លោក ហ៊ុន សែន ប្រធានគណបក្សប្រជាជនកម្ពុជា បានបញ្ជាក់ថា សម្ព័ន្ធភាពគណបក្សនយោបាយ ចំនួន ២៨គណបក្ស ដែលបានកើតឡើង កាលពីថ្ងៃទី២៦ ខែតុលា គឺមិនស្ថិតនៅលើការគ្រប់គ្រងពីគណបក្សណាមួយទេ ដោយត្រូវស្មើសិទ្ធិ ស្មើភាពគ្នា ពោលគឺគណបក្សទាំងអស់ មិនមែនស្ថិតក្រោមគណបក្សប្រជាជនកម្ពុជានោះទេ បើទោះបីជាបក្សប្រជាជន កំពុងកាន់អំណាចក្តី និងមានធនធានហិរញ្ញវត្ថុក្តី។
( សំឡេង )
ជាមួយគ្នានេះ លោក ហ៊ុន សែន ក៏បានប្រកាស មិនអត់ឱនដល់ក្រុមណាក៏ដោយ បក្សណាក៏ដោយ ដែលចង់បំផ្លាញសន្តិភាពរបស់ប្រទេសកម្ពុជា។ លោកបន្តថា «ចលនា៩វិច្ឆិកា» ដែលលោក ហ៊ុនសែន អះអាងថា ជាចលនានៃការផ្តួលរំលំរាជរដ្ឋាភិបាល គឺមិនត្រូវអត់ឱនទេ ហើយតុលាការ កំពុងបន្តដំណើរការលើរឿងក្តីនេះ។ លោក ហ៊ុន សែន ក៏បានជូនសារដល់បរទេស និងអង្គការមួយចំនួន ឱ្យឆាប់ដកខ្លួន ចេញពីចលនាបដិវត្តពណ៌ ដែលលោកថា មិនអាចទទួលយកបានទេ។ នយោបាយជ្រុលនិយម គឺជាការនាំឱ្យកើតបដិវត្តន៍ពណ៌ ដែលលោក ហ៊ុន សែន បានប្រកាសថា ត្រូវរួមគ្នាទប់ស្កាត់ និងកម្ចាត់ចោល។
( សំឡេង )
សូមរម្លឹកថា សម្ព័ន្ធភាពរវាងគណបក្សប្រជាជនកម្ពុជា និងគណបក្សនយោបាយចំនួន ២៧គណបក្ស ដែលបានបង្កើតឡើង កាលពីថ្ងៃទី២៦ ខែតុលា ឆ្នាំ២០២៣ គឺបានកើតឡើងតែប៉ុន្មានថ្ងៃប៉ុណ្ណោះ ក្រោយពីគណបក្សភ្លើងទៀន ដែលជាគណបក្សប្រឆាំង ប្តូរឈ្មោះមកពីគណបក្សសមរង្ស៊ី បានចងសម្ព័ន្ធភាពជាមួយនឹងគណបក្សនយោបាយ ៣ផ្សេងទៀត រួមមាន៖ គណបក្សឆន្ទៈខ្មែរ របស់កូនលោក គង់ គាំ គណបក្សប្រជាធិបតេយ្យមូលដ្ឋាន របស់លោក យ៉េង វីរៈ និងគណបក្សកែទម្រង់កម្ពុជា ដែលបង្កើតឡើងដោយលោក ប៉ុល ហំម និងលោក អ៊ូ ចន្ទរ័ត្ន។ គណបក្សនយោបាយទាំង ៤នេះ កាលពីថ្ងៃទី១១ ខែតុលា ឆ្នាំ២០២៣ នេះ បានបង្កើតជាសម្ព័ន្ធភាពឈ្មោះថា សម្ព័ន្ធភាពឆ្ពោះទៅអនាគត។
កាលពីថ្ងៃទី២០ ខែតុលា ឆ្នាំ២០២៣ គណបក្សភ្លើងទៀន ដែលមានសំឡេងច្រើន នៅក្រុមប្រឹក្សាឃុំសង្កាត់ បានប្រកាសថា គណបក្សប្រឆាំងនេះ នឹងចូលរួមការបោះឆ្នោតព្រឹទ្ធសភា និងការបោះឆ្នោតក្រុមប្រឹក្សារាជធានីខេត្តក្រុងស្រុកខណ្ឌ នៅឆ្នាំ២០២៤ ដោយសម្រេចគាំទ្រការជ្រើសរើស យកគណបក្សនយោបាយណាមួយ នៅក្នុង "សម្ព័ន្ធភាពឆ្ពោះទៅអនាគត" ដើម្បីរៀបចំបញ្ជីបេក្ខជនឈរឈ្មោះ សម្រាប់ការបោះឆ្នោតជ្រើសតាំងសមាជិក ព្រឹទ្ធសភា នីតិកាលទី៥ ឆ្នាំ២០២៤ និងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤៕
