ស្ថានភាពជំងឺរបស់លោកកឹមសុខា ត្រូវបានមេធាវីរបស់លោក លើកមកសំអាង ដើម្បីស្នើសុំចៅក្រមតុលាការសាលាឧទ្ធរណ៍ សុំឲ្យលោកកឹមសុខា នៅក្រៅពន្ធនាគារ។ ក៏ប៉ុន្តែត្រូវបានចៅក្រមបដិសេធ ហើយបានសម្រេចបន្តឃុំខ្លួនលោកកឹមសុខា នៅពន្ធនាគារបន្តទៀត។
លោក កឹមសុខា ស្ថិតក្នុងឯកសណ្ឋានមិនមែនជាអ្នកទោស គឺស្លៀកពាក់ស៊ីវិលធម្មតា ដោយពាក់អាវសាច់ក្រណាត់ ពណ៌ផ្ទៃមេឃ ដៃវែង មិនតឺនុយ និងខោជើងវែង ពណ៌ខ្មៅ ពាក់ស្បែកជើងផ្ទាត់ ហើយដៃមិនជាប់ខ្នោះនោះទេ។ លោកត្រូវបានប៉ូលិសនាំពីពន្ធនាគារត្រពាំងផ្លុង មកដល់តុលាការសាលាឧទ្ធរណ៍ នៅរាជធានីភ្នំពេញ តាំងពី ៥ ទៀបភ្លឺ ថ្ងៃទី១ ខែកុម្ភៈ ឆ្នាំ២០១៨ ដើម្បីចូលរួមសវនាការលើបណ្តឹងសុំនៅក្រៅឃុំ។ លោកកឹមសុខា រាងស្គមជាងមុន បានអង្គុយក្នុងបន្ទប់រង់ចាំ នៅតុលាការសាលាឧទ្ធរណ៍ ក្នុងសភាពបាក់ទឹកចិត្តយ៉ាងខ្លាំង និងអាការៈដូចមនុស្សមិនសូវមានកំលាំងកំហែងនោះឡើយ។
លោកស្រី ម៉េង សុភារី សហមេធាវីការពារក្តីរបស់លោកកឹមសុខា បានប្រាប់អ្នកកាសែត ក្រោយតុលាការឧទ្ធរណ៍សម្រេចបន្តឃុំខ្លួនលោកកឹមសុខា យ៉ាងដូច្នេះថា៖“លោក កឹម សុខា គាបសរសៃឈាម នៅស្មាខាងឆ្វេងវាប៉ះពាល់ ធ្វើឲ្យលោកសម្រាន្តមិនបានលក់គ្រប់គ្រាន់ ហើយពេលគាត់សម្រាន្តមិនបាន ធ្វើឲ្យគាត់ឡើងជាតិស្ករ ធ្វើឲ្យគាត់ឡើងឈាមជាដើមអីចឹង។ អីចឹងវាប៉ះពាល់ទៅដល់រាងកាយផ្សេងៗទៀត ហើយបង្កើតឲ្យទៅជាបញ្ហាផ្សេងៗទៀត។ បញ្ហាដែលគាបសរសៃឈាមនេះ គឺក្រុមគ្រូពេទ្យនៅសឹង្ហបុរី បានឲ្យគាត់ទៅធ្វើការវះកាត់មុនពេលគាត់ជាប់ពន្ធនាគារ។ តែដោយសារគាត់រវល់ ហើយពេលនេះ គាត់ជាប់ពន្ធនាគារ ជំងឺនឹងកាន់តែធ្វើទុក្ខគាត់ រហូតដល់ហើមស្មាខាងឆ្វេង។ អីចឹងគាត់សុំចេញទៅព្យាបាលជំងឺនឹង”។
ចំណែកមន្ត្រីជាន់ខ្ពស់ក្រសួងមហាផ្ទៃ បានឲ្យដឹងថា លោកកឹមសុខា ក៏មានជំងឺទឹកនោមផ្អែម ដែលភរិយារបស់លោក បានយកថ្នាំទៅឲ្យលោកកឹមសុខា ជាប្រចាំផងដែរ នៅពន្ធនាគារត្រពាំងផ្លុង ក្នុងខេត្តត្បូងឃ្មុំ ជាប់ព្រំដែនវៀតណាម។ ជំងឺរបស់លោកកឹមសុខានេះ គឺជាជំងឺ ដែលមើលមិនជា ហើយក៏ប្រឈមនឹងសេចក្តីស្លាប់គ្រប់ពេល។
លោក កឹម សុខា មានអាយុ ៦៤ ឆ្នាំ ត្រូវបានសមត្ថកិច្ចចាប់ខ្លួនទាំងយប់រំលងអាធ្រាត្រ នៅផ្ទះរបស់លោក នាថ្ងៃទី២ ឈានចូល ថ្ងៃទី៣ ខែកញ្ញា ឆ្នាំ២០១៧ បន្ទាប់ពីមានការបែកធ្លាយវីដេអូមួយ បង្ហាញថា លោកបានសារភាពអំពីការអនុវត្តតាមការបង្គាប់បញ្ជារបស់សហរដ្ឋអាមេរិក ក្នុងគោលបំណងផ្តួលរំលំរាជរដ្ឋាភិបាលកម្ពុជា ជាយូរណាស់មកហើយ។
លោក កឹម សុខា ត្រូវបានតុលាការឃុំខ្លួន ដាក់ពន្ធនាគារបណ្តោះអាសន្ន នៅពន្ធនាគារត្រពាំងផ្លុង កាលពីថ្ងៃទី០៦ ខែកញ្ញា ឆ្នាំ២០១៧ ដោយចោទប្រកាន់ពីបទ «សន្និដ្ឋិភាពជាមួយបរទេស» តាមមាត្រា៤៤៣ នៃក្រមព្រហ្មទណ្ឌ ឬបទ«ក្បត់ជាតិ» ដែលអាចប្រឈមមុខនឹងការជាប់ពន្ធនាគារពី ១៥ឆ្នាំ ទៅ ៣០ឆ្នាំ៕
