កាលពីព្រឹកថ្ងៃទី១២ ខែមេសា ឆ្នាំ២០១៨ អាជ្ញាធររាជធានីភ្នំពេញ បានបញ្ចេញរថយន្តក្រុងសាធារណៈ ចំនួន ៦០គ្រឿង ដើម្បីដឹកប្រជាពលរដ្ឋដោយឥតគិតថ្លៃ ពីភ្នំពេញ ទៅស្រុកកំណើត នៅតាមបណ្តាខេត្តនានា ដើម្បីចូលរួមពិធីបុណ្យចូលឆ្នាំថ្មីប្រពៃណីជាតិ។
នៅពេលចេញដំណើរនៅថ្ងៃដំបូង ព្រឹកថ្ងៃទី១២មេសានេះ មានប្រជាពលរដ្ឋយ៉ាងច្រើនកុះករ នាំគ្នាជិះរថយន្តក្រុង ឆ្ពោះទៅស្រុកកំណើតដោយក្តីរីករាយ និងសាទរចំពោះការផ្តល់រថយន្តជិះដោយឥតគិតថ្លៃ ចាប់ពីទី១២ ដល់ថ្ងៃទី១៨ ខែមេសា។
( សំឡេងប្រជាពលរដ្ឋ )
ឡានក្រុងជិះដោយឥតគិតថ្លៃទាំងនោះ បានចេញដំណើរពីភ្នំពេញ នៅម៉ោង ៥ ព្រឹក ថ្ងៃទី១២ ខែមេសា ដោយរត់លើផ្លូវ ៥ខ្សែ ចេញពីភ្នំពេញ ទៅកាន់ខេត្តកណ្ដាល ខេត្តព្រៃវែង ខេត្តស្វាយរៀង ខេត្តតាកែវ ខេត្តកំពត ខេត្តកែប កំពង់ស្ពឺ ខេត្តព្រះសីហនុ កំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តកំពង់ធំ និងខេត្តសៀមរាប។
លោក ឃួង ស្រេង អភិបាលរាជធានីភ្នំពេញ បានដឹកនាំមន្ត្រីជំនាញចុះពិនិត្យការរៀបចំឡានក្រុង ដើម្បីដឹកជញ្ជូនប្រជាពលរដ្ឋដោយឥតគិតថ្លៃ ពីភ្នំពេញ ទៅកាន់បណ្តាខេត្តនានា កាលពីព្រឹកថ្ងៃទី១២មេសា បានថ្លែងយ៉ាងដូច្នេះថា៖
( សំឡេងលោក ឃួង ស្រេង )
សូមរម្លឹកថា ក្រៅពីរថយន្តក្រុងរបស់សាលារាជធានីភ្នំពេញ គឺប្រជាពលរដ្ឋ ពិសេសអ្នករស់នៅភ្នំពេញ ក៏អាចជិះរថយន្តក្រុងដោយឥតគិតថ្លៃពីភ្នំពេញ ទៅកាន់ស្រុកកំណើតតាមបណ្តាខេត្តនានា តាមរយៈរថយន្តក្រុងរបស់ក្រុមហ៊ុនស្រាបៀរ Ganzberg ផងដែរ។
ដោយឡែក ឡានក្រុង ដឹកអ្នកដំណើរ ដែលជាក្រុមហ៊ុនឯកជន បានឡើងថ្លៃ នៅមុនថ្ងៃចូលឆ្នាំ នាពេលនេះ។ ឡានក្រុងទាំងនោះ មិនត្រឹមឡើងថ្លៃ ១ ភាគ ៣ នៃតម្លៃសំបុត្រធម្មតាទេ តែថែមទាំងរកសំបុត្រទិញជិះមិនបានទៀតផង។ អ្នកដំណើរ ដែលកំពុងរង់ចាំជិះឡានក្រុង នៅក្រុមហ៊ុនឯកជនដឹកអ្នកដំណើរមួយ ក្នុងរាជធានីភ្នំពេញ បានថ្លែងយ៉ាងដូច្នេះ៖
( សំឡេង )
ការឡើងថ្លៃសំបុត្រឡានក្រុង នៅពេលមានបុណ្យទានដូច្នេះ ជារឿងធម្មតាទៅហើយ សម្រាប់ប្រទេសកម្ពុជា។ ពោលគឺអ្នករត់ឡានឈ្នួល និងក្រុមហ៊ុនឯកជនដឹកជញ្ជូនអ្នកដំណើរភាគច្រើន បានឡើងថ្លៃ ស្រេចតែចិត្ត ដោយសំអាងថា មកពីប្រេងសាំងថ្លៃ ហើយថា ពេលបុណ្យដូច្នេះ ថ្លៃចំណតរថយន្តក៏ឡើង ឬក៏ថា ពេលទៅភ្នំពេញ មានមនុស្សច្រើន តែពេលវិលត្រឡប់មកវិញ មិនមានអ្នកជិះ ជាដើម៕
