លោកនាយករដ្ឋមន្ត្រី ហ៊ុនសែន កាលពីថ្ងៃទី៩ធ្នូ ឆ្នាំ២០១៦ បានចេញសារាចរ លុបចោលការបង់ថ្លៃភាស៊ី ចំពោះប្រជាពលរដ្ឋលក់ដូរតាមកញ្ច្រែង កញ្ជើ ល្អី នៅទីកន្លែងលក់ដូរ និងទីផ្សារទូទាំងប្រទេសកម្ពុជា។ ការសម្រេចដូច្នេះ ត្រូវបានលោក ហ៊ុនសែន លើកឡើងថា ដើម្បីកាត់បន្ថយនូវភាពក្រីក្រ និងលើកកម្ពស់ជីវភាពរស់នៅរបស់ប្រជាពលរដ្ឋ។
សារាចរ បានលើកឡើងថា ដោយយកចិត្តទុកដាក់ជាប្រចាំដល់ជីវភាពរបស់ប្រជាពលរដ្ឋ ក្នុងគោលបំណងកាត់បន្ថយភាពក្រីក្រ និងលើកកម្ពស់ជីវភាពរបស់ប្រជាពលរដ្ឋ ព្រមទាំងកែលម្អសេវាសាធារណៈជូនប្រជាពលរដ្ឋ រាជរដ្ឋាភិបាលសម្រេចលុបការបង់ភាស៊ី និងការបង់ថ្លៃផ្សេងៗទៀត ចំពោះការលក់ដូររបស់ប្រជាពលរដ្ឋ តាមកញ្ច្រែង កញ្ជើ ល្អី នៅតាមទីផ្សារទូទាំងប្រទេស។
សារាចរបានកំណត់ថា ប្រជាពលរដ្ឋដែលលក់ដូរតាមកញ្ច្រែង កញ្ជើ ល្អី ត្រូវទទួលបានការអនុគ្រោះ និងការគាំពារ ដោយមិនបង់ថ្លៃលក់ដូរ រួមមាន៖ លក់ដូរតាមកញ្ច្រែង កញ្ជើ ល្អី តូចតាច នៅទីកន្លែងលក់ដូរ និងទីផ្សារទូទាំងប្រទេស អ្នកលក់កសិផលពីដំណាំដាំដុះ និងផលពីដំណាំធម្មជាតិ និងកន្លែងលក់ដូរ មានលក្ខណៈបណ្តោះអាសន្ន ក៏មិនតម្រូវឲ្យបង់ថ្លៃភាស៊ីនោះទេ។
ក្នុងសារាចរដដែល លោកនាយករដ្ឋមន្ត្រី ហ៊ុនសែន ក៏បានណែនាំដល់អាជ្ញាធររាជធានីខេត្ត ត្រូវរៀបចំគម្រោងកន្លែងលក់ដូរ ឬផ្សារ សម្រាប់អ្នកលក់ដូរតាមកញ្ច្រែង កញ្ជើ ល្អី និងអ្នកលក់ដូរក្រីក្រតូចតាច រួមទាំងធានាសន្តិសុខ សុវត្ថិភាព អនាម័យ និងបរិស្ថាន ប្រកបដោយការយកចិត្តទុកដាក់ខ្ពស់ផងដែរ៕
