ប្រទេសចិនបានដាក់ការប្តឹងតវ៉ាជាផ្លូវការតាមបែបការទូត លើកំណត់សម្គាល់ដែលធ្វើឡើងដោយរដ្ឋមន្ត្រីក្រសួងអភិវឌ្ឍន៍អន្តរជាតិអូស្ត្រាលី លោកស្រី Concetta Fierravanti-Wells ស្តីពីគម្រោងជំនួយរបស់ប្រទេសចិននៅតំបន់ប៉ាស៊ីហ្វិក។
រដ្ឋាភិបាលក្រុងប៉េកាំងបានការពារកម្មវិធីជំនួយរបស់ខ្លួន ដោយនិយាយថា កម្មវិធីនេះគោរពដល់ឆន្ទៈរបស់រដ្ឋាភិបាលកោះប៉ាស៊ីហ្វិកនិងតម្រូវការអភិវឌ្ឍន៍របស់ប្រជាជនពួកគេ។
ក្នុងពេលជាមួយគ្នានេះ រដ្ឋមន្រ្តីការបរទេសអូស្រ្តាលីលោកស្រី Julie Bishop បានបដិសេធមិនគាំទ្រដល់ការរិះគន់របស់រដ្ឋមន្រ្តីក្រសូងអភិវឌ្ឍអន្តរជាតិលោកស្រី Concetta Fierravanti-Wells ទៅលើកម្មវិធីជំនួយនៅតំបន់ប៉ាស៊ីហ្វិករបស់ប្រទេសចិននេះនោះទេ។
លោកស្រីBishop បានចេញនូវរបាយការណ៍ជាលាយលក្ខណ៍អក្សរមួយនិយាយថា៖ «រដ្ឋាភិបាលអូស្រ្តាលីស្វាគមន៍ការវិនិយោគនៅក្នុងប្រទេសកំពុងអភិវឌ្ឍក្នុងតំបន់ប៉ាស៊ីហ្វិក ដែលគាំទ្រកំណើនសេដ្ឋកិច្ចដែលអាចទ្រទ្រង់បាន និងដែលមិនដាក់បន្ទុកបំណុលស្មុគស្មាញលើរដ្ឋាភិបាលប្រទេសនានាក្នុងតំបន់នេះ»៕
Share
