សេចក្តីប្រកាស កាលពីថ្ងៃទី២២ ខែមីនា ឆ្នាំ២០២១ កំណត់ថា បុគ្គលដែលមានកាតព្វកិច្ចពាក់ម៉ាស រួមមាន៖បុគ្គលដែលមានវិជ្ជមានកូវីដ-១៩ ក្នុងពេលជួបផ្ទាល់ជាមួយមន្ត្រីសុខាភិបាល ឬមន្ត្រីមានសមត្ថកិច្ចផ្សេងទៀត។ បុគ្គលដែលមានកាតព្វកិច្ចធ្វើចត្តាឡីស័ក លើកលែងតែបុគ្គលនោះ ធ្វើចត្តាឡីស័កនៅក្នុងបន្ទប់ ដាច់ដោយឡែកតែឯង និងមិនជួបផ្ទាល់ជាមួយអ្នកដទៃ។អ្នកបើកបរយានជំនិះគ្រប់ប្រភេទ ដែលជាមធ្យោបាយធ្វើដំណើររួម ឬមធ្យោបាយដឹកជញ្ជូន សម្រាប់បម្រើឱ្យសាធារណជន។អ្នកដំណើរ តាមមធ្យោបាយធ្វើដំណើររួម ឬមធ្យោបាយដឹកជញ្ជូន សម្រាប់បម្រើឱ្យសាធារណជន។អ្នកផ្តល់សេវាផ្ទាល់ដល់អតិថិជន រួមមាន បុគ្គលិកជួរមុខនៅតាមសហគ្រាស ឬគ្រឹះស្ថាន ឬទីតាំងអាជីវកម្មនានា មន្ត្រី និងបុគ្គលិកសុខាភិបាល អ្នកផ្តល់សេវាព្យាបាលដោយចលនា បុគ្គលដែលបម្រើការនៅក្នុងភោជនីយដ្ឋានឬអាហារដ្ឋាន បុគ្គលិកផ្ទះសំណាក់ ឬសណ្ឋាគារ បុគ្គលិក ដែលផ្តល់សេវាម៉ាស្សា កោសជប់ និងបុគ្គលផ្សេងទៀត ដែលផ្តល់សេវាផ្ទាល់ជាមួយអតិថិជន។ បុគ្គលផ្សេងទៀត ដែលកំពុងស្ថិតនៅតាមទីសាធារណៈ ដែលមានមនុស្សច្រើន ឬទីកន្លែង ដែលមានការជួបជុំមនុស្ស ចាប់ពី ២ (ពីរ) នាក់ឡើងទៅ។
ចំណែកកន្លែង ដែលតម្រូវឱ្យពាក់ម៉ាស់ ត្រូវបានក្រសួងសុខាភិបាល កំណត់ថា រាល់សហគ្រាស ឬគ្រឹះស្ថានឯកជន ឬម្ចាស់អាជីវកម្ម រួមមានជាអាទិ៍ ភោជនីយដ្ឋាន អាហារដ្ឋាន ផ្ទះសំណាក់ សណ្ឋាគារ គ្លីនិក ឬមន្ទីរសម្រាកព្យាបាលជំងឺ ឱសថស្ថាន ផ្សារទំនើប ហាងលក់ទំនិញ គ្រឹះស្ថានធនាគារ និងហិរញ្ញវត្ថ រោងចក្រ សិប្បកម្ម ឬទីកន្លែងធ្វើការ ឬទីកន្លែងអាជីវកម្មដទៃទៀត ត្រូវត្រួតពិនិត្យ និងណែនាំបុគ្គលិក និងបុគ្គលគ្រប់រូប ដែលចូលទៅទីកន្លែងរបស់ខ្លួនឱ្យពាក់ម៉ាស ហើយមិនត្រូវអនុញ្ញាតឱ្យបុគ្គល ដែលមិនពាក់ម៉ាស ចូលក្នុងទីកន្លែងរបស់ខ្លួនឡើយ។
