កាលពីល្ងាចថ្ងៃទី៥ ខែសីហាម្សិលមិញ អាជ្ញាធរសមត្ថកិច្ច បានបិទខ្ទប់ផ្សារទឹកថ្លា ស្ថិតនៅជាប់នឹងមហាវិថីសហព័ន្ធរុស្ស៊ី ក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។ ការបិទខ្ទប់នេះ ដោយសារតែពាក់ព័ន្ធនឹងជំងឺកូវីដ១៩ បំប្លែងថ្មី ប្រភេទ ដែលតា។ អាជីវករ និងប្រជាពលរដ្ឋរស់នៅជុំវិញផ្សារទឹកថ្លា ដែលសំបូរដោយកម្មកររោងចក្រកាត់ដេរ រស់នៅនេះ ត្រូវយកសំណាក រកមេរោគកូវីដ១៩ សរុបជាង ៥០០នាក់។ នេះបើតាមការបញ្ជាក់ជាបឋមរបស់អាជ្ញាធរសមត្ថកិច្ច។
សូមរម្លឹកថា កាលពីព្រឹកថ្ងៃទី៥ ខែសីហា ឆ្នាំ២០២១ រដ្ឋបាលរាជធានីភ្នំពេញ បានសម្រេចបិទខ្ទប់ផ្សារទួលសង្កែ ឬផ្សារតូច ស្ថិតក្នុងសង្កាត់ទួលសង្កែទី១ ខណ្ឌឬស្សីកែវ ជិតស្ពានជ្រោយចង្វារ និងបិទខ្ទប់កំណាត់ផ្លូវ ចំនួន៣ គឺផ្លូវលេខ ១១៣ ចន្លោះផ្លូវលេខ ២៣២ និងផ្លូវលេខ ២៤២ ក្នុងសង្កាត់បឹងព្រលឹត ខណ្ឌ ៧មករា ក្នុងរាជធានីភ្នំពេញ ក្រោយមានការឆ្លងរាលដាលមេរោគបំប្លែងខ្លួនថ្មី ប្រភេទដែលតា។
កន្លងមក ដើម្បីទប់ស្កាត់ និងកាត់ផ្តាច់ការឆ្លងរាលដាលនូវមេរោគបំប្លែងខ្លួនថ្មី ប្រភេទដែលតា នៅក្នុងសហគមន៍ កាលពីថ្ងៃទី២ ខែសីហា អាជ្ញាធររាជធានីភ្នំពេញ ក៏បានសម្រេចបិទខ្ទប់តំបន់មួយចំនួន និងផ្សារជាច្រើនទៀត ក្រោយមានការសង្ស័យជាប់ពាក់ព័ន្ធនឹងមេរោគបំប្លែងខ្លួនថ្មី ដែលតា។
នោះគឺបិទខ្ទប់តំបន់មួយចំនួន នៅភូមិផ្សារតូច សង្កាត់ទួលសង្កែទី១ ខណ្ឌឫស្សីកែវ និងផ្នែកខ្លះ ក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។
ក្រៅពីនោះ កាលពីថ្ងៃទី៣ ខែសីហា រដ្ឋបាលរាជធានីភ្នំពេញ ក៏បានសម្រេចបិទផ្សារ សិនជូរី ផ្លាហ្សា និងផ្សារដើមគ ក្រោយរកឃើញអ្នកជំងឺកូវីដ បំប្លែងថ្មី ដែលតា បានចូលទៅផ្សាររដ្ឋទាំង ២នេះ។ ប៉ុន្តែក្រោយធ្វើតេស្តលើអាជីវករ ក្នុងផ្សាររដ្ឋទាំង ២នេះ គឺមិនមានអ្នកវិជ្ជមានកូវីដ១៩ ឡើយ។
នៅថ្ងៃទី៥សីហាម្សិលមិញ ផ្សារបឹងកេងកង ក្នុងខណ្ឌបឹងកេងកង នៅរាជធានីភ្នំពេញ ក៏ត្រូវបានបិទ ហើយធ្វើតេស្ត បានរកឃើញអាជីវករ ២នាក់ នៅផ្សារបឹងកេងកង បានឆ្លងកូវីដ១៩។
ពាក់ព័ន្ធនឹងជំងឺកូវីដ១៩ នៅកម្ពុជា ក្នុងរយៈពេល ២៤ម៉ោងចុងក្រោយនេះ កម្ពុជា មានអ្នកឆ្លងកូវីដ១៩ ចំនួន ៥៩១នាក់ ជាសះស្បើយ ៦១៨នាក់ និងស្លាប់ ១៩នាក់ កាលពីថ្ងៃទី៤ ខែសីហា។ ជារួម គិតត្រឹមថ្ងៃទី៤ ខែសីហា នៅទូទាំងប្រទេសកម្ពុជា មានអ្នកឆ្លងកូវីដ១៩ សរុបចំនួនជាង ៨ម៉ឺននាក់ (៨០ ២២៥នាក់)។ ក្នុងនោះ មានករណីជាសះស្បើយសរុបជាង ៧ម៉ឺន ៣ពាន់នាក់ ( ៧៣ ៤២១នាក់) និងករណីស្លាប់សរុប នៅកម្ពុជា ដោយសារជំងឺកូវីដ១៩ បានកើនឡើងដល់ចំនួន ១៥០៧នាក់ហើយ៕
