លោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភា បានលើកឡើងថា សេចក្តីព្រាងច្បាប់មួយចំនួនដែលគណៈកម្មាធិការអចិន្ត្រៃយ៍រដ្ឋសភាប្រជុំពិភាក្សា នាព្រឹកថ្ងៃទី២៦តុលានេះរួមមាន៖ សេចក្តីព្រាងច្បាប់ស្តីពីបរិស្ថាន និងការប្រែប្រួលធាតុអាកាស សេចក្តីព្រាងច្បាប់ថវិកាជាតិឆ្នាំ២០១៧ ច្បាប់ទូទាត់ថវិកា សេចក្តីសម្រេចពីការដាក់ពិន័យលើអ្នកតំណាងរាស្ត្រ និងសេចក្តីស្នើច្បាប់របស់គណបក្សសង្គ្រោះជាតិពាក់ព័ន្ធតុលាការ។
លោក ឡេង ប៉េងឡុង ក៏បានបន្ថែមថា តំណាងរាស្ត្រគណបក្សសង្គ្រោះជាតិ ដែលជាប្រធានគណៈកម្មការជំនាញរដ្ឋសភាចំនួន ៥រូប និងជាសមាជិកគណៈកម្មាធិការអចិន្ត្រៃយ៍រដ្ឋសភា នឹងចូលរួមកិច្ចប្រជុំ នាព្រឹកថ្ងៃទី២៦តុលានេះ។
(សំឡេងលោក ឡេង ប៉េងឡុង)
សូមរម្លឹកថា អ្នកតំណាងរាស្ត្រគណបក្សសង្គ្រោះជាតិបានធ្វើពហិការមិនចូលរួមកិច្ចប្រជុំរដ្ឋសភាចាប់តាំងពីមានប្តឹងតាមចាប់ខ្លួនលោកកឹមសុខា ប្រធានស្តីទីគណបក្សសង្គ្រោះជាតិ កាលពីថ្ងៃទី២៦ ខែឧសភា ឆ្នាំ២០១៦។ ប៉ុន្តែកាលពីមុនបុណ្យភ្ជុំបិណ្ឌ អ្នកតំណាងរាស្ត្រគណបក្សសង្គ្រោះជាតិ ដែលជាសមាជិកគណៈកម្មាធិការអចិន្ត្រៃយ៍រដ្ឋសភា បានវិលចូលបំពេញការងារឡើងវិញ។ តែគណបក្សសង្គ្រោះជាតិ មិនបានចូលប្រជុំរដ្ឋសភាពេញអង្គ នៅថ្ងៃទី៧ ខែតុលា ឆ្នាំ២០១៦ បន្ទាប់ពីរដ្ឋសភាឈប់សម្រាក ៣ខែរួចមក។ កាលណោះតំណាងរាស្ត្រគណបក្សសង្គ្រោះជាតិសំអាងថា មានការគំរាមកំហែងដល់សុវត្ថិភាពរបស់ខ្លួន៕
