តើថ្ងៃទី ២៦មករា ជាទិវាបុណ្យជាតិអូស្រ្តាលីទិវាលុកលុយឈ្លានពានឬទិវានៃការរស់រានមានជីវិត? តើវាខុសពីទិវា៧មករាយ៉ាងដូចម្តេច?
ថ្ងៃទី២៦មករា គឺជាថ្ងៃចម្រូងចម្រាស់មួយនៅក្នុងទស្សនៈរបស់ប្រជាជនអូស្រ្តាលី។
អត្ថន័យនៃថ្ងៃបុណ្យអូស្រ្តាលី បានពាក់ព័ន្ធចាប់តាំងពីដំបូងក្នុងដើមទសវត្សរ៍ទី១៩។ រហូតសព្វថ្ងៃនេះ ពលរដ្ឋអូស្រ្តាលីភាគច្រើនជឿជាក់ថា ជាទិវាបុណ្យជាតិនៃការអបអរសាទរនិងជាការគោរពដល់ប្រជាជនដើមនិងប្រវត្តិសាស្រ្តរបស់ពួកគេ។
សម្រាប់ពលរដ្ឋអូស្រ្តាលីខ្លះ ជាពិសេសក្នុងចំណោមជនជាតិភាគតិច Aboriginal និង Torres Strait Islander ថ្ងៃទី២៦មករាមិនមែនជាថ្ងៃអបអរសាទរនោះទេ ប៉ុន្តែវាជាថ្ងៃរំលឹកដល់ការឈ្លានពាន ការតាំងអាណានិគមរបស់ជនជាតិអង់គ្លេសដែលមកតាំងទីនៅលើកោះដែលមានម្ចាស់រួចទៅហើយ។
ស្រដៀងគ្នានេះដែរ មានការយល់ឃើញខុសគ្នាចំពោះថ្ងៃបុណ្យ 7 មករា ដែលរដ្ឋាភិបាលកម្ពុជាកំណត់ថាជាថ្ងៃជ័យជំនះ៧មករា ជាថ្ងៃកំណើតទីពីរ ជាថ្ងៃរំដោះដែលកងទ័ពវៀតណាមជួយរំដោះប្រទេសកម្ពុជាចេញពីរបបខ្មៅងងឹត ៣ឆ្នាំ៨ខែ២០ថ្ងៃ។
តែចំពោះប្រជាជនខ្មែរមួយចំនួនយល់ឃើញថា ថ្ងៃ៧មករានេះ គឺជាថ្ងៃដែលកងទ័ពវៀតណាម ចូលលុកលុយឈ្លានពានក្នុងប្រទេសកម្ពុជាទៅវិញ។
សូមស្តាប់ប្រសាសន៍របស់លោក ជា យូហ៊ន ប្រធានសមាគមខ្មែរនៃរដ្ឋវិចថូរៀ ដែលបានបង្ហាញពីគំនិតយល់ឃើញផ្ទាល់ខ្លួនរបស់លោក ចំពោះថ្ងៃបុណ្យ ៧មករានេះ។ លោកថា វាមិនអាចប្រៀបធៀបទៅនឹងថ្ងៃបុណ្យជាតិអូស្រ្តាលីបាននោះទេ។
(សំឡេង លោក ជា យូហ៊ន)
ជាមួយគ្នានេះ លោក តាក ម៉េងហ៊ាង សមាជិកសភានៃរដ្ឋវិចថូរៀ និងជាសកម្មជនមួយរូបដែលបានចូលរួមយ៉ាងសកម្មនៅក្នុងការប្រឆាំងចំពោះការរំលឹកគុណថ្ងៃ៧មករា ថាជាថ្ងៃរំដោះជាតិ ជាថ្ងៃកំណើតទីពីរសម្រាប់ប្រជាពលរដ្ឋកម្ពុជានោះ ក៏បានប្រាប់SBS ខ្មែរយ៉ាងដូច្នេះថា៖
(សំឡេង តាក ម៉េងហ៊ាង)
សូមបញ្ជាក់ថា នៅថ្ងៃទី២៦មករា តែងតែមានការប្រារព្ធពិធីស្បថចូលសញ្ជាតិ ដើម្បីផ្តល់សញ្ជាតិអូស្រ្តាលីដល់ជនចំណូលថ្មីដែលមានសិទ្ធិឲ្យកា្លយទៅជាពលរដ្ឋអូស្រ្តាលីយ៉ាងពិតប្រាកដ។
(សំឡេង លោក ជា យូហ៊ន)
សម្រាប់មនុស្សជាច្រើន ជំហានចុងក្រោយក្នុងការក្លាយខ្លួនជាពលរដ្ឋអូស្រ្តាលីនោះគឺការស្បថចូលសញ្ជាតិនេះឯង៕
