ការសម្រេចនោះ ត្រូវបានលោកយឹម សុវណ្ណ អ្នកនាំពាក្យគណបក្សសង្គ្រោះជាតិ បានប្រកាសក្នុងសន្និសីទកាសែតថា ការចូលបំពេញការងាររបស់អ្នកតំណាងរាស្ត្រ និងប្រធានគណៈកម្មការរដ្ឋសភា មកពីគណបក្សសង្គ្រោះជាតិ នៅក្នុងរដ្ឋសភា គឺដើម្បីសួរដេញដោលលើរដ្ឋមន្ត្រី១ចំនួន ពាក់ព័ន្ធនឹងច្បាប់ថវិកាជាតិ ឆ្នាំ២០១៧ បញ្ហាឃាតកម្មលើលោកកែមឡី ការនាំខ្សាច់ទៅលក់នៅប្រទេសសឹង្ហបុរី និងបញ្ហាតម្លៃកសិផលរបស់ប្រជាកសិករខ្មែរចុះថោកនាពេលសព្វថ្ងៃ។
សូមរម្លឹកថា កាលពីសប្តាហ៍មុន គណៈកម្មាធិការអចិន្ត្រៃយ៍រដ្ឋសភាដែលដឹកនាំដោយគណបក្សប្រជាជនកម្ពុជា បានចេញសេចក្តីសម្រេច ដាក់ពិន័យតំណាងរាស្ត្រណា ដែលអវត្តមានដោយគ្មានច្បាប់អនុញ្ញាត មិនធ្វើការនៅរដ្ឋសភា។ សេចក្តីសម្រេចនោះរួមមាន៖ ការស្តីបន្ទោស ព្រមានកាត់ប្រាក់ខែនិងបណ្តេញចេញពីអង្គប្រជុំរដ្ឋសភាជាដើម។
ជាមួយនឹងការសម្រេចវិលទៅបន្តការងារនៅរដ្ឋសភាឡើងវិញ ក្នុងកិច្ចប្រជុំកាលពីថ្ងៃទី១ ខែវិច្ឆិកា គណបក្សសង្គ្រោះជាតិ ក៏បានសម្រេចលើការកំណត់គោលនយោបាយ ៧ចំណុច សម្រាប់ជាត្រីវិស័យរបស់គណបក្សសង្គ្រោះជាតិ អនុវត្តនៅពេលកាន់អំណាច។
គោលនយោបាយទាំង ៧ចំណុចនោះ ត្រូវបានលោកយឹមសុវណ្ណ អ្នកនាំពាក្យគណបក្សសង្គ្រោះជាតិ បានប្រកាសក្នុងសន្និសីទកាសែតថា៖
ទី១-ជំរុញលើកកម្ពស់ជីវភាពរស់នៅរបស់ប្រជាពលរដ្ឋ
ទី២-ការគោរពសិទ្ធិមនុស្ស គោលការណ៍ប្រជាធិបតេយ្យ
ទី៣-ការកសាងនីតិរដ្ឋ
ទី៤-អភិវឌ្ឍន៍សេដ្ឋកិច្ច
ទី៥-បូរណភាពទឹកដី បញ្ហាអន្តោប្រវេសន៍
ទី៦-វិស័យការពារជាតិ និង
ទី៧-នយោបាយការបរទេស៕
