនៃធនធានដែលសហគមន៍របស់អ្នកសមនឹងទទួលបាន។Aleem Ali
លោក Peter Doukas គឺជាប្រធានក្រុមប្រឹក្សាសហគមន៍ជនជាតិភាគតិចអូស្ត្រាលី ហៅកាត់ថា FECCA។
លោកមានប្រសាសន៍ថា អង្គការសហគមន៍ដូចជាក្រុមប្រឹក្សាសហគមន៍ជនជាតិភាគតិចបានសហការជាមួយ ABS ដើម្បីផ្តល់ព័ត៌មានជំរឿនជាភាសាផ្សេងក្រៅពីភាសាអង់គ្លេស និងដើម្បីបន្ធូរបន្ថយក្តីកង្វល់ណាមួយ។
លោកមានប្រសាសន៍ថា “ការទទួលបានទិន្នន័យត្រឹមត្រូវ និងជួយប្រជាជនឲ្យយល់ថា វាជាផ្នែកមួយដ៏សំខាន់នៃជីវិតពលរដ្ឋនៅក្នុងប្រទេសអូស្ត្រាលីគឺជាចំណុចស្នូល”។
លោក Aleem Ali មានប្រសាសន៍ថា ទិន្នន័យជំរឿនដើរតួនាទីយ៉ាងសំខាន់សម្រាប់ អង្គការ Welcoming Australia “... ពីព្រោះវាជួយយើងគាំទ្រអង្គការនានាដែលយើងធ្វើការជាមួយឲ្យមានការស្វាគមន៍ និងការរួមបញ្ចូលគ្នាកាន់តែច្រើន និងធ្វើការកាន់តែមានប្រសិទ្ធភាពជាមួយ... សហគមន៍ចម្រុះ”។
តើទិន្នន័យជំរឿនជួយដល់សហគមន៍ពហុវប្បធម៌យ៉ាងដូចម្តេច?
ជំរឿនមានឥទ្ធិពលពិតប្រាកដទៅលើប្រជាជន។
ព័ត៌មានដែលអ្នកផ្តល់ឱ្យ ជួយដល់ក្រុមសហគមន៍ អាជីវកម្ម និងរដ្ឋាភិបាលធ្វើការសម្រេចចិត្តប្រកបដោយព័ត៌មានអំពីប្រភេទសេវាកម្ម និងការគាំទ្រដែលសហគមន៍របស់អ្នកទទួលបាន។
លោក Aleem Ali និយាយថា ទិន្នន័យជំរឿនអាចត្រូវបានគេមើលឃើញថាជាផែនទីមួយ ដែលបង្ហាញថាយើងជានរណាក្នុងនាមជាប្រជាជាតិមួយ។
“ឧទាហរណ៍ នៅពេលដែលទិន្នន័យបង្ហាញពីចំនួនប្រជាជនច្រើន នៅក្នុងទីតាំងជាក់លាក់មួយ ដែលមានជំនាញភាសាអង់គ្លេសទាប ភស្តុតាងនោះអាចត្រូវបានប្រើដើម្បីគាំទ្រដល់អ្វីៗដូចជា សេវាថែទាំសុខភាពជាភាសាផ្សេងក្រៅពីអង់គ្លេស និងសេវាបកប្រែនៅមន្ទីរពេទ្យក្នុងតំបន់។ វាក៏ជួយយើងកំណត់អត្តសញ្ញាណ អ្វីដែលយើងអាចហៅថាសហគមន៍លាក់កំបាំង ដែលជារឿយៗត្រូវបានគេមើលរំលង នៅក្នុងការពិគ្រោះយោបល់ និងការផ្តល់មូលនិធិតាមបែបប្រពៃណី”។
ហើយនៅពេលដែលអ្នកឃើញរូបភាពដ៏ធំនេះ មានភាពចម្រុះជាច្រើននៅក្នុងសហគមន៍ពហុវប្បធម៌របស់ប្រទេសអូស្ត្រាលី ដែលមានសារៈសំខាន់ក្នុងការផ្តិតយក។
លោក Doukas និយាយថា “ឧទាហរណ៍ សហគមន៍ដែលបង្កើតឡើងរួចហើយកាន់តែច្រើន អាចមានតម្រូវការពិសេស ជុំវិញការគាំទ្រសម្រាប់មនុស្សចាស់ ចំណែកឯអ្នកមកដល់ថ្មី អាចមានតម្រូវការនៃការគាំទ្រផ្នែកភាសា ឬសូម្បីតែអ្វីមួយជាមូលដ្ឋាន ដូចជាការគាំទ្រការតាំងទីលំនៅ និងសាលារៀន”។
តើមានជំនួយគាំទ្រដែរឬទេ?
