លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម កាលពីព្រឹកថ្ងៃទី៨វិច្ឆិកា បានដឹកនាំមន្ត្រីកាំកុងត្រូលរួមទាំងអាជ្ញាធរចុះពិនិត្យកន្លែងលក់អង្ករនៅមុខស្ថានីយរថភ្លើងក្នុងរាជធានីភ្នំពេញ។ ក្នុងឱកាសនោះលោករដ្ឋមន្ត្រីបានគូសបញ្ជាក់ថា បញ្ហាអង្ករប្លាស្ទិកជារឿងប្រឌិត ដែលបង្កើតឡើងក្នុងចេតនាជាន់ពន្លិចសេដ្ឋកិច្ចខ្មែរ។
នៅពេលចុះពិនិត្យកន្លែងលក់អង្ករទាំងនោះ លោករដ្ឋមន្ត្រី ប៉ាន សូរស័ក្តិ បានមានប្រសាសន៍ទៅកាន់ក្រុមអ្នកកាសែតថា កម្ពុជាគ្មានទេអង្ករប្លាស្ទិក ហើយជនដែលបង្កើតបញ្ហានេះ គឺមានបំណងធ្វើវិទ្ធង្សនា ដល់ការនាំចេញអង្ករខ្មែរទៅកាន់ទីផ្សារអន្តរជាតិ ដែលកត្តានេះ អាចធ្វើឲ្យប៉ះពាល់ដល់ជីវភាពប្រជាពលរដ្ឋ និងសេដ្ឋកិច្ចរបស់កម្ពុជាទាំងមូល។
( សំឡេងលោកប៉ានសូរស័ក្តិ )
លោករដ្ឋមន្ត្រី បានបន្ថែមទៀតថា “បច្ចុប្បន្នក្រសួងពាណិជ្ជកម្ម កំពុងធ្វើការជាមួយស្ថាប័នពាក់ព័ន្ធ និងអាជ្ញាធរមានសមត្ថកិច្ច ដើម្បីស្វែងរកប្រភពវីដេអូ ដែលបង្ហោះចែកចាយតាមបណ្តាញសង្គម និងជនខិលខូច ដែលប្រឌិតបញ្ហានេះឡើង ដើម្បីយកមកផ្តន្ទាទោសតាមច្បាប់"។
លោករដ្ឋមន្ត្រី ប៉ាន សូរស័ក្តិ ក៏បានបញ្ជាក់ថា "នៅពេលឆាប់ៗខាងមុខនេះ អគ្គនាយកដ្ឋានកាំកុងត្រូលរបស់ក្រសួងពាណិជ្ជកម្ម នឹងដាក់សម្ពោធរថយន្តចល័ត ដែលមានសមត្ថភាពត្រួតពិនិត្យទំនិញខូចគុណភាព និងផលិតផលក្លែងក្លាយ ដើម្បីធានាថែរក្សាសុខមាលភាពរបស់ប្រជាជនថែមទៀត"។
សូមរម្លឹកថា កាលពីពេលថ្មីៗនេះនៅតាមហ្វេសប៊ុកមានការបង្ហោះនូវខ្លីបវិដេអូជាច្រើន ដែលប្រជាពលរដ្ឋអះអាងថា បានទិញអង្ករប៉ះចំអង្ករប្លាស្ទិក។ ពោលគឺអង្ករទាំងនោះដាំបាយហើយស្អិតជាប់គ្នា ហើយអ្នកខ្លះបានយកអង្ករនោះទៅដុតឆេះជាដើម៕
