៤នាក់ស្លាប់​ដោយសារ​រថយន្ត​បើក​បុក​នៅ​កណ្តាល​ក្រុង​ម៉ែលប៊ិន​ម្សិលមិញ

ទារកអាយុ៣ខែម្នាក់ស្ថិតនៅក្នុងសភាពធ្ងន់ធ្ងរនៅឡើយ បន្ទាប់ពីរងរបួសដោយសារតែរថយន្តមួយគ្រឿងបើកសំដៅទៅបុកអ្នកដំណើរ នៅលើផ្លូវBourke Street ដែលពោរពេញទៅដោយហាងលក់ទំនិញនៅកណ្តាលទីក្រុងម៉ែលប៊ិន កាលពីរសៀលថ្ងៃសុក្រម្សិលមិញនេះ។

---

មន្ទីរ​ពេទ្រ Royal Childrens Hospital ឲ្យដឹងថា ទារក​រូបនេះ និង​កុមារ​២នាក់​ផ្សេងទៀត​កំពុងតែ​ស្ថិតនៅ​ក្នុង​មន្ទីរ​ពេទ្យ ដោយ​ម្នាក់​មាន​អាយុ​២ឆ្នាំ​ស្ថិតនៅ​ក្នុង​សភាព​ធ្ងន់ធ្ងរ​ហើយ​ម្នាក់​ទៀត​អាយុ​៩ឆ្នាំ​ស្ថិតនៅ​ក្នុង​ស្ថានភាពនឹងន ។

ស្នងការប៉ូលិសលោក Graham Ashton និយាយថា ជនជាប់ចោទប្រព្រឹត្តបទល្មើស​រូបនេះ​គឺ​ជា​អ្នក​ដែល​ប៉ូលិស​ធ្លាប់​ស្គាល់​ពីមុន​មក ពោលគឺ​មិន​មាន​ពាក់​ព័ន្ធ​នឹង​អំពើរភេរវកម្ម​ឡើយ។

សូមបញ្ជាក់ថា រហូត​មកទល់​នឹង​ពេលនេះ​មាន​មនុស្ស​៤នាក់​ហើយ​បាន​ស្លាប់​នៅ​ក្នុង​ហេតុការណ៍នេះ​ដែល​ក្នុង​នោះរួមមានទាំង​ក្មេង​អាយុ​១០ឆ្នាំ​ម្នាក់​ផងដែរ៕