លិខិតផ្លូវការរបស់ទីស្តីការគណៈរដ្ឋមន្ត្រី ដែលទើបតែផ្សព្វផ្សាយកាលពីរសៀលថ្ងៃទី២១ ខែតុលា ឆ្នាំ២០១៦ បង្ហាញថា រាជរដ្ឋាភិបាលកម្ពុជាបានបើកកិច្ចប្រជុំគណៈកម្មាធិការសន្តិសុខអាកាសយានដ្ឋានអន្តរជាតិ ដោយមានទាំងចំណាររបស់លោកនាយករដ្ឋមន្ត្រី ហ៊ុនសែន កាលពីថ្ងៃទី២៦ ខែកញ្ញា ឆ្នាំ២០១៦ បានសម្រេចដាក់ចេញនូវវិធានការមួយចំនួនដើម្បីទប់ស្កាត់ រារាំង និងហាមឃាត់ មិនឲ្យលោកសមរង្ស៊ីចូលក្នុងប្រទេសកម្ពុជាឡើយ។
លិខិតចុះថ្ងៃទី១២ ខែតុលា ឆ្នាំ២០១៦ ចុះហត្ថលេខាដោយលោក តិករ៉េត សំរេច រដ្ឋលេខាធិការទីស្តីការគណៈរដ្ឋមន្ត្រី ជូនលោកនាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្តោប្រវេសន៍ បង្ហាញថា "ដើម្បីចាត់វិធានការបង្ការទុកមុន ក្នុងការទប់ស្កាត់បុគ្គលសមរង្ស៊ី ប្រធានគណបក្សសង្គ្រោះជាតិ កុំឲ្យវិលមកកម្ពុជាវិញ ដោយអាជ្ញាធរមានសមត្ថកិច្ចមិនបានដឹងជាមុន ទីស្តីការគណៈរដ្ឋមន្ត្រីបានចាត់តាំងកិច្ចប្រជុំគណៈកម្មាធិការសន្តិសុខ កាលពីថ្ងៃទី២៩ ខែកញ្ញា ឆ្នាំ២០១៦... អង្គប្រជុំបានលើកវិធានការមួយចំនួន"។
លិខិតដដែលបានលើកឡើងនូវវិធានការ ៤ ចំណុច រួមមាន៖
១-គ្រប់ក្រុមហ៊ុនអាកាសចរទាំងអស់ដែលធ្វើប្រតិបត្តិការហោះហើរមកកម្ពុជាមិនត្រូវអនុញ្ញាតឲ្យបុគ្គលនេះឡើងយន្តហោះមកកម្ពុជាទេ ហើយត្រូវផ្តល់របាយការណ៍ទៀងទាត់ក្នុងករណីបុគ្គលនេះទិញសំបុត្រយន្តហោះធ្វើដំណើរមកកម្ពុជា។
២-ក្នុងករណី ដែលបុគ្គល សម រង្ស៊ី ធ្វើដំណើរមកកាន់កម្ពុជា តាមរយៈយន្តហោះណាមួយ យន្តហោះនោះ នឹងត្រូវបង្វែរឲ្យវិលត្រលប់ទៅកាន់អាកាសយានដ្ឋានដើមវិញ ដោយមិនអនុញ្ញាតឲ្យធ្វើការចុះចតនៅកម្ពុជាឡើយ។
៣-ក្នុងករណីយន្តហោះដឹកបុគ្គលសមរង្ស៊ី ចុះចតដល់អាកាសយានដ្ឋានណាមួយនៅកម្ពុជានឹងមិនត្រូវបានអនុញ្ញាតឲ្យភ្ញៀវចាកចេញពីយន្តហោះឡើយ និងត្រូវបញ្ជាឲ្យត្រឡប់ទៅអាកាសយានដ្ឋានដើមវិញ។
៤-ក្នុងករណី ដែលបុគ្គលនេះបានចាកចេញផុតពីយន្តហោះ នគរបាលអន្តោប្រវេសន៍ត្រូវចាត់វិធានការតាមផ្លូវច្បាប់ ដើម្បីកុំឲ្យបុគ្គលនេះចូលក្នុងកម្ពុជាបាន និងចាត់វិធានការផ្សេងទៀត តាមការចាំបាច់។
ទាក់ទងវិធានការនេះ ត្រូវបានលោកនាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្តោប្រវេសន៍របស់ប៉ូលិសក្រសួងមហាផ្ទៃ បានលើកឡើងថា លោកទើបតែបានទទួលលិខិតនោះ តែមិនទាន់ចាត់វិធានការបែបណានៅឡើយទេ ដោយរង់ចាំឆ្លងការសម្រេចពីរដ្ឋមន្ត្រីក្រសួងមហាផ្ទៃ លោកឧបនាយករដ្ឋមន្ត្រី សខេង ជាមុនសិន។
(សំឡេងលោក សុខ ផល )
ជាការកត់សម្គាល់ វិធានការរារាំងរបស់រដ្ឋាភិបាលមិនឲ្យលោកសមរង្ស៊ី ជាន់ដីខ្មែរដូច្នេះ ត្រូវបានផ្សព្វផ្សាយក្រោយពីលោកសមរង្ស៊ី ប្រធានគណបក្សសង្គ្រោះជាតិ បានចេញសេចក្តីប្រកាសជាផ្លូវការតាមហ្វេសប៊ុករបស់លោកថា លោកនឹងវិលត្រឡប់មកប្រទេសកម្ពុជាវិញ ដើម្បីចូលក្នុងពន្ធនាគារជាថ្នូរនឹងការដោះលែងសកម្មជនគណបក្សសង្គ្រោះជាតិ៕
