លោក ម៉ម សូណង់ដូ បានប្រកាសលាលែងពីឆាកនយោបាយនិងជាប្រធានវិទ្យុសំបុកឃ្មុំ តាមរយៈលិខិតមួយដែលបានធ្វើឡើង កាលពីថ្ងៃទី១ ខែមករា ឆ្នាំ២០១៨ ខណៈដែលលោក កំពុងរស់នៅទីក្រុងប៉ារីស ប្រទេសបារាំង។ មូលហេតុនៃការលាលែងនេះ ត្រូវបានលោកម៉មសូណង់ដូ បញ្ជាក់ថា គឺដើម្បីផ្ទេរវេនជូនដល់អ្នកនយោបាយវ័យក្មេងបន្តកាតព្វកិច្ចសេ្នហាជាតិនេះតទៅទៀត។
ក្នុងលិខិត លោកម៉មសូណង់ដូ បានបូកសរុបលទ្ធផល ដែលលោកបានបម្រើសង្គមជាតិខ្មែរ គិតចាប់តាំងពីឆ្នាំ១៩៩៥ រហូតមកដល់ថ្ងៃទី៣១ ខែធ្នូ ឆ្នាំ២០១៧ គឺរយៈពេល ២២ ឆ្នាំ ដែលលោកម៉មសូណង់ដូ មានមោទនភាពក្នុងជីវិតរបស់លោក ក្នុងនាមជាកូនខ្មែរ។ លោក បានលើកយកសកម្មភាព ៣ ចំណុច ក្នុងរយៈពេល ២២ឆ្នាំនេះ រួមមាន៖ ១-សកម្មភាពសប្បុរសធម៌ ដែលមិនប្រកាន់និន្នាការនយោបាយ ២-សកម្មភាពនយោបាយ ៣-សកម្មភាពបង្កើនការចេះដឹងរបស់ប្រជាពលរដ្ឋ។
លោក ម៉ម សូណង់ដូ បានប្រកាសថា តួនាទីប្រធានវិទ្យុសំបុកឃ្មុំ លោកសូមផ្ទេរតំណែងប្រធានវិទ្យុសំបុកឃ្មុំនេះ ជូនទៅលោកស្រី ឌិន ផាណារ៉ា ដែលជាប្រធានស្តីទី។
យ៉ាងណាក៏ដោយ លោក ម៉មសូណង់ដូ បានប្រកាសរក្សាសកម្មភាពតែមួយគត់ គឺសកម្មភាពសប្បុរសធម៌ មិនប្រកាន់និន្នាការនយោបាយ។
ជាការកត់សម្គាល់ លិខិតប្រកាសលាលែងរបស់លោកម៉មសូណង់ដូនេះ បានធ្វើឡើង បន្ទាប់ពីតុលាការសាលាដំបូងរាជធានីភ្នំពេញ បានចេញដីកាកោះហៅជាលើកទី៣ ឲ្យលោកម៉មសូណង់ដូ ឲ្យចូលបំភ្លឺនៅថ្ងៃទី១១ ខែមករា ឆ្នាំ២០១៧ ក្នុងនាមជាសាក្សី នៅក្នុងសំណុំរឿងរបស់លោកកឹមសុខា ពាក់ព័ន្ធនឹងអំពើក្បត់ជាតិ។
ក៏ប៉ុន្តែលោកម៉មសូណង់ដូ ដែលធ្លាប់ជាប់ពន្ធនាគារជាមួយលោកកឹមសុខា នៅព្រៃស កាលពីអំឡុងចុងឆ្នាំ២០០៥ និងដើមឆ្នាំ២០០៦ បានប្រកាសមិនចូលបំភ្លឺនៅតុលាការឡើយ។
