ជាលទ្ធផល គណបក្សប្រជាជនកម្ពុជា របស់លោកនាយករដ្ឋមន្ត្រី ហ៊ុន សែន ដែលកំពុងដឹកនាំប្រទេស ត្រូវបានសម្តេចព្រះសង្ឃរាជទាំងពីរគណៈ ចាប់ឆ្នោត បានឈរនៅលំដាប់លេខរៀងទី២០ ចុងក្រោយគេបង្អស់។ រីឯគណបក្សខ្មែររួបរួមជាតិរបស់លោកញឹកប៊ុនឆៃ បានលេខរៀងទី១ និងគណបក្សប្រជាធិបតេយ្យមូលដ្ឋាន របស់អតីតមេដឹកនាំអង្គការសង្គមស៊ីវិល ទទួលបានលេខរៀងទី៧ នៅលើសន្លឹកឆ្នោត។
ពិធីចាប់ឆ្នោតកំណត់លេខរៀងគណបក្សនយោបាយទាំង ២០នេះ ត្រូវបានធ្វើឡើងដោយសម្តេចព្រះសង្ឃរាជទាំង ២គណៈ នៅចំពោះមុខប្រធាន និងសមាជិក គជប តំណាងគណបក្សនយោបាយទាំងអស់ ស្ថាប័ន្ថពាក់ព័ន្ធ ស្ថានទូតចិន ស្ថានទូតថៃ អ្នកជំនាញការជប៉ុន JICA អ្នកជំនាញការកូរ៉េ KOICA មន្ត្រីអគ្គលេខាធិការដ្ឋាន គជប អ្នកសារព័ត៌មានជាតិ និងអន្តរជាតិ ជាច្រើនរូប។
ចំពោះការចាប់ឆ្នោតកំណត់លេខរៀងគណបក្សនយោបាយនេះ ត្រូវបានលោក ស៊ិក ប៊ុនហុក ប្រធានគ.ជ.ប បានលើកឡើងថា លទ្ធផលនៃការចាប់ឆ្នោតកំណត់លំដាប់លេខរៀងគណបក្សនយោបាយនៅលើសន្លឹកឆ្នោត មានអត្ថន័យសំខាន់ណាស់ សម្រាប់គណបក្សនយោបាយទាំងអស់ ដែលឈរឈ្មោះបោះឆ្នោត។ ការកំណត់លេខរៀងគណបក្សនយោបាយនីមួយៗ នៅលើសន្លឹកឆ្នោត នឹងជួយបង្កលក្ខណៈងាយស្រួលដល់គណបក្សនយោបាយពាក់ព័ន្ធក្នុងការឃោសនាបោះឆ្នោត និងជួយឲ្យអ្នកបោះឆ្នោតអាចស្គាល់បានដោយងាយស្រួលនូវគណបក្សនយោបាយ ដែលគាត់ស្រឡាញ់ពេញចិត្ត។
( សំឡេងលោក ស៊ិក ប៊ុនហុក ប្រធានគជប )
ចំពោះលទ្ធផលនៃការចាប់ឆ្នោតកំណត់លេខរៀងគណបក្សនយោបាយ នៅលើសន្លឹកឆ្នោត ដែលគណបក្សប្រជាជនកម្ពុជា ឈរនៅលំដាប់លេខរៀងទី២០ ខាងក្រោយគេបង្អស់នេះ ត្រូវបានលោកនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា បានលើកឡើងថា ជាលេខងាយស្រួលចំណាំ ដល់ពលរដ្ឋទូទាំងប្រទេស។ លេខ២០នេះ ក៏តំណាងឲ្យខួប ២០ឆ្នាំ នៃនយោបាយឈ្នះឈ្នះ ដែលនាំដល់ការបញ្ចប់សង្គ្រាមទាំងស្រុងនៅកម្ពុជា ក្រោយពីអតីតមេដឹកនាំខ្មែរក្រហម បានធ្វើសមាហរណកម្ម ចុះចូលជាមួយរាជរដ្ឋាភិបាលកម្ពុជា។
ដោយឡែក សម្រាប់គណបក្សប្រជាធិបតេយ្យមូលដ្ឋាន ដែលបង្កើតឡើងដោយអតីតមេដឹកនាំអង្គការសង្គមស៊ីវិល ដែលនិយមកណ្តាល តាមរយៈលោក សាម អ៊ីន អគ្គលេខាធិការគណបក្សនេះ បានចាត់ទុកថា លេខរៀងទី៧ របស់គណបក្សប្រជាធិបតេយ្យមូលដ្ឋាន ដែលសម្តេចព្រះសង្ឃរាជ ចាប់បាន នៅពេលនេះ តំណាងឲ្យស្មារតីលេខ៧ រស់ឡើងវិញហើយ។ លេខ៧ នៅលើសន្លឹកឆ្នោត កាលពីពេលបោះឆ្នោតជ្រើសតាំងតំណាងរាស្ត្រ ឆ្នាំ២០១៣ ជាលេខរៀងរបស់គណបក្សសង្គ្រោះជាតិ។ ប៉ុន្តែលើកនេះ គណបក្សសង្គ្រោះជាតិ ត្រូវបានតុលាការកំពូល ក្នុងប្រទេសកម្ពុជា សម្រេចរំលាយចោល កាលពីចុងឆ្នាំ២០១៧ ក្រោយការចាប់ឃុំខ្លួនលោកកឹមសុខា ប្រធានគណបក្សសង្គ្រោះជាតិ ដោយតុលាការ ចោទថា លោកកឹមសុខា ក្បត់ជាតិ តាមរយៈកិច្ចសហការជាមួយអាមេរិក ក្នុងបំណងផ្តួលរំលំរាជរដ្ឋាភិបាលកម្ពុជា។ ក៏ប៉ុន្តែតាមលោកកឹមសុខា បំណងផ្តួលគណបក្សប្រជាជនកម្ពុជានោះ គឺធ្វើឡើងតាមរយៈការបោះឆ្នោត ដូចប្រទេសប្រកាន់លទ្ធិប្រជាធិបតេយ្យ សេរីលើពិភពលោកផ្សេងទៀតប៉ុណ្ណោះ៕
