បន្ទាប់ពីរដ្ឋាភិបាលកម្ពុជាបានរំលាយគណបក្សប្រឆាំងចំបងតែមួយគត់នៅក្នុងប្រទេសកម្ពុជាគឺគណបក្សសង្គ្រោះជាតិកាលពីចុងឆ្នាំ២០១៧(ខែវិច្ឆិកា)មក ប្រជាពលរដ្ឋខ្មែរមួយចំនួននៅតាមបណ្តាប្រទេសនានាទូទាំងសកលលោក រួមទាំងប្រទេសអូស្រ្តាលីផងដែរបានថ្កោលទោសចំពោះទង្វើនេះ ហើយបានរកវិធីសាស្រ្តគ្រប់បែបយ៉ាងដាក់សម្ពាធដល់រដ្ឋាភិបាលកម្ពុជា ដើម្បីឲ្យគណបក្សសង្រ្គោះជាតិរស់រានមានជីវិតឡើងវិញនៅមុនពេលបោះឆ្នោតជាតិ។
ទោះបីជាក្តីសង្ឃឹមហាក់នៅឆ្ងាយពីការពិត យ៉ាងណាក្តី ក៏សកម្មជនទាំងនោះមិនបានបោះបង់ការតាំងចិត្តរបស់ពួកគេឡើយ។
មួយរយៈចុងក្រោយនេះ មានយុទ្ធនាការជាច្រើនផ្សព្វផ្សាយតាមបណ្តាញសង្គមនានា ពិសេសបណ្តាញសង្គមហ្វេសបុក ដើម្បីឲ្យប្រជាពលរដ្ឋខ្មែរដែលមានសិទ្ធិបោះឆ្នោត ធ្វើពហិការកុំទៅបោះឆ្នោតនៅថ្ងៃអាទិត្យនេះ រួមមានដូចជា យុទ្ធនាការម្រាមដៃស្អាត ដេកផ្ទះឈ្នះឯង ជាដើម។
លោកហុង លីម ជាតំណាងរាស្រ្តដើមកំណើតខ្មែរមួយរូបនៅក្នុងរដ្ឋវិចថូរៀ និងជាប្រធានសហព័ន្ធខ្មែរអូស្រ្តាលីសាជីវកម្ម និយាយថា ដូចគ្នានឹងប្រទេសដទៃទៀតដែលមានពលរដ្ឋខ្មែរយើងរស់នៅដែរ ក្នុងប្រទេសអូស្រ្តាលីនឹងមានការប្រមូលផ្តុំគ្នានៅតាមបណ្តារដ្ឋធំៗមួយចំនួនដើម្បីដាក់សម្ពាធដល់រដ្ឋាភិបាលអូស្រ្តាលីកុំឲ្យទទួលស្គាល់លទ្ធផលការបោះឆ្នោតនៅកម្ពុជា។
(សំឡេងលោក ហុងលីម)
លោក ហុងលីម យល់ឃើញថា គោលជំហររបស់រដ្ឋាភិបាលអូស្រ្តាលីចំពោះការបោះឆ្នោតនៅកម្ពុជានេះជាទំហរដែលទន់ខ្សោយ មិនដាច់ណាត់រឹងមាំដូចសហរដ្ឋអាម៉េរិក ។
ដោយឡែកនៅក្រុងស៊ីដនី ក៏នឹងមានយុទ្ធនាការស្រដៀងគ្នានេះផងដែរ។ អ្នកស្រីគង់ ស្រីទូច សកម្មជនមួយរូបគាំទ្រគណបក្សសង្រ្គោះជាតិនៅក្រុងស៊ីដនីបានឲ្យដឹងយ៉ាងដូច្នេះថា៖
(សំឡេងអ្នកស្រី គង់ ស្រីទូច)
មិនខុសគ្នាឡើយ នៅឯទីក្រុងអាឌឺឡែតនៃរដ្ឋអូស្រ្តាលីខាងត្បូងឯណោះវិញ តំណាងសហព័ន្ធខ្មែរអូស្រ្តាលី លោកខៀវដារ៉ាក៏បានឲ្យដឹងផងដែរពីគោលបំណងនៃការរៀបចំការប្រមូលផ្តុំនៅក្នុងតំបន់លោក។
(សំឡេងលោក ខៀវដារ៉ា)
ស្របពេលជាមួយគ្នានេះដែរ ក្រុមអ្នកគាំទ្ររដ្ឋាភិបាលលោក ហ៊ុន សែន វិញ ក៏កំពុងតែធ្វើយុទ្ធនាការដូចគ្នា តាមរយៈការឃោសនានានា ជាពិសេសនៅលើបណ្តាញសង្គម ឃើញមានការប្តូរប្រូហ្វែលរូបភាពដាក់ថា ខ្ញុំទៅបោះឆ្នោតព្រោះខ្ញុំស្រឡាញ់ប្រទេសខ្ញុំ ខ្ញុំទៅបោះឆ្នោតដើម្បីរក្សាសន្តិភាពនិងស្ថិរភាពជាតិយើងជាដើម។
សូមបញ្ជាក់ថា៖ ការបោះឆ្នោតជ្រើសតាំងតំណាងរាស្ត្រ នីតិកាលទី៦ នឹងប្រព្រឹត្តទៅនៅថ្ងៃអាទិត្យទី២៩ ខែកក្កដា ឆ្នាំ២០១៨ ដោយមានការិយាល័យបោះឆ្នោតសរុបចំនួន ២២.៩៦៧ ការិយាល័យ៕
