ប្រាក់រង្វាន់នេះត្រូវបានរាជរដ្ឋាភិបាល ផ្តល់ឲ្យកងកម្លាំងសមត្ថកិច្ច នៅឆ្នាំ២០១៧ នៅក្នុងយុទ្ធនាការប្រឆាំងគ្រឿងញៀន ដំណាក់កាលទី១ និងដំណាក់កាលទី២។
នៅពេលនេះ ចាប់ពីថ្ងៃទី១ ខែមករា ឆ្នាំ២០១៨ ក្រសួងមហាផ្ទៃ កំពុងដាក់អោយអនុវត្តជាបណ្តោះអាសន្ននូវយុទ្ធនាការប្រយុទ្ធប្រឆាំងគ្រឿងញៀន ខុសច្បាប់ លើកទី៣។
ក្នុងពិធីបិទសន្និបាតបូកសរុបលទ្ធផលការងារឆ្នាំ២០១៧ និងលើកទិសដៅការងារ សម្រាប់អនុវត្តឆ្នាំ២០១៨ របស់រដ្ឋបាលរាជធានីភ្នំពេញ កាលពីរសៀលថ្ងៃទី០៧ ខែកុម្ភៈ ឆ្នាំ២០១៨ លោកឧបនាយករដ្ឋមន្ត្រី ស ខេង រដ្ឋមន្ដ្រីក្រសួងមហាផ្ទៃ បានប្រកាសថា សម្តេចនឹងផ្តល់ប្រាក់រង្វាន់លើកទឹកចិត្ត ចំនួនមួយម៉ឺនដុល្លារ ប្រសិនបើកម្លាំងសមត្ថកិច្ច បង្រ្កាបបានធាតុសុទ្ធនៃគ្រឿងញៀន ក្នុងមួយគីឡូក្រាម។
ជាមួយគ្នានោះ លោកឧបនាយករដ្ឋមន្ត្រី ស ខេង ក៏បានអំពាវនាវអោយមន្ត្រីកងកម្លាំងទាំងអស់ គោរពវិជ្ជាជីវៈ បំពេញការងារប្រយុទ្ធប្រឆាំងគ្រឿងញៀន ប្រកបដោយភាពពិតប្រាកដត្រឹមត្រូវ។ ក្រៅពីបញ្ហាគ្រឿងញៀន កងកម្លាំងទាំងអស់ ក៏ត្រូវពង្រឹងសន្តិសុខ សុវត្ថិភាព ស្ថិរភាពសង្គម ជូនប្រជាពលរដ្ឋ និងប្រទេសជាតិផងដែរ។
( សំឡេងលោកឧបនាយករដ្ឋមន្ត្រី ស ខេង )
កាលពីឆ្នាំ២០១៧ កងកម្លាំងសមត្ថកិច្ច បានបង្រ្កាបករណីជួញដូរ និងប្រើប្រាស់គ្រឿងញៀន បានចំនួន ៨១៧ករណី ដោយឃាត់ខ្លួនមនុស្សបាន ១៧៧៩៥ នាក់ ក្នុងនោះ មានស្រី្ត ១៥៨៤នាក់ ដកហូតសារធាតុញៀនគ្រប់ប្រភេទជិត ២០០គីឡូក្រាម កញ្ឆាក្រៀមជាង ១០០គីឡូក្រាម និងបំផ្លាញកញ្ឆាស្រស់ ៣០ម៉ឺនដើម។
យ៉ាងណាក៏ដោយ គ្រឿងញៀន បានរាលដាលក្នុងសង្គមកម្ពុជា ចាប់ពីទីក្រុង ទីប្រជុំជន រហូតដល់ជនបទ ពិសេសក្មេងៗ កំពុងញៀនថ្នាំញៀន ដែលជាកង្វល់របស់ឪពុកម្តាយមួយចំនួនផងដែរ៕
