គណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប បានប្រកាសកាលពីថ្ងៃទី០៨ ខែឧសភា ថា មានគណបក្សនយោបាយចំនួន ១៣ បានតម្កល់ប្រាក់ ចំនួន ១៥លានរៀល ស្មើប្រមាណជិត ៤ពាន់ដុល្លារអាមេរិក ដើម្បីបំពេញបែបបទ ចុះបញ្ជី ចូលរួមប្រកួតប្រជែងការបោះឆ្នោត។
តាមសេចក្តីប្រកាសរបស់គ.ជ.ប គិតចាប់ពីថ្ងៃទី៣០ ខែមេសា រហូតមកដល់ថ្ងៃទី៨ ខែឧសភា មានគណបក្សនយោបាយចំនួន ១៣ គណបក្ស បានដាក់ពាក្យសុំតម្កល់ប្រាក់ ១៥លានរៀល នៅរតនាគារជាតិ។ គណបក្សនយោបាយទាំង ១៣ នោះ រួមមាន៖ ១. គណបក្សប្រជាជនកម្ពុជា ២. គណបក្សហ៊្វុនស៊ិនប៉ិច៣. គណបក្សសម្ព័ន្ធដើម្បីប្រជាធិបតេយ្យ ៤. គណបក្សខ្មែររួបរួមជាតិ ៥. គណបក្សសំបុកឃ្មុំសង្គមប្រជាធិបតេយ្យ ៦. គណបក្សសញ្ជាតិកម្ពុជា ៧. គណបក្សយុវជនកម្ពុជា ៨. គណបក្សពន្លឺថ្មី ៩. គណបក្សខ្មែរអភិវឌ្ឍន៍សេដ្ឋកិច្ច ១០. គណបក្សខ្មែរឈប់ក្រ ១១. គណបក្សប្រជាធិបតេយ្យមូលដ្ឋាន ១២. គណបក្សធម្មាធិបតេយ្យ និង១៣. គណបក្សសាធារណរដ្ឋប្រជាធិបតេយ្យ។
ជាមួយគ្នានោះ គជប ក៏បានបន្ថែមថា គិតមកដល់ថ្ងៃទី៨ ខែឧសភា មានគណបក្សនយោបាយចំនួន២២ បានទទួលទម្រង់បែបបទ ដើម្បីដាក់បញ្ជីបេក្ខជនគណបក្សនយោបាយ ឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោតតំណាងរាស្ត្រ នាថ្ងៃទី២៩ ខែកក្កដា ឆ្នាំ២០១៨។ ក្នុងចំណោមគណបក្សនយោបាយទាំង ២២ គណបក្សនោះ គឺមានគណបក្សចំនួន ៥ បានចុះបញ្ជីគណបក្សឈរឈ្មោះ និងបញ្ជីបេក្ខជនឈរឈ្មោះបោះឆ្នោតរួចរាល់ហើយ រួមមាន៖ គណបក្សប្រជាជនកម្ពុជា ដែលបានដឹកនាំប្រទេសកម្ពុជា ចាប់តាំងពីឆ្នាំ១៩៧៩ គណបក្សយុវជនកម្ពុជា គណបក្សសញ្ជាតិកម្ពុជា គណបក្សខ្មែររួបរួមជាតិ និងគណបក្សហ៊្វុនស៊ិនប៉ិច។ ក៏ប៉ុន្តែគជប បានពិនិត្យ និងទទួលស្គាល់ជាផ្លូវការនូវការចុះឈ្មោះគណបក្ស ៣ គឺគណបក្សប្រជាជនកម្ពុជា គណបក្សយុវជនកម្ពុជា និងគណបក្សសញ្ជាតិកម្ពុជា។
លោក ឌឹម សុវណ្ណារុំ សមាជិក និងជាអ្នកនាំពាក្យគជប បានបញ្ជាក់បន្ថែមយ៉ាងដូច្នេះ៖
( សំឡេង លោក ឌឹម សុវណ្ណារុំ )
សូមរម្លឹកថា ដំណើរការចុះឈ្មោះគណបក្សនយោបាយ និងចុះបញ្ជីបេក្ខជនឈរឈ្មោះបោះឆ្នោត ត្រូវបានគជប ចាប់ផ្តើមទទួល កាលពីថ្ងៃទី៣០ ខែមេសា ហើយត្រូវបញ្ចប់នៅល្ងាចថ្ងៃទី១៤ ខែឧសភា ឆ្នាំ២០១៨។ ក្នុងនោះ ក្រុមអតីតគណបក្សសង្គ្រោះជាតិ បានតវ៉ាជំទាស់នឹងការបោះឆ្នោតនេះ ហើយទាមទារឲ្យរាជរដ្ឋាភិបាល អនុញ្ញាតឲ្យគណបក្សខ្លួន ដែលត្រូវបានតុលាការសម្រេចរំលាយ កាលពីថ្ងៃទី១៦ ខែវិច្ឆិកា ឆ្នាំ២០១៧ ដោយរដ្ឋាភិបាលកម្ពុជា ចោទប្រកាន់ពីបទក្បត់ជាតិ ក្រោយការចាប់ខ្លួនលោកកឹមសុខានោះ អាចចូលរួមការបោះឆ្នោត នាថ្ងៃទី២៩ ខែកក្កដា។
ក៏ប៉ុន្តែលោកនាយករដ្ឋមន្ត្រី ហ៊ុន សែន បានប្រកាសយ៉ាងច្បាស់ថា អតីតគណបក្សសង្គ្រោះជាតិ ដែលត្រូវបានរំលាយនោះ មិនអាចរស់ឡើងវិញទេ ហើយក៏មិនមានការលុបចោល ឬពន្យារពេលបោះឆ្នោត នាថ្ងៃទី២៩ ខែកក្កដា ឆ្នាំ២០១៨ ឡើយ៕
