កាលពីព្រឹកថ្ងៃទី៧កុម្ភៈ ដើមបណ្តឹងម្នាក់ គឺកញ្ញា ធី សុវណ្ណថា បានចូលទៅការពារបណ្តឹងរបស់ខ្លួន ហើយបានទាមទារជំងឺចិត្តពី២៥ម៉ឺនដុល្លារដល់៥០ម៉ឺនដុល្លារ។
ពាក្យបណ្តឹងដែលកញ្ញា ធី សុវណ្ណថា បានប្តឹងលោក សម រង្ស៊ី ពីបទបរិហារកេរ្តិ៍នោះ គឺបន្ទាប់ពីមេបក្សប្រឆាំងរូបនេះបានលើកឡើងថា លោកនាយករដ្ឋមន្ត្រី ហ៊ុន សែន បានសូកលុយ ១លានដុល្លារអាមេរិក ដល់កញ្ញា ធីសុវណ្ណថា ដើម្បីធ្វើសកម្មភាពបំបែកគណបក្សសង្គ្រោះជាតិ។
ប៉ុន្តែ ធី សុវណ្ណថា ចាត់ទុកការចោទប្រកាន់នេះថាគ្មានមូលដ្ឋាន និងប្តឹងទារជំងឺចិត្តឡើងដល់ ៥០ ម៉ឺនដុល្លារ ដើម្បីយកទៅអភិវឌ្ឍន៍នៅតំបន់អារ៉ែង។
ពាក្យបណ្តឹងដូចគ្នានេះ ក៏ត្រូវបានមេធាវីលោកនាយករដ្ឋមន្ត្រី ហ៊ុន សែន ប្តឹងលោក សម រង្ស៊ី ដោយទារសំណងជំងឺចិត្ត ១ លានដុល្លារ។
ទាំងនេះ គឺជាពាក្យបណ្តឹងថ្មីបំផុតបន្ថែមទៀត ខណៈដែលលោក សមរង្ស៊ី កំពុងរួតរឹតដោយបណ្តឹងជាច្រើន។
លោកសមរង្ស៊ី អាចនឹងត្រូវតុលាការរឹបអូសទ្រព្យសម្បត្តិ ដើម្បីសងជំងឺចិត្តដើមបណ្តឹងប្រសិនបើគាត់ចាញ់ក្តី។ នេះបើតាមការប្រកាសរបស់លោកនាយករដ្ឋមន្ត្រី ហ៊ុនសែន កាលពីប៉ុន្មានថ្ងៃមុននេះ៕