នៅពេលដែលកាលបរិច្ឆេទជំរឿនកាន់តែខិតជិតមកដល់ ABS កំពុងធ្វើការជាមួយអង្គការ អាជីវកម្ម និងក្រុមសហគមន៍នៅទូទាំងប្រទេសអូស្ត្រាលី ដើម្បីធានាថា ប្រជាជនអាចបំពេញជំរឿនបាននៅគ្រប់ទីកន្លែង។ នេះគ្របដណ្តប់ទាំងតំបន់ទីក្រុង តំបន់ជនបទ និងតំបន់ដាច់ស្រយាល ហើយធានាថាប្រជាជនដែលនៅឆ្ងាយពីផ្ទះ ឧទាហរណ៍នៅសណ្ឋាគារ មន្ទីរពេទ្យ កន្លែងបោះតង់ និងឧទ្យានសម្រាប់រថយន្តស្នាក់នៅ(caravan parks) ក៏ត្រូវបានគាំទ្រផងដែរ។
លោក Ali មានប្រសាសន៍ថាការិយាល័យស្ថិតិអូស្រ្តាលី(ABS) នឹងផ្តល់ខិត្តប័ណ្ណ មគ្គុទ្ទេសក៍ណែនាំជាសំឡេងអូឌីយ៉ូ ធនធានផ្សេងៗជាវីដេអូជាច្រើនភាសា។
“អ្នកថែមទាំងអាចចូលទៅកាន់មជ្ឈមណ្ឌលជំរឿនដែលបង្កើតឡើងភ្លាមៗជាបណ្តោះអាសន្ន Census pop-upជាផ្លូវការ សម្រាប់ជាជំនួយដោយផ្ទាល់តទល់មុខគ្នា ហើយក៏មានជំនួយគាំទ្រតាមទូរស័ព្ទ តាមរយៈ មជ្ឈមណ្ឌលទំនាក់ទំនងជំរឿន-Census Contact Centre ផងដែរ។ ហើយប្រសិនបើអ្នកត្រូវការអ្នកបកប្រែ អ្នកអាចប្រើសេវាកម្មជាតិ TIS”។
ដូច្នេះ សូមចងចាំថា យប់ធ្វើជំរឿនគឺនៅថ្ងៃទី 11 ខែសីហា។ ប្រសិនបើអ្នកនៅក្នុងប្រទេសអូស្ត្រាលីនៅយប់នោះ ត្រូវប្រាកដថាអ្នកត្រូវបានគេរាប់បញ្ចូល។
វាត្រូវការពេលខ្លីប៉ុណ្ណោះដើម្បីបំពេញ ប៉ុន្តែព័ត៌មានទាំងនេះអាចជួយបង្កើតសេវាកម្ម និងការគាំទ្រ សម្រាប់សហគមន៍របស់អ្នក សម្រាប់ឆ្នាំខាងមុខ។
សម្រាប់ព័ត៌មានបន្ថែមអំពីជំរឿន សូមចូលទៅកាន់៖ Census website. សម្រាប់ព័ត៌មានជាភាសាដទៃក្រៅពីភាសាអង់គ្លេស ឬជំនួយគាំទ្រ សូមចូលទៅកាន់៖ Language support page។
ខ្លឹមសារនេះត្រូវបានផលិតឡើងក្នុងភាពជាដៃគូជាមួយការិយាល័យស្ថិតិអូស្ត្រាលី។
