លោកហង្សពុទ្ធា ដែលទើបតែដឹកនាំគណៈប្រតិភូ គ.ជ.ប មកពីសង្កេតការណ៍បោះឆ្នោតនៅប្រទេសម៉ាឡេស៊ី កាលពីថ្ងៃទី១០ ខែឧសភា បានលើកឡើងថា ច្បាប់ហាមឃាត់មិនឲ្យគណបក្សនយោបាយ តវ៉ានឹងលទ្ធផលបោះឆ្នោត ត្រូវបានអនុវត្តរួចហើយ នៅប្រទេសម៉ាឡេស៊ី។
( សំឡេងលោក ហង្ស ពុទ្ធា )
លោក ហង្ស ពុទ្ធា សមាជិក និងជាអ្នកនាំពាក្យ គ.ជ.ប បានដឹកនាំគណៈប្រតិភូ គ.ជ.ប មួយក្រុម ទៅចូលរួមសង្កេតការណ៍បោះឆ្នោត នៅប្រទេសម៉ាឡេស៊ី កាលពីថ្ងៃទី០៩ ខែឧសភា ឆ្នាំ២០១៨។ លទ្ធផលនៃការបោះឆ្នោតនៅប្រទេសម៉ាឡេស៊ី ដែលមិនមានការតវ៉ាគណបក្សនយោបាយណានោះ បង្ហាញថា គណបក្សប្រឆាំងរបស់លោក មហាធា មហាម៉េត អតីតនាយករដ្ឋមន្ត្រីម៉ាឡេស៊ី បានឈ្នះការបោះឆ្នោត លើគណបក្សកាន់អំណាចរបស់លោកនាយករដ្ឋមន្ត្រី ណាជីប រ៉ាហ្សាក់។
លោក ហង្ស ពុទ្ធា បានលើកឡើងថា មុនពេលចាកចេញពីប្រទេសម៉ាឡេស៊ី ត្រឡប់មកកម្ពុជា លោកបានអញ្ជើញគណៈប្រតិភូបោះឆ្នោតរបស់ប្រទេសម៉ាឡេស៊ី និងគណៈប្រតិភូ នៃប្រទេសមួយចំនួនទៀត ឱ្យមកចូលរួមអង្កេតការណ៍បោះឆ្នោតជ្រើសតាំងតំណាងរាស្ត្រ នៅប្រទេសកម្ពុជា នាខែកក្កដាខាងមុខនេះ ហើយប្រទេសទាំងនោះ ជាពិសេសប្រទេសម៉ាឡេស៊ី ដែលជាសមាជិកអាស៊ាន បានយល់ព្រម នឹងបញ្ជូនអ្នកសង្កេតការណ៍បោះឆ្នោត មកចូលរួមតាមដានដំណើរការបោះឆ្នោត នៅប្រទេសកម្ពុជា នាថ្ងៃទី២៩ ខែកក្កដា ឆ្នាំ២០១៨៕