កើតនៅថ្ងៃទី១៣ ខែកុម្ភៈ ឆ្នាំ១៩៤២ លោកម៉មសូណង់ដូ បានចាកចេញពីកម្ពុជា ទៅរស់នៅប្រទេសបារាំង ក្នុងឆ្នាំ១៩៦៤ ដើម្បីរៀនផ្នែកថតរូប និងថតខ្សែភាពយន្ត។ នៅឆ្នាំ១៩៩៤ លោកម៉មសូណង់ដូ បានត្រឡប់មករស់នៅប្រទេសកម្ពុជាវិញ។ នៅឆ្នាំ១៩៩៥-១៩៩៦ លោកម៉មសូណង់ដូ បានបង្កើតវិទ្យុសំបុកឃ្មុំ។ នៅឆ្នាំ១៩៩៧ ដល់ឆ្នាំ២០០១ លោកម៉មសូណង់ដូ ជាប្រធានគណបក្សសំបុកឃ្មុំសង្គមប្រជាធិបតេយ្យ។ ក្នុងឆ្នាំ២០១០ លោកម៉មសូណង់ដូ បានបង្កើតជាសមាគមមួយ ឈ្មោះថា សមាគមអ្នកប្រជាធិបតេយ្យ។
នៅឆ្នាំ២០១៥ លោកម៉មសូណង់ដូ បានបង្កើតគណបក្សសំបុកឃ្មុំសង្គមប្រជាធិបតេយ្យ ដើម្បីចូលរួមការបោះឆ្នោតឃុំសង្កាត់ កាលពីខែមិថុនា ឆ្នាំ២០១៧។ ក៏ប៉ុន្តែក្រោយការបោះឆ្នោតឃុំសង្កាត់ លោកម៉មសូណង់ដូ បានលាលែងពីប្រធានគណបក្ស ដោយសារតែគណបក្សលោក ទទួលបានអាសនៈនៅឃុំសង្កាត់តែ ១អាសនៈប៉ុណ្ណោះ។
លោក ម៉ម សូណង់ដូ ត្រូវរដ្ឋាភិបាលចាប់ឃុំខ្លួននៅពន្ធនាគារព្រៃសចំនួន ៣ លើក។ លើកទី១ ជាប់ពន្ធនាគារ ចំនួន ១១ ថ្ងៃ ចាប់ពីនៅថ្ងៃទី៣០ ខែមករា ឆ្នាំ២០០៣ ដល់នៅថ្ងៃទី១១ ខែកុម្ភៈ ឆ្នាំ២០០៣ ពីបទចោទប្រកាន់ញ៉ុះញ៉ុង ឲ្យមានបាតុកម្មប្រឆាំងស្ថានទូតសៀម។ លើកទី២-លោក ម៉ម សូណង់ដូ ត្រូវបានចាប់ឃុំខ្លួន នៅពន្ធនាគារព្រៃស ចំនួន ៩៩ ថ្ងៃ ចាប់ពីនៅថ្ងៃទី១១ ខែតុលា ឆ្នាំ២០០៥ រហូតដល់នៅថ្ងៃទី១៧ ខែមករា ឆ្នាំ២០០៦ ពីបទផ្សាយព័ត៌មានមិនពិត ពាក់ព័ន្ធនឹងសន្ធិសញ្ញាព្រំដែនបំពេញបន្ថែម ឆ្នាំ២០០៥។ លើកទី៣-នៅថ្ងៃទី១៥ ខែកក្កដា ឆ្នាំ២០១២ លោក ម៉ម សូណង់ដូ ត្រូវចាប់ឃុំខ្លួន ដោយសារតែរដ្ឋាភិបាលប្ដឹងពីបទអប្បគមន៍ និងបង្កើតរដ្ឋក្នុងរដ្ឋ ទាក់ទងករណីជម្លោះដីធ្លី នៅភូមិប្រមារ ខេត្តកំពង់ធំ។ លោកម៉មសូណង់ដូ ត្រូវបានកាត់ទោសឲ្យជាប់ពន្ធនាគារ ចំនួន ២០ ឆ្នាំ។ នៅថ្ងៃទី១៥ ខែមីនា ឆ្នាំ២០១៣ លោកម៉មសូណង់ដូ ត្រូវបានដោះលែងពីពន្ធនាគារ៕
