គណបក្សខ្មែររួបរួមជាតិ បានអញ្ជើញលោក ញឹក ប៊ុនឆៃ ឲ្យឡើងធ្វើជាប្រធានដឹកនាំគណបក្សនេះជាថ្មីឡើងវិញ បន្ទាប់ពីលោក ញឹក ប៊ុនឆៃ ត្រូវបានតុលាការ សម្រេចដោះលែងចេញពីពន្ធនាគារ កាលពីយប់ថ្ងៃទី៣០ ខែមេសា។ យ៉ាងណាក៏ដោយ នៅពេលនេះ លោក ញឹក ប៊ុនឆៃ អតីតមេទ័ពរបស់គណបក្សហ៊្វុនស៊ិនប៉ិច បានស្នើសុំសំរាកព្យាបាលសុខភាពមួយរយៈសិន។
លោក សឹង្ហ គិរី ប្រធានគណបក្សខ្មែររួបរួមជាតិ ដែលជាគណបក្សរបស់លោកញឹកប៊ុនឆៃ ក្រោយបំបែកចេញពីគណបក្សហ៊្វុនស៊ិនប៉ិច បានឲ្យដឹងថា កាលពីព្រឹកថ្ងៃទី០១ ខែឧសភា ថ្នាក់ដឹកនាំគណបក្សខ្មែររួបរួមជាតិ បានចូលជួបសួរសុខទុក្ខលោកញឹកប៊ុនឆៃ នៅផ្ទះរបស់លោក នៅជ្រោយចង្វារ ក្នុងរាជធានីភ្នំពេញ។ ក្នុងពេលនោះ ថ្នាក់ដឹកនាំគណបក្ស បានស្នើសុំលោកញឹកប៊ុនឆៃ ដើម្បីមកដឹកនាំឡើងវិញ។ តែលោកថា សុំពេលមួយរយៈ ដើម្បីព្យាបាលសុខភាព។
ចំណែកលោក សុខ វិសាល អគ្គលេខាធិការគណបក្សខ្មែររួបរួមជាតិ បានឲ្យដឹងថា នៅពេលនេះ គណបក្សខ្មែររួបរួមជាតិ កំពុងរៀបចំបញ្ជីឈ្មោះបេក្ខជនឈរឈ្មោះបោះឆ្នោតតំណាងរាស្ត្រ នីតិកាលទី៦ ហើយក្នុងនោះ ក៏អាចនឹងរៀបចំឲ្យលោក ញឹក ប៊ុនឆៃ ឈរឈ្មោះឡើងវិញ ជាបេក្ខជនតំណាងរាស្ត្រ នៅមណ្ឌលខេត្តបន្ទាយមានជ័យ។
( សំឡេង លោក សុខ វិសាល )
សូមរម្លឹកថា លោក ញឹក ប៊ុនឆៃ អតីតប្រធានគណបក្សរួបរួមជាតិ ត្រូវបានដោះលែងចេញពីពន្ធនាគារ PJ កាលពីយប់ថ្ងៃទី៣០ ខែមេសា ឆ្នាំ២០១៨។ លោក ញឹក ប៊ុនឆៃ ត្រូវបានចាប់ឃុំនៅពន្ធនាគារ PJ កាលពីដើមខែសីហា ឆ្នាំ២០១៧ ពីបទសមគំនិតក្នុងបទផលិតគ្រឿងញៀន និងនាំចូលសារធាតុសម្រាប់ផ្សំគ្រឿងញៀន នៅខេត្តកំពង់ស្ពឺ កាលពីឆ្នាំ២០០៧។
លោក ញឹក ប៊ុនឆៃ ជាប្រធានគណបក្សមួយរូប ក្នុងចំណោមប្រធានគណបក្សនយោបាយ ៣ រូប ដែលត្រូវបានចាប់ឃុំខ្លួន ក្នុងបទល្មើសព្រហ្មទណ្ឌផ្សេងគ្នា។ ក្នុងនោះ លោក សួន សេរីរដ្ឋា អតីតប្រធានគណបក្សអំណាចខ្មែរ ត្រូវបានចាប់ឃុំខ្លួន កាលពីថ្ងៃទី១៣ ខែសីហា ឆ្នាំ២០១៧ ដោយសារតែប្រមាថកងទ័ពកម្ពុជា ពាក់ព័ន្ធនឹងជម្លោះព្រំដែនរវាងកម្ពុជា និងឡាវ។ ចំណែកលោក កឹម សុខា អតីតប្រធានគណបក្សសង្គ្រោះជាតិ ត្រូវបានចាប់ឃុំខ្លួន កាលពីយប់ថ្ងៃទី០៣ ខែកញ្ញា ឆ្នាំ២០១៧ ពាក់ព័ន្ធនឹងអំពើក្បត់ជាតិ ដោយសារតែឃុបឃិតជាមួយបរទេស ដើម្បីផ្តួលរំលំរាជរដ្ឋាភិបាលកម្ពុជា។
នៅពេលនេះ លោក ញឹក ប៊ុនឆៃ ដែលជាប់ឃុំមុនគេ ក៏ត្រូវបានដោះលែងមុនគេ ក្នុងចំណោមមេដឹកនាំគណបក្សនយោបាយ ៣ នាក់ ដែលជាប់ពន្ធនាគារ កាលពីឆ្នាំ២០១៧៕
