ក្នុងពេលជូនដំណើរលោកនាយករដ្ឋមន្ត្រី ហ៊ុន សែន ឡើងយន្តហោះ ទៅចូលរួមកិច្ចប្រជុំនៅទីក្រុងបាងកក ប្រទេសថៃ កាលពីរសៀលថ្ងៃទី១៤ ខែមិថុនា លោកនាយឧត្តមសេនីយ៍ ហ៊ីង ប៊ុនហៀង បានបញ្ជាក់ថា រូបលោក មិនមានទ្រព្យសម្បត្តិ ឬក៏លុយទុកនៅអាមេរិកនោះទេ។ លោកបានជំរុញទៅអាមេរិកថា បើរកឃើញថា ទ្រព្យសម្បត្តិរបស់លោកមានទុកនៅអាមេរិកមែននោះ សូមឲ្យអាមេរិក បង្កកឲ្យបានលឿនបំផុត។
( សំឡេងលោក ហ៊ីង ប៊ុនហៀង )
ចំណែកនៅក្នុងលិខិត ដែលបានចេញផ្សាយនៅថ្ងៃទី១៤ ខែមិថុនា លោកនាយឧត្តមសេនីយ៍ ហ៊ីង ប៊ុនហៀង បានបញ្ជាក់ថា លោកចង់ធ្វើជាមិត្តរបស់អាមេរិក ប៉ុន្តែលោកបានត្រៀមខ្លួនជានិច្ច ដើម្បីវាយបកលើជនអាមេរិកណា ដែលមិនគោរពនូវអធិបតេយ្យភាព នៃប្រទេសឯករាជ្យមួយ ដូចជាកម្ពុជា។ លោកបន្ថែមថា ទោះបីជាលោកចង់ធ្វើជាមិត្តរបស់អាមេរិក តែលោកមិនមែនជាពលរដ្ឋអាមេរិក ដែលត្រូវគោពតាមច្បាប់របស់អាមេរិកនោះទេ។
ដូចប្រាប់អ្នកកាសែត កាលពីថ្ងៃទី១៣មិថុនា លោកនាយឧត្តមសេនីយ៍ផ្កាយមាស ៤ បានលើកឡើងក្នុងលិខិតថា ក្នុងមួយជីវិតរបស់លោក លោកមិនធ្លាប់បានជាន់ទឹកដីអាមេរិកនោះទេ ហើយក៏គ្មានបំណងទៅអាមេរិកនោះដែរ។ ក្នុងចំណុចនេះ លោកនាយឧត្តមសេនីយ៍ បានបន្ថែមថា អាមេរិក មិនចាំបាច់ដាក់ទណ្ឌកម្មលើរូបលោកនោះទេ ពីព្រោះលោកមិនត្រូវការទៅសហរដ្ឋអាមេរិកឡើយ។
លិខិតឆ្លើយតបនោះ លោកនាយឧត្តមសេនីយ៍ ហ៊ីង ប៊ុនហៀង បានបង្ហាញពីការប្ដេជ្ញាក្នុងការទប់ស្កាត់ និងប្រឆាំងចំពោះការប៉ុនប៉ងធ្វើបដិវត្តពណ៌នៅកម្ពុជា ក៏ដូចជាប្ដេជ្ញាការពារសន្តិសុខ សុវត្ថិភាពជូនលោកនាយករដ្ឋមន្រ្ដី ហ៊ុន សែន និងក្រុមគ្រួសារ ក្នុងនាមលោក ជាមេបញ្ជាការនៃបញ្ជាការដ្ឋានអង្គរក្ស។
សូមរំលឹកថា ការិយាល័យកិច្ចការសាធារណៈ នៃក្រសួងរតនាគារអាមេរិក បានប្រកាស កាលពីថ្ងៃទី១៣មិថុនា ដាក់លោកនាយឧត្តមសេនីយ៍ ហ៊ីង ប៊ុនហៀង ចូលក្នុងបញ្ជីខ្មៅ ដែលត្រូវបង្កកទ្រព្យសម្បត្តិ ដោយលើកឡើងថា លោក ហ៊ីង ប៊ុនហៀង ដែលជាដៃស្តាំរបស់លោកនាយករដ្ឋមន្ត្រីហ៊ុនសែន បានចូលដៃរំលោភសិទ្ធិមនុស្ស និងប្រជាធិបតេយ្យ នៅកម្ពុជា។
ក៏ប៉ុន្តែជាការឆ្លើយតប ខុទ្ទកាល័យនាយករដ្ឋមន្ត្រី ក្រសួងការបរទេស និងក្រសួងការពារជាតិកម្ពុជា ជាដើម បានចេញសេចក្តីថ្លែងការណ៍ដាច់ដោយឡែកពីក្នា កាលពីថ្ងៃទី១៣ ខែមិថុនា ឆ្នាំ២០១៨ ដោយសម្តែងការសោកស្តាយ ច្រានចោល និងថ្កោលទោស ចំពោះក្រសួងរតនាគារអាមេរិក ដែលបានសម្រេចដាក់ទណ្ឌកម្មនោះ។ កម្ពុជាបានហៅការបង្កកទ្រព្យសម្បត្តិលោកនាយឧត្តមសេនីយ៍ ហ៊ីង ប៊ុនហៀង ថា ជាការរំលោភច្បាប់របស់កម្ពុជា ដែលជារដ្ឋអធិបតេយ្យមួយ យ៉ាងអយុត្តិធម៌ ហើយគ្មានភស្តុតាងអ្វីទាំងអស់។
យ៉ាងណាក៏ដោយ អតីតមេដឹកនាំគណបក្សសង្គ្រោះជាតិ បានគាំទ្រនូវចំណាត់ការរបស់អាមេរិកនេះ ហើយបានស្នើឲ្យសហរដ្ឋអាមេរិក ចាត់វិធានការបន្ថែមទៀតលើរាជរដ្ឋាភិបាលកម្ពុជាបច្ចុប្បន្ន ដែលបានរំលាយគណបក្សសង្គ្រោះជាតិ ហើយមិនឲ្យអតីតគណបក្សប្រឆាំងនេះ ចូលរួមការបោះឆ្នោត នាខែកក្កដាខាងមុខនោះ៕
