ក្រសួងកសិកម្មនៅ​កម្ពុជា ចាប់​ផ្តើម​បើកវគ្គបណ្តុះបណ្តាល​មន្រ្តីកសិកម្មឃុំ

លោកបណ្ឌិត យ៉ងសាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានថ្លែងថា បន្ទាប់ពីទទួលបាននូវការបណ្តុះបណ្តាលតម្រង់ទិសដំបូង ដែលមានរយៈពេល ៤ថ្ងៃ ចាប់ពីថ្ងៃទី១៣ ដល់ថ្ងៃទី១៦ ខែកុម្ភៈ ឆ្នាំ២០២៤ រួច មន្ត្រីកសិកម្មឃុំទាំង ២៥០នាក់ ដែលទទួលការបណ្តុះបណ្តាលនេះ នឹងត្រូវចាត់បញ្ជូនឱ្យទៅបំពេញការងារ នៅតាមឃុំ ដែលបានជ្រើសរើស ចំនួន ២៥០ឃុំ ក្នុងស្រុកចំនួន ៨៩ នៅក្នុងខេត្តចំនួន ១៧។

( សំឡេង )

ក្រសួងកសិកម្ម រុក្ខាប្រមាញ់ និងនេសាទ បានប្រកាសថា ការដាក់ពង្រាយមន្ត្រីកសិកម្ម នៅតាមឃុំ-សង្កាត់ គឺជាការបង្ខិតសេវា ឱ្យទៅជិតប្រជាពលរដ្ឋ នៅមូលដ្ឋាន ដែលមានសកម្មភាពកសិកម្ម ដើម្បីឱ្យកសិករ នៅគ្រប់ឃុំ-សង្កាត់ទាំងនោះ ទទួលបានសេវាកសិកម្ម និងការប្រឹក្សាយោបល់បច្ចេកទេសផ្សេងៗ។

តាមរយៈគោលនយោបាយអាទិភាពនេះ ក្រសួងកសិកម្ម រុក្ខាប្រមាញ់ និងនេសាទ គ្រោងជ្រើសរើសមន្ត្រីកសិកម្មឃុំ-សង្កាត់ ចំនួន ១៦០០នាក់ ដើម្បីដាក់ពង្រាយនៅទូទាំងប្រទេស។ ក្នុងនោះ នៅចុងឆ្នាំ២០២៣ ក្រសួងកសិកម្ម រុក្ខាប្រមាញ់ និងនេសាទ បានជ្រើសរើសរួចហើយ នូវមន្ត្រីកសិកម្មឃុំ ចំនួន ២៥០នាក់។

នៅឆ្នាំ២០២៤ នេះ ក្រសួងកសិកម្ម ក៏គ្រោងនឹងជ្រើសរើសមន្ត្រីកសិកម្មឃុំ‐សង្កាត់ ចំនួន ៨០០នាក់ និងនៅឆ្នាំ២០២៥ ជ្រើសរើស ចំនួន ៥៥០នាក់ទៀត៕