ចេញពីតុលាការសាលាឧទ្ធរណ៍ នៅទល់មុខព្រះបរមរាជវាំង កាលពីព្រឹកថ្ងៃទី០៥ ខែមិថុនា ឆ្នាំ២០១៨ លោកស្រី ម៉េង សុភារី មេធាវីម្នាក់ ក្នុងចំណោមមេធាវីជាច្រើននាក់ ដែលការពារក្តីលោកកឹមសុខា បានប្រាប់អ្នកកាសែតពីការសម្រេចរបស់តុលាការសាលាឧទ្ធរណ៍ ដែលបន្តឃុំខ្លួនលោកកឹមសុខា នៅក្នុងពន្ធនាគារ យ៉ាងដូច្នេះថា៖
( សំឡេងលោកស្រីមេធាវី ម៉េង សុភារី )
សូមរម្លឹកថា សវនាការ នៅតុលាការសាលាឧទ្ធរណ៍ កាលពីព្រឹកថ្ងៃទី០៥ ខែមិថុនា បានធ្វើឡើងជាអសាធារណៈ ព្រោះជាសវនាការ មុនអង្គសេចក្តី ដោយពុំអនុញ្ញាតឱ្យអ្នកមិនពាក់ព័ន្ធ ចូលរួមស្តាប់សវនាការឡើយ។
លោក កឹម សុខា អតីតប្រធានគណបក្សសង្គ្រោះជាតិ ត្រូវបានចាប់ខ្លួនទាំងកណ្តាលអាធ្រាត្រ ថ្ងៃទី៣ ខែកញ្ញា ឆ្នាំ២០១៧ ដោយរាជរដ្ឋាភិបាលកម្ពុជា និងតុលាការ ចោទប្រកាន់លោក ពីបទសន្ធិដ្ឋិភាព ជាមួយបរទេស ឬអំពើក្បត់ជាតិ។ បទសន្ធិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឱ្យមានអំពើប្រទូស្តរ៉ាយ ឬឱ្យមានអំពើឈ្លានពានប្រឆាំងនឹងប្រទេសកម្ពុជា។ បទល្មើសនេះ ត្រូវជាប់ពន្ធនាគារពី ១៥ឆ្នាំ ដល់ ៣០ឆ្នាំ។
ក្រោយឃាត់ខ្លួន សមត្ថកិច្ចបានបញ្ជូនលោក កឹម សុខា ទៅឃុំឃាំងបណ្តោះអាសន្ន នៅពន្ធនាគារត្រពាំងផ្លុង ក្នុងខេត្តត្បូងឃ្មុំ នៅព្រំដែនវៀតណាម។ ក្រោយការចាប់ខ្លួនលោកកឹមសុខា នៅថ្ងៃទី១៦ ខែវិច្ឆិកា ឆ្នាំ២០១៧ តុលាការកំពូល បានសម្រេចរំលាយគណបក្សសង្គ្រោះជាតិ ហើយហាមជឃាត់ថ្នាក់ដឹកនាំអតីតគណបក្សប្រឆាំងនេះ ចំនួន ១១៨ រូប មិនឲ្យធ្វើនយោបាយរយៈពេល ៥ឆ្នាំ។
យ៉ាងណាក៏ដោយ ក្រុមថ្នាក់ដឹកនាំអតីតគណបក្សសង្គ្រោះជាតិ និងសហគមន៍អន្តរជាតិមួយចំនួន ចាត់ទុកថា ការចាប់ខ្លួន និងចោទប្រកាន់ ឃុំខ្លួនលោកកឹមសុខា ព្រមទាំងរំលាយគណបក្សសង្គ្រោះជាតិ គឺជារឿងនយោបាយប៉ុណ្ណោះ៕