ក្រសួងសុខាភិបាល ក៏បានកំណត់ថា ក្រៅពីទីតាំងភូមិសាស្ត្រ ដែលត្រូវអនុវត្តកាតព្វកិច្ចពាក់ម៉ាស់ ក្រសួងក៏បានលើកទឹកចិត្តឱ្យបុគ្គលគ្រប់រូប ប្រកាន់ខ្ជាប់នូវវិធានការ «៣ការពារ និង៣កុំ» ដើម្បីបង្ការការចម្លង ឬការឆ្លងមេរោគកូវីដ១៩។
ក្រសួងសុខាភិបាល បានគូសបញ្ជាក់ថា បុគ្គល ដែលមិនអនុវត្តកាតព្វកិច្ចនៃការពាក់ម៉ាស ឬកាតព្វកិច្ចរក្សាគម្លាតសុវត្ថិភាព ត្រូវទទួលទណ្ឌកម្ម ដូចមានចែង ក្នុងអនុក្រឹត្យ ស្តីពី វិធានសុខាភិបាល ដើម្បីទប់ស្កាត់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។ ក្នុងនោះ មាត្រា១៩ នៃអនុក្រឹត្យ បានចែងថា អ្នកមិនពាក់ម៉ាស់ ឬមិនរក្សាគម្លាតសុវត្ថិភាព ត្រូវផ្តន្ទាទោសជាពិន័យអន្តរការណ៍ពី ២០០,០០០រៀល ទៅ ១,០០០,០០០រៀល។
លោក គឹម សន្តិភាព រដ្ឋលេខាធិការ និងជាអ្នកនាំពាក្យក្រសួងយុត្តិធម៌ បានបញ្ជាក់ពីការកំណត់ឲ្យពាក់ម៉ាស និងរក្សាគម្លាតសុវតិ្ថភាព ក្នុងទីតាំងភូមិសាស្ត្រ ៥រាជធានីខេត្ត ដែលកំពុងឆ្លងរាលដាលជំងឺកូវីដ១៩ ខ្លាំងជាងគេ នៅកម្ពុជា រួមមាន៖ នៅភ្នំពេញ ខេត្តកណ្តាល ព្រៃវែង ព្រះសីហនុ និងនៅខេត្តសៀមរាប។
( សំឡេង )
យ៉ាងណាក៏ដោយ រហូតដល់ថ្ងៃទី៣១ ខែមីនានេះ នៅកម្ពុជា មិនទាន់មានដំណឹងស្តីពីការផាកពិន័យលើអ្នកមិនពាក់ម៉ាស និងមិនរក្សាគម្លាត តាមអ្វីដែលច្បាប់បានកំណត់ នៅឡើយទេ។ ប៉ុន្តែប្រជាពលរដ្ឋកម្ពុជា បាននាំគ្នាពាក់ម៉ាស នៅពេលចេញក្រៅផ្ទះ ព្រមទាំងមានអាល់កុល ឬជែល លាងសម្អាតដៃស្ទើរគ្រប់គ្នា ខណៈដែលជំងឺកូវីដ១៩ នៅតែបន្តឆ្លងរាលដាលខ្លាំង នៅកម្ពុជា ពិសេសនៅរាជធានីភ្នំពេញ ខេត្តកណ្តាល និងខេត្តព្រះសីហនុ ហើយក៏បានរាលដាល ទៅកាន់ខេត្តថ្មីៗជាច្រើនទៀត ដូចជា ខេត្តកំពង់ចាម ខេត្តត្បូងឃ្មុំ និងខេត្តសៀមរាប ជាដើម។
ជំងឺកូវីដ១៩ ក៏បានសម្លាប់មនុស្ស ចំនួន ១១នាក់ហើយ នៅកម្ពុជា គិតចាប់ពីថ្ងៃទី១១ ខែមីនា៕
