ក្នុងសន្និសីទសារព័ត៌មាន ស្តីពី «ចម្ងល់ពាក់ព័ន្ធនឹងកុងទ័រភ្លើង» នៅទីស្តីការគណៈរដ្ឋមន្ត្រី កាលពីព្រឹកថ្ងៃទី០៨ ខែសីហា ឆ្នាំ២០១៩ លោក កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកអគ្គិសនីកម្ពុជា EDC បានលើកឡើងថា កុងទ័រភ្លើងអគ្គិសនីនៅកម្ពុជា មិនស៊ីភ្លើង ឬស៊ីគីឡូ ដូចប្រជាពលរដ្ឋមួយចំនួន លើកឡើងនោះទេ។ លោកក៏បានលើកបង្ហាញពីកុងទ័រថ្មី ប្រភេទឌីជីថល ដែលបានទិញមកពីជប៉ុន សម្រាប់ប្រើប្រាស់នៅកម្ពុជា ជំនួសកុងទ័រចាស់ផងដែរ។
លោក កែវ រតនៈ បញ្ជាក់បន្ថែមថា ការឡើងគីឡូភ្លើងអគ្គិសនីនៅកម្ពុជា ដែលមានការលើកឡើងកន្លងមកនោះ មកពីការបន្ថែមឧបករណ៍សម្ភារៈប្រើប្រាស់អេឡិចត្រូនិក តាមផ្ទះនីមួយៗ ហើយក៏អាចមកពីបញ្ហាអាកាសធាតុផងដែរ។ ដូច្នេះអគ្គិសនីកម្ពុជា មិនបានរៀបចំកុងទ័រស៊ីគីឡូរបស់អតិថិជន ឬក៏ដូចពាក្យរបស់អតិថិជនខ្លះ លើកឡើងថា អគ្គិសនីកម្ពុជា បឺតជញ្ជក់ឈាមរបស់ប្រជាពលរដ្ឋនោះទេ ព្រោះការធ្វើបែបនេះ មន្ត្រីអគ្គិសនីកម្ពុជា នឹងមានទោស។
( សំឡេងលោក កែវ រតនៈ )
ក្នុងសន្និសីទកាសែត លោក កែវ រតនៈ ក៏បានលើកឡើងច្រើនពីករណីជាក់ស្តែងជាច្រើននៃការតវ៉ារបស់ប្រជាពលរដ្ឋកន្លងមក រឿងកុងទ័រ ដើរលឿន អស់គីឡូច្រើន អំឡុងពីខែមករា ដល់ខែកក្កដា ជាដើម។ តែលោក កែវ រតនៈ បញ្ជាក់យ៉ាងច្បាស់ថា កុងទ័រភ្លើងអគ្គិសនីទាំងចាស់ ទាំងថ្មីរបស់ EDC គឺធានាមិនស៊ីភ្លើង ដូចការលើកឡើងរបស់ប្រជាពលរដ្ឋមួយចំនួនទេ៕
